اۋىل بالاسىنىڭ اياز اتاعا جازعان حاتى تاڭعالدىردى - اقتوبە وبلىسى

استانا. قازاقپارات - اقتوبە وبلىسىندا تۇراتىن ون جاسار وقۋشى يليا مينەيەۆ اياز اتاعا اۋىلىنىڭ قىس بويى قار باسىپ قالاتىن جولىن تازارتۋعا كومەك بەرۋىن سۇراپتى.

حاتتا «اياز اتا، سالاماتسىز با! سىزگە شالعايداعى قار باسىپ جاتقان پياتيگور اۋىلىنان جازىپ وتىرمىن. قار باسقان دەيتىن سەبەبىم، بىزگە اق ۇلپانىڭ مول جاۋعاندىعى سونداي، قاردان اياق الىپ ءجۇرۋ مۇمكىن ەمەس. مەنىڭ سىنىپتاعى دوستارىمدى تىڭداسام، سەنەن بىرەۋى ويىنشىق ماشينا، ەندى بىرەۋى قۋىرشاق، تاتتىلەر سۇراپ جاتىر. ال ماعان ونىڭ ەشقايسىسى كەرەك ەمەس. ويتكەنى، مەنىڭ اتا-انام جاعدايىمدى جاساپ وتىر، ولار - وتە مەيىرىمدى جاندار. مەنىڭ ءبىر عانا تىلەگىم بار - بىزگە اۋىلدىڭ جولىن جاقسىلاپ تازارتىپ بەرسەڭىز. ايتپەسە، ماعان مەكتەپكە بارۋ قيىن»، - دەپ جازىپتى 3-سىنىپ وقۋشىسى.

يليا مينەيەۆتىڭ حاتى ۇستازدارىن دا بەي-جاي قالدىرماپتى. قوبدا اۋدانى بەستاۋ اۋىلدىق ورتا مەكتەبىنىڭ تاربيە ءىسى جونىندەگى مەڭگەرۋشىسى شىنار ساتايەۆانىڭ ايتۋىنشا، بيىل مەكتەپ باسشىلىعى باستاۋىش سىنىپ وقۋشىلارىنا اياز اتاعا حات جازدىرۋدى ۇيعارىپتى.

- بالالاردىڭ تىلەگى ءارتۇرلى. بىرەۋى قالام، ويىنشىق سۇراسا، ەندى بىرەۋلەرى پلانشەت سۇراعان. ارمانداعان سىيلىقتاردىڭ ەڭ باعالىسى سول پلانشەت بولار. ال ءبىز يليا مينەيەۆتىڭ حاتىن وقىپ، شىنى كەرەك، تاڭعالدىق. سەبەبى، بۇل ساباقتىڭ ۇستىندە جازىلعان نارسە بولعاندىقتان، وعان ەشقانداي اتا اناسىنىڭ نەمەسە مۇعالىمنىڭ ىقپالى بولعان جوق. بالانىڭ ءوزىنىڭ تىلەگى، ارمانى»، - دەيدى شىنار ساتايەۆا.

ۇستازىنىڭ ايتۋىنشا، يليا - مەكتەبىنىڭ ماقتانىشى، وقۋ وزاتى. ايتا كەتسەك، بەستاۋ اۋىلى وبلىس ورتالىعى - اقتوبەدەن 95 شاقىرىم جەردە ورنالاسقان.

زادا زەيىن