نەمەرەمە حات: جاعىمپاز بولما جانە جاعىمپازداردىڭ سوزىنە سەنبە
ال، نەمەرە بالادان دا ىستىق بولادى ەكەن. سوندىقتان، بوس ۋاقىتتى پايدالانىپ، نەمەرەمە ءبىر حات جازىپ قويۋدى ءجون سانادىم.
... مەنىڭ جۇرەگىمنىڭ قۋاتى - نەمەرەم، سەن ەندى عانا ءبىر جاسقا تولاسىڭ، كەيىن سەن ەرجەتكەندە مەن بۇل جالعاندا بولام با، جوق پا، ونى ءبىر جاراتۋشى عانا بىلەدى. سوندىقتان دا كەيىن ەسەيگەندە وقىرسىڭ دەگەن ىزگى نيەتپەن بولاشاققا ءبىر حات جولداۋدى وزىمە پارىز سانادىم.
بىرىنشىدەن، سەنىڭ دەنىڭ ساۋ بولىپ، سالاۋاتتى ءومىر سۇرگەنىڭدى قالادىم. جامان ادەتتەردەن اۋلاق بول، سوندا عانا ماعىنالى ۇزاق عۇمىر كەشەسىڭ... (ونى كەيىن ءوزىڭ سارالاپ الارسىڭ)
ەكىنشىدەن، سەن اۋقاتتى ءومىر سۇرگەنىڭ ءوزىڭ ءۇشىن دە، ۇلتىڭ ءۇشىن دە ماڭىزدى. ءبىراق، بايۋدىڭ جولى ءارتۇرلى، ءبىلىم مەن بىلىكتىلىك ارقىلى الدىڭا قويعان ماقساتىڭا جەتۋگە بولادى. بۇل جول اۋىرلاۋ، ءبىراق، قايىرلى. ەكىنشى جولى - ەلدىڭ بايلىعىن ۇرلاپ شەت ەلگە ساتۋ، ۇرىق - قارلىق، جەمقورلىق پەن پاراقورلىق ارقىلى بايلىققا قول جەتكىزۋ... بۇل ەڭ قايىرسىز جولى جانە حالىقتىڭ قارعىسىنا ۇشىراتاتىن قايعىلى جاعداي. سەبەبى، سەن ءوزىڭنىڭ ۇرپاعىڭنىڭ بولاشاعىنا بالتا شاباسىڭ...
ۇشىنشىدەن، جىگىتكە جەتى ونەر دە از، - دەگەن ەكەن بابالارىڭ. سوندىقتان، باسقا ونەرلى حالىقتىڭ ءتىلىن ءبىل، ونەرىن ۇيرەن. ءبىراق، قايدا جۇرسەڭ دە انا ءتىلىڭدى ۇمىتپا، انا ءتىلىڭدى دامىتۋعا بارلىق كۇشىڭدى سال. سەبەبى، سەنىڭ انا ءتىلىڭ - وت باسى، وشاق قاسى بولىپ بارا جاتىر.
ءبىلىم - ديپلوممەن، دانىشپاندىق - دوكتورلىقپەن ولشەنبەيدى. ديپلوم الۋ ءۇشىن وقىما... سەن دە بالاڭا بايلىق ەمەس، ءبىلىم تاستاپ كەتۋگە تىرىس، قاراعىم.
تورتىنشىدەن، جۇرەگىڭنىن تۇكپىرىندە ءبىر جاراتۋشى بار ەكەنىن ساقتاپ ءجۇر، قاراعىم... باسقا ءدىن وكىلدەرىنە دە قۇرمەتپەن قارا، سەبەبى، ولاردى دا ءبىر جاراتۋشى جاراتتى ەمەس پە؟!!!
ورتودوكس بولماسا راديكالدى - ەكسترەميست بولعانىڭ ، ءوز وت - باسىڭا عانا ەمەس، بۇكىل ادامزاتقا قاۋىپ توندىرەتىنىن ەسكە سالىپ كەتۋدى ءجون سانادىم. سوندىقتان، ءدىن مەن ءدىلدىڭ (ادەت -عۇرىپ) ارا جىگىن اجىراتىپ العانىڭ وزىڭە پايدالى.
ۇلتىڭنىن سالت -ءداستۇرىن دامىتا بەر، دامىتا بەر، سوندا عانا سەنىڭ ۇلتىڭ اسسيميلياعا ۇشىراماي، جەر اتتى پلانەتادا قازاق بولىپ قالادى!!!
ەلىكتەگىش بولما، بولساڭ، وندا ءوز ۇلتىڭنىن بارلىق قۇندىلىقتارىن ادا ەتەسىڭ!!!
بەسىنشىدەن، جاعىمپاز بولما جانە جاعىمپازداردىڭ سوزىنە سەنبە. سوندا عانا ءومىرىڭنىڭ ءمانى بولادى. مىڭداعان جىل تاريحى بار قازاق دەگەن ۇلتتىڭ وكىلى رەتىندە، سەن دە ۇلتىڭنىڭ تاريحىن دامىتۋعا كۇيىڭ كەلگەنشە ۇلەس قوس. ارزان اتاق، ماراپاتتان اۋلاق جۇرۋگە تىرىس. ءوزىڭدى كوزىنشە ماقتايتىن ادامداردان ساق بولعايسىڭ...
التىنشىدان، وتاندى ءسۇيۋ - مىنەزدەن، - دەگەن ەكەن اتامىز. قانداي كوركەم مىنەزدى بولساڭ دا، وتانىڭا، ۇلتىڭا ءتىل تيگەن كەزدە ارىستانداي ايبارلى بول، قاراعىم!!!
داڭعازالىق - داراقىلىق پەن داڭعويلىققا الىپ كەلەتىن تۋرا جول. سونان اۋلاق بولعانىڭ ءجون.
جەتىنشىدەن، بۇ ومىرگە كەلگەن سوڭ ءاربىر ادامنىڭ الدىنا قويعان ۇلى ماقساتى بولادى. ول - ارتىندا وزىنە ساي ۇرپاق قالدىرۋ !!! سەن دە كەيىن اتا بولعاندا، نەمەرەڭە وسىنداي حات جازىپ كەتەدى دەگەن ۇمىتتەمىن. ءۇمىت اقتالعاندا عانا، ارماندار ورىندالادى!!!
P. S.
جىلعالار بۇلاقتارعا، ، بۇلاقتار وزەندەرگە، ال، وزەندەر مۇحيتقا قۇيادى! ۇلتىڭا قىزمەت ەتكىڭ كەلسە، بولماعاندا جەتى جىلعانىڭ بىرىنەن اققان سۋداي، قازاق دەگەن مۇحيت تەكتەس كەڭ پەيىلدى ەلدىڭ رۋحاني ومىرىنە ءبىر تامشى بولسىن ءوزىڭنىڭ پايداڭدى تيگىزۋگە تىرىس!!! سوندا عانا قازاق دەگەن ۇلت كوك تۋىن، كوك اسپاننىڭ استىندا ماڭگى جەلبىرەتە الادى!!! وعان سەنىڭ دە ۇلەسىڭ بولاتىنىنا كامىل سەنەمىن!!! سەنىمدەر اقتالعاندا عانا، ارماندار ورىندالادى!!! جۇرەگىمنەن تامشىلاعان قانمەن جازىلعان وسى حاتتى ءبىر كۇنى وقىپ، ويلانارسىڭ...
قۇرمەتپەن: - سەنى جانىنداي جاقسى كورەتىن اتاڭ
سوۆەتقازى نۇرسيلا
