شەت ەلگە شىققاندار قانداي ىندەتتەن قورعانۋى ءتيىس

استانا. قازاقپارات - تۇتىنۋشىلاردىڭ قۇقىقتارىن قورعاۋ كوميتەتى شەت مەملەكەتكە دەمالىسقا نەمەسە جۇمىس ساپارىمەن باراتىندار ءۇشىن جادناما جاريالادى، دەپ حابارلايدى قازاقپارات.

«بىرىنشىدەن، قازىر رەسپيراتورلى ۆيرۋستىق اۋرۋلار ماۋسىمى. اسىرەسە، «ىشەك» تۇماۋى ەپيدەمياسى ءورشىپ تۇرعان وڭتۇستىك كورەيا مەن جاپونيادا اپتاسىنا 70 مىڭ وقيعا تىركەلەدى. كوروناۆيرۋستار بويىنشا دا ەپيدەميولوگيالىق احۋال ساقتالۋدا. كوروناۆيرۋس ينفەكتسيالارىن جۇقتىرۋ وقيعالارى كاتاردا، بىرىككەن اراب امىرلىكتەرىندە، ساۋد ارابياسى مەن وڭتۇستىك كورەيادا (اۋرۋحاناىشىلىق جۇقتىرۋ وقيعالارى) تىركەلدى. بۇكىل الەمدىك دەنساۋلىق ساقتاۋ ۇيىمىنىڭ اقپاراتىنا سايكەس، زەرتحانالىق تۇردە راستالعان ىندەت جۇقتىرۋدىڭ 652 وقيعاسى ولىمگە اكەپ سوققان»، - دەلىنگەن حابارلامادا.

تايلاند، سينگاپۋر، ۆەتنام، ءۇندىستان جانە فيليپپينگە ساپار شەگۋدى جوسپارلاعاندار بۇل ەلدەردە دەنگە بەزگەگى ۋشىعىپ تۇرعانىن ەسكەرگەن ءجون. برازيليادا زيكا بەزگەگىنىڭ تارالۋى جالعاسۋدا، 351 ادام كوز جۇمدى، ا ق ش- تا سىرتتان اكەلىنگەن 4 مىڭ وقيعا، فلوريدا شتاتىندا جەرگىلىكتى پايدا بولعان - 50 جانە يسپانيادا 190 فاكتى انىقتالدى. ا ق ش- تا ەپيدەميالىق پاروتيتتىڭ ءورشۋى (مىسقىل، 5 مىڭنان استام وقيعا) تىركەلدى، بۇل ۆاكتسيناتسيا جاساتپاعان ازاماتتار ءۇشىن قاۋىپتى.

دومينيكانا رەسپۋبليكاسى مەن گايتيدەن ديفتەريا تابىلىپ وتىر. شوتلانديادا قىزىلشا اۋرۋى ءورشىپ تۇر، ىندەتتى رەسەيدە - 86، ال تاجىكستاندا 16 ادام جۇقتىرعان. قوعامدىق تاماقتانۋ ورىندارىنا بارعاندا جانە ازىق-تۇلىك ساتىپ الۋدا ساقتىق تانىتقان ءجون. ءتىپتى ا ق ش پەن انگليا سەكىلدى دامىعان ەلدەردە قوعامدىق تاماقتانۋ جەرلەرىندە استان ۋلانۋ وقيعالارى بولىپ تۇرادى.

امەريكاعا باراتىن تۋريستەرگە سالمونەللا تابىلعان TreeHouse Foods Inc, Mac, Wal-Mart كومپانيالارىنىڭ ازىق-تۇلىك ونىمدەرىن (ىرىمشىكتەر، قىتىرلاق كارتوپ، جۇگەرى تورتيلياسى، قۇرعاق ءسۇت پەن ىركىت ۇنتاعى) ساتىپ الماۋعا كەڭەس بەرەمىز.