وڭتۇستىك قازاقستان وبلىسى اكىمىنىڭ جاڭا ورىنباسارى تاعايىندالدى

استانا. قازاقپارات - پرەزيدەنت اكىمشىلىگى كەلىسىمىمەن جانە وڭتۇستىك قازاقستان وبلىسى اكىمى جانسەيىت تۇيمەبايەۆتىڭ وكىمىمەن وقو اكىمىنىڭ ورىنباسارى بولىپ باۋىرجان سالدار ۇلى جامالوۆ تاعايىندالدى.

بۇل تۋرالى بۇگىن ءوڭىر باسشىسى كادرلىق ماسەلە بويىنشا وتكەن ماجىلىستە مالىمدەدى.

- وبلىس اكىمىنىڭ ورىنباسارى لاۋازىمى بوس ەكەندىگى وزدەرىڭىزگە بەلگىلى. وسىعان وراي، پرەزيدەنت اكىمشىلىگى كەلىسىمىمەن وبلىس اكىمىنىڭ ورىنباسارى لاۋازىمىنا باۋىرجان سالدار ۇلى جامالوۆتى تاعايىنداۋ تۋرالى شەشىم قابىلدادىم. باۋىرجان سالدار ۇلى ەكونوميكا جانە قارجى سالالارىندا زور تاجىريبەسى بار بىلىكتى مامان. ءتۇرلى قارجىلىق قۇرىلىمداردا بايقاۋشى كەڭەستەردىڭ مۇشەسى قىزمەتىن اتقارعان. وسى تاجىريبەسى وبلىس اكىمىنىڭ ورىنباسارى رەتىندەگى الداعى جۇمىسىندا ۇلكەن كومەگى تيەتىن بولادى، - دەدى جانسەيىت قانسەيىت ۇلى. باۋىرجان سالدار ۇلى وبلىس اكىمىنىڭ ورىنباسارى رەتىندە كاسىپكەرلىك، يندۋستريالىق- يننوۆاتسيالىق دامۋ، اۋىل شارۋاشىلىعى جانە تۋريزم سالالارىنا جەتەكشىلىك جاسايدى.

وبلىس اكىمى وعان اۋىل شارۋاشىلىعى سالاسىنداعى وزەكتى ماسەلەلەرىنە تەرەڭ تالداۋ جاساپ، ولاردىڭ شەشىلۋىن قامتاماسىز ەتۋ، وبلىستىڭ الەۋەتىن ەسكەرە وتىرىپ كاسىپكەرلىك پەن تۋريزمگە جان- جاقتى قولداۋ كورسەتىپ، دامۋعا ىقپال جاساۋ، ينۆەستيتسيالار تارتۋدى، يندۋستريالاندىرۋ كارتاسىنىڭ ۋاقتىلى جانە ساپالى اتقارىلۋىن ۇيىمداستىرۋدى تاپسىردى. باۋىرجان سالدار ۇلى جامالوۆ 1971 -جىلى 27 -شىلدەدە تۋىلعان. ءبىلىمى جوعارى، ينجەنەر- مەحانيك - تەحنولوگ، زاڭگەر ماماندىقتارىن يگەرگەن. ەڭبەك جولىن 1993 جىلى شىمكەنت قالاسىندا بيزنەس سالاسىندا باستاعان. ۇزاق جىلدار كاسىپكەرلىك سالاسىندا ەڭبەك ەتىپ، باسشىلىق لاۋازىمداردا مول تاجىريبە جيناعان. بۇگىنگە دەيىن «مىرزاكەنت- حولدينگ» جاۋاپكەرشىلىگى شەكتەۋلى سەرىكتەستىگىنىڭ ديرەكتورى بولىپ ەڭبەك ەتىپ كەلدى. التىنشى شاقىرىلىمداعى وبلىستىق ءماسليحاتتىڭ دەپۋتاتى بولىپ سايلانعان.