ەندى جاياۋ جۇرگەن جول پوليتسەيلەرى كولىكتەردى توقتاتۋعا قۇقىلى ەمەس

استانا. قازاقپارات - شەتەلدەگى وزىق تاجىريبەلەردى ەنگىزۋ ناتيجەسىندە قازاقستان پوليتسەيلەرى الاتاياقتى قولدانبايدى.

بۇل تۋرالى بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ق ر ءى ءى م اكىمشىلىك پوليتسيا كوميتەتى باسقارما باسشىسىنىڭ ورىنباسارى ەركىن ءمۇسىلىموۆ ايتتى، دەپ حابارلايدى قازاقپارات.

«ىشكى ىستەر مينيسترلىگى ورگاندارى جول ءجۇرىسىن قاداعالاۋ كەزىندە اۆتوپاترۋلدەۋ ادىسىنە تولىقتاي كوشتى. وسى ورايدا جاياۋ جۇرگەن پوليتسەيلەر ەندى كولىكتەردى توقتاتپايدى. سونىمەن قاتار 2017-جىلدىڭ 1- قاڭتارىنان باستاپ ءبىزدىڭ ىشكى ىستەر ورگاندارىنىڭ قىزمەتكەرلەرى كولىكتەردى توقتاتۋ ءۇشىن ارنايى تاياقشا قولدانبايتىن بولادى»، - دەدى ە. ءمۇسىلىموۆ.

ونىڭ سوزىنە قاراعاندا، بۇل شارالاردى قابىلداۋعا بارلىق جەرلەردە فوتو جانە بەينەتىركەۋدىڭ ەنگىزىلۋى ىقپال ەتىپ وتىر. كولىكتەردى توقتاتۋ پاترۋلدىك ماشينالاردا ورنالاسقان ارنايى دىبىس جانە جارىق بەلگىلەرى ارقىلى ىسكە اسىرىلادى.

سونىمەن قاتار اكىمشىلىك پوليتسيا وكىلى 2016-جىلدان باستاپ قىزمەتكەرلەر پاترۋلدىك اۆتوكولىكتەرگە وتىرعىزىلعانىن جەتكىزدى.

اتاپ ايتقاندا، بۇگىندە قازاقستان بويىنشا 2971 وسىنداي كولىكتەر بار. بۇل اۆتوكولىكتەردى ەلىمىز اۋماعىندا جول قاۋىپسىزدىگىن قامتاماسىز ەتۋگە جەتكىلىكتى كورىنەدى.

«ەرەكشە جاعدايدا، ياعني ج ك و، توتەنشە جاعداي، كەپتەلىس كەزىندە كولىك قۇرالدارى جول ەرەجەسىنە ساي جانە ءبىر مەزگىلدە ىسقىرىق ارقىلى توقتاتاتىن بولادى. وسىنداي تالاپ شەتەلدەردەگى وزىق تاجىريبەلەردى ەسكەرە وتىرىپ ەنگىزىلدى»، - دەدى ول.

اۆتور: رۋسلان عابباسوۆ