ورالدا ءبىر كۇندە ەكى كوپ قاباتتى ءۇي پايدالانۋعا بەرىلدى
زاشاعان كەنتىندەگى «كوكتەم» شاعىن اۋدانىندا 500 پاتەرلىك، بەس قاباتتى تۇرعىن ءۇي كەشەنى بوي كوتەردى. ونى «ماراسانت» ج ش س ءبىر جىلدا سالىپ ءبىتىردى. پاتەرلەردىڭ جالپى الاڭى - 24911,8 شارشى مەتر. سول سەكىلدى د. قونايەۆ اتىنداعى شاعىن اۋداندا 171 پاتەرلىك توعىز قاباتتى ءۇي دە ىسكە قوسىلدى.
بۇل عيماراتتىڭ مەردىگەرى «سۆ پليۋس» ج ش س قۇرىلىس جۇمىستارىن 2014 -جىلدىڭ قاراشاسىندا باستاعان بولاتىن. پاتەرلەردىڭ جالپى الاڭى - 10449,18 شارشى مەتر. قوس تۇرعىن ءۇي دە «نۇرلى جول» باعدارلاماسى اياسىندا «قازاقستان يپوتەكالىق كومپانياسى» يپوتەكالىق ۇيىمى» ا ق- نىڭ تاپسىرىسىنا سايكەس سالىندى. پاتەرلەر جەرگىلىكتى اتقارۋشى ورگانداردا ساناتتار بويىنشا تۇرعىن ءۇي كەزەگىندە تۇرعاندارعا كەيىن ساتىپ الۋ قۇقىعىمەن اتالمىش ا ق- نىڭ باعدارلاماسى بويىنشا جالعا بەرىلەدى. تۇرعىنداردىڭ قۋانىشىنا ورتاقتاسىپ، مەردىگەر كومپانيالارعا العىسىن بىلدىرگەن ءوڭىر باسشىسىنىڭ اتاپ وتكەنىندەي، ق ر تاۋەلسىزدىگىنىڭ 25 جىلدىعى تويلانعان جىلدا وبلىستا بارلىعى 1500 پاتەر پايدالانۋعا بەرىلىپ وتىر.
مۇنىڭ ءبارى - ەلباسىنىڭ، مەملەكەتتىڭ قولداۋىنىڭ ارقاسى. «نۇرلى جول» باعدارلاماسى حالىقتى تۇرعىن ۇيمەن قامتۋدى، جول سالىپ، ينفراقۇرىلىم تارتۋدى، ساۋلەتتى نىساندار تۇرعىزىپ، قالا مەن ەلدى مەكەندەردى اباتتاندىرۋدى، جاڭا جۇمىس ورىندارىن اشۋدى كوزدەيدى. بۇگىن ءبىر كۇننىڭ ىشىندە 670 پاتەر ءوز يەلەرىن تاپتى. جاڭا باسپانالار التى سانات بويىنشا كەزەكتە تۇرعاندارعا بەرىلدى. ولاردىڭ اراسىندا كوپ بالالى وتباسىلار، جالعىزباستى انالار، مۇمكىندىگى شەكتەۋلى بالالاردى تاربيەلەپ وتىرعاندار جانە باسقالار بار.
التاي كولگىنوۆ ءبىرقاتار جاڭا پاتەرلەردە بولىپ، تۇرعىندارعا «قۇتتى بولسىن» ايتىپ، كورىمدىگىن بەردى.
ايتا كەتەيىك، وبلىستىق قۇرىلىس باسقارماسىنان تۇسكەن مالىمەتكە قاراعاندا، بيىلعى ون ءبىر ايدا بارلىق قارجىلاندىرۋ كوزدەرىنەن 234,3 مىڭ شارشى مەتر تۇرعىن ءۇي ىسكە قوسىلدى، بۇل وتكەن جىلعىدان 16 پايىزعا ارتىق. كەلەسى جىلى جەتى كوپپاتەرلىك تۇرعىن ءۇي قۇرىلىسى جالعاسادى.
اۆتور: ەلجان ەرالى
