پاۆلودار وبلىسىندا مەديتسينالىق قىزمەتتى تولەۋ دەپارتامەنتىنىڭ باسشىلارى پارامەن ۇستالدى

استانا. قازاقپارات - سىبايلاس جەمقورلىققا قارسى ءىس- قيمىل ۇلتتىق بيۋروسىنىڭ پاۆلودار وبلىسى بويىنشا دەپارتامەنتى ق ر د س ءا د م مەديتسينالىق قىزمەتتى تولەۋ كوميتەتىنىڭ وبلىس بويىنشا دەپارتامەنتىنىڭ باسشىسى د. قازانعاپوۆ پەن ونىڭ ورىنباسارى ن. احانايەۆانى ۇستادى.

«لاۋازىمدى تۇلعالاردىڭ تەگىن مەديتسينالىق كومەك كەپىلدى كولەمىن كورسەتۋگە شارتتارعا كەدەرگىسىز قول قويىپ جانە جالپى قامقورلىق جاساعانى ءۇشىن مەديتسينالىق مەكەمە باسشىلارىنان جۇيەلى تۇردە پارا العانى انىقتالدى»، دەلىنگەن دەپارتامەنت تاراتقان حابارلامادا. سونىمەن، سىبايلاس جەمقورلىققا قارسى قىزمەت ەكىباستۇز قالاسى №2 ەمحاناسىنىڭ باس دارىگەرى قابىلتايەۆتان، №3 -ەمحانا باس دارىگەرى ساكەنوۆادان جانە باسقالاردان 200000 تەڭگەدەن استام پارا الۋ كەزىندە د. قازانعاپوۆ پەن ن. احانايەۆانى ۇستادى. قازىر د. قازانعاپوۆ، ن. احانايەۆا، س. قابىلتايەۆ، ق. ساكەنوۆا پاۆلودار قالاسى ۋاقىتشا ۇستاۋ يزالياتورىنا قامالدى. تەرگەۋ ءجۇرىپ جاتىر.