رەسەي جاڭا سالىناتىن ايلاققا بولا بايقوڭىردى تاستامايدى - دميتري روگوزين

بايقوڭىر. قازاقپارات - رەسەي ۆيتسە-پرەمەرى دميتري روگوزين قيىر شىعىستان جاڭا رەسەيلىك ايلاق قۇرىلىسى ماسەلەلەرى بويىنشا ارنايى كوميسسيا وتىرىسىندا بايقوڭىردىڭ دامۋ جوسپارى جايلى اڭگىمەلەدى، دەپ حابارلايدى قازاقپارات ءتىلشىسى «روسسيسكايا گازەتاعا» سىلتەمە جاساپ.

ءمالىم بولعانىنداي، ق ر پرەزيدەنتى نۇرسۇلتان نازاربايەۆتىڭ رەسەي فەدەراتسياسىنا جۇمىس ساپارى اياسىندا پەتەربۋرگتە بايقوڭىر ايلاعىنىڭ الداعى دامۋ تۇجىرىمداماسىنا قول قويىلدى. «ءبىز العاش رەت قازاقستاندىق ارىپتەستەرمەن بىرلەسە جۇمىس ىستەيتىن جوبالار جايلى كەلىسىمگە كەلدىك. بۇل قازاقستان رەسپۋبليكاسىنىڭ «زەنيت» زىمىران ۇشىرۋ كەشەنىن دامىتۋ ءۇشىن سالىپ وتىرعان قارجىسى مەن «روسكوسموستىڭ» جاڭا تەحنولوگيالىق قۇرىلعىلارى نەگىزىندە جاسالعان «بايتەرەك» جوباسى»، - دەدى ۆيتسە-پرەمەر.

«سونىمەن بىرگە، قيىر شىعىستا بوي كوتەرەتىن شىعىس ەكىنشى عارىش ايلاعى سالىنعان سوڭ رەسەي مەن قازاقستاننىڭ بايقوڭىردى تاستامايتىنى، ونى دامىتا تۇسەتىنى جوعارى دەڭگەيدە راستالدى»، - دەدى د. روگوزين.