الدىن الا بولجام بويىنشا، ستامبۇلداعى شابۋىلدان قازاقستاندىقتار زارداپ شەككەن جوق

استانا. قازاقپارات - ازىرگە، الدىن الا بولجام بويىنشا، ستامبۇلداعى تۇنگى كلۋبتا بولعان شابۋىلدان زارداپ شەككەن وتانداستارىمىز جوق.

بۇل تۋرالى قازاقپارات تىلشىسىنە ق ر س ءى م باسپا ءسوز قىزمەتىنىڭ باسشىسى ءانۋار جايناقوۆ تەلەفون ارقىلى حابارلادى.

«ءبىزدىڭ ديپلوماتتار جەرگىلىكتى بيلىكپەن جانە قۇقىق قورعاۋ ورگاندارىمەن ۇدايى بايلانىستا. اقپارات ءالى دە تەكسەرىلۋدە»، - دەدى ءانۋار جايناقوۆ.

بۇدان بۇرىن ءمالىم ەتىلگەندەي، Reinа تۇنگى كلۋبىنداعى شابۋىل سالدارىنان 35 ادام قازا تاۋىپ، جارالانعاندار سانى 40 قا جەتكەن ەدى.

بۇل تۋرالى ستامبۇلدا جۇرگەن وتانداسىمىز نۇرات يلياس جەرگىلىكتى بيلىك مالىمەتتەرىنە سىلتەمە جاساپ حابارلادى. سانتا كلاۋس كوستيۋمىن كيگەن ەكى ەر ادام «رەينا» تۇنگى كلۋبىنا باسىپ كىرىپ، بەيبەرەكەت وق اتقان.

ولار شابۋىل جاساعان كەزدە عيماراتتىڭ ىشىندە 700-800 ادام بولعان. «2017-جىل تۇركيانىڭ ءىرى قالاسىندا تەررورلىق اكتىمەن باستالدى. سالافيتتەر تۇنگى كلۋبقا كىرىپ اۆتوماتتان جاپپاي وق اتا باستادى. ولاردىڭ پىكىرىنشە، جاڭا جىلدى مەرەكەلەۋ - بۇل حارام. جانە مۇنداي پايىمداۋ الەۋمەتتىك جەلىدە تارالعان»، - دەپ جازدى نۇرات يلياس Facebook-تە.

ول ستامبۇل ۋنيۆەرسيتەتىندە «تيۋركولوگيا» ماماندىعى بويىنشا دوكتورانتۋرادا وقيدى. ءۇش جىلدان بەرى وسى قالادا تۇرادى. ستامبۇل تۇنگى كلۋبىندا وق اتقان لاڭكەستەردىڭ ءبىرىنىڭ كوزى جويىلدى، دەپ حابارلادى Guardian.