شياڭگاڭ قازاقستانمەن ارىپتەستىكتى ارتتىرۋعا قىزىعۋشىلىق تانىتىپ وتىر

استانا. قازاقپارات-  گونكونگ قازاقستانمەن ءتيىمدى ارىپتەستىك ورناتۋ مۇمكىندىگى جىل ساناپ ارتىپ كەلەدى. الەمدەگى ۇلكەن ەكونوميكالىق ايماقتاردىڭ قازاق ەلىنە ءجىتى نازار سالا باستاۋى - سوعان دالەل.

 بىرنەشە جىلدان بەرى ازياداعى ەڭ ءىرى قارجى ورتالىعى سانالاتىن گونكونگ تا «ءبىر بەلدەۋ - ءبىر جول» باعدارلاماسى اياسىندا قازاقستانمەن ارىپتەستىكتى ارتتىرۋعا قىزىعۋشىلىق تانىتىپ وتىر. ورنالاسقان جەرى ىڭعايلى ءارى تاسىمال جۇيەسى دامىعان گونكونگ (شياڭگاڭ) - ەۋروپالىق جانە امەريكالىق كومپانيالار ءۇشىن قىتاي عانا ەمەس، ازيا نارىعىنا شىعاتىن بىردەن- ءبىر وڭتايلى الاڭ.

ارنايى اكىمشىلىك اۋدانىمەن قازاقستان دا ءوزارا ءتيىمدى ارىپتەستىك ورناتۋعا نيەتتى. شەتەلدەن ينۆەستيتسيا تارتىپ، قازاقستاندىق كومپانيالاردىڭ حالىقارالىق نارىققا شىعۋىنا دا گونكونگ جاقسى مۇمكىندىك بەرەدى. ال ازيالىق ساۋدا تورابى سانالاتىن گونكونگ ءۇشىن تاۋارلاردى يمپورتتاۋ مەن ەكسپورتتاۋ وتە ماڭىزدى. سوندىقتان ءوزارا ساۋدا- ساتتىقتى جانداندىرۋعا كىم دە بولسا مۇددەلى.

 رەيموند يپ، گونكونگ ساۋدانى دامىتۋ كەڭەسى اتقارۋشى ديرەكتورىنىڭ ورىنباسارى:

- جىل سايىن گونكونگ الەمنەن جارتى تريلليون ا ق ش دوللارى كولەمىندەگى تاۋار يمپورتتايدى. دەگەنمەن بۇل جەردە قازاقستاننىڭ ۇلەسى از، ءالى دە جەتكىلىكتى ەمەس. ءبىراق مەن ساۋدا كولەمىن ارتتىرۋعا جاڭا مۇمكىندىكتەر كورىپ وتىرمىن. كەزىندە قازاقستان بۇرىنعى كەڭەس وداعىنىڭ ازىق تۇلىك بازاسى بولدى. قازىر دە قازاقستان تازا، ساپاسى جوعارى ازىق- تۇلىك ونىمدەرىن شىعارادى. ال گونكونگ - ۇلكەن نارىق. ءبىز جىلىنا قۇنى 20 ميلليارد دوللاردان اساتىن ازىق- تۇلىك تۇتىنامىز.

 گونكونگتاعى ساۋدانى دامىتۋ جونىندەگى كەڭەستىڭ اتقارۋشى ديرەكتورى ورىنباسىرى رەيموند يپتىڭ ايتۋىنشا، بۇگىندە قازاقستاننىڭ ەۋروپادان يمپورتتاپ جاتقان تاۋارلارى گونكونگتا وندىرىلەدى. «نەگە ونى قازاقستانعا دەلدالسىز، تىكەلەي جەتكىزبەسكە؟!»، - دەيدى رەيموند يپ. ال قازاقستاننىڭ پايدالى قازبالارىنا قاشان دا گونكونگتا سۇرانىس بار. ودان قالدى شيكىزات ونىمدەرىن ارى قاراي ەكسپورت جاسۋعا دايىن.

رەيموند يپ، گونكونگ ساۋدانى دامىتۋ كەڭەسى اتقارۋشى ديرەكتورىنىڭ ورىنباسارى:

 - تاريحتا ورتالىق ازيا شىعىس پەن باتىستى بايلانىستارعان كوپىر بولدى. قىتايدىڭ باستاماسى توڭىرەگىندە ونىڭ وسى ءرولى قايتا جاڭعىرىپ وتىر. بۇگىندە ازيا مەن ەۋروپا الەمدەگى ەڭ ۇلكەن ەكونوميكالىق نارىق سانالادى. اسىرەسە، ازيانىڭ دامۋ مۇمكىندىگى وتە جوعارى. حالقى جاس ءارى سانى كوپ. وتە تەز دامىپ كەلە جاتقان ەكونوميكاسى بار ايماقتا ۋربانيزاتسيا دا قارقىندى ءجۇرىپ جاتىر. سوندىقتان، مەنىڭ ويىمشا، لوگيستيكادا شىعىس پەن باتىس اراسىن بايلانىستىرىپ، جول- جونەكەي قىزمەت كورسەتۋدە قازاقستانىڭ مۇمكىندىگى مول.

تاياۋدا گونكونگتىڭ قارجى ءمينيسترى باستاعان ىسكەر توبى قازاقستانعا ارنايى جۇمىس ساپارىمەن باردى. ساپار اياسىندا گونكونگتىڭ ساۋدا دامىتۋ كەڭەسى مەن استانا حالىقارالىق قارجى ورتالىعى ءوزارا سەنىم جونىندەگى مەموراندۋمعا قول قويدى. قۇجاتتا ىنتىماقتاستىقتى نىعايتۋ جانە ساۋدانى جانداندىرۋ قاراستىرىلعان. جالپى قوس تاراپ تا قارجى سالاسىنداعى ارىپتەستىككە باسىمدىق بەرەدى.

 اۆتورلارى: ن. بەكەن، ج. سۋي

www.24.kz