لۋكاشەنكو ءوزىنىڭ جاڭاجىلدىق ارمانىن ايتتى

استانا. قازاقپارات - بەلورۋس پرەزيدەنتى اللەكساندر لۋكاشەنكو جاڭا جىلعا قانداي سىي العىسى كەلىتىنىن ايتتى، - دەپ حابارلايدى بەلتا.

بەلورۋس باسشىسى نيكولايەۆشينسك سوعىس جانە ەڭبەك ارداگەرلەرى مەن كەمباعال جاندار ينتەرناتىندا بولىپ قايتتى. ول جەردە جۋرناليستەر لۋكاشەنكودان ارماندايتىن سىيلىعى بار ما ەكەنىن سۇرادى. «ءيا، بار - ورتاشا 500 دوللار (ەلدەگى ورتاشا ەڭبەكاقى - اۆتور ەسكەرتپەسى). بۇل مەن ءۇشىن سىيلىق بولار ەدى، مەن وسىنى ارماندايمىن»، - دەدى ول.

سونىمەن بىرگە لۋكاشەنكو دىتتەگەن ماقساتقا جەتۋ ءۇشىن عالامات كۇش جۇمساۋ كەرەكتىگىن ايتا كەتتى. «بۇعان سەنبەيتىندەر بولسا، وكىنىشتى. مۇنى ىستەۋى كەرەك، ءبىراق جاساعىسى كەلمەيتىندەرمەن قوشتاسامىز. ءبىز وسى ماقساتقا جەتۋ ءۇشىن نەگە بولسا دا بارامىز»، - دەدى ەل پرەزيدەنتى.

ايتا كەتەيىك، لۋكاشەنكونىڭ ەڭبەكاقىنى 500 دوللارعا دەيىن جەتكىزۋ تۋرالى العاشقى تاپسىرماسى 2010 -جىلى ايتىلىپ، جىل سوڭىنا دەيىن ورىندالعان ەدى. الايدا، بەلورۋس رۋبلىنىڭ قۇنسىزدانۋى سالدارىنان ەلدەگى ەڭبەكاقى مولشەرى تومەندەتىلگەن بولاتىن.