جاسى كەلگەن ەلشىلەردىڭ بارلىعى قىزمەتىنەن بوساتىلادى - نازاربايەۆ

استانا. قازاقپارات - «جاسى كەلگەن ەلشىلەردىڭ بارلىعى قىزمەتىنەن بوساتىلىپ، ولاردىڭ ورنىنا جاڭا ەلشىلەر تاعايىندالاتىن بولادى».

بۇل تۋرالى ەلباسى نۇرسۇلتان نازاربايەۆ ەلىمىزدىڭ سىرتقى ىستەر مينيسترلىگىنىڭ باسشىلىق قۇرامىمەن كەزدەسۋ كەزىندە ءمالىم ەتتى. «جالپى، ەلشىلىكتە كادر ماسەلەسىنە جاقسىلاپ قاراۋىمىز كەرەك. رەسەي، قىتاي، ەۋروپانىڭ گەرمانيا، فرانسيا سياقتى كەيبىر ەلدەرىندە، امەريكا قۇراما شتاتتارىندا ءبىزدىڭ ساۋدا-ساتتىقپەن شۇعىلداناتىن ۋاكىلدەرىمىز بولۋى كەرەك. بارلىق ەلدەر سولاي جاسايدى. ەكسپورتقا شىعاتىن تاۋارلاردى، بەرى قاراي ينۆەستيتسيا تارتۋ؛ مەن بارىپ كەلىسىپ كەتكەن جەرلەردە سولاردىڭ ارتىنان ءجۇرىپ، شاقىرىپ الىپ كەلىپ، قاي جەردە كىممەن سويلەسۋ كەرەكتىگىن كورسەتەتىن ەلشىلەر بولادى. تەك قانا سىرتقى ساياساتپەن وتىرامىز دەگەن بولمايدى. ءبىز رەسەي، ا ق ش سياقتى سىرتقى ساياساتىمىز دۇنيەنىڭ بارلىعىنا ىقپالىن تيگىزىپ وتىرعان ۇلكەن ەل ەمەسپىز. ءبىز ءوز جاعدايىمىزدى ويلاۋىمىز كەرەك»، - دەدى مەملەكەت باسشىسى.

اۆتور: ەربول جانات