ب ۇ ۇ- نىڭ جاڭا باسشىسى ترامپپەن رەفورمانى تالقىلاۋعا دايىن

استانا. قازاقپارات- ب ۇ ۇ- نىڭ جاڭا باس حاتشىسى انتونيو گۋتەرريش ا ق ش- تىڭ جاڭا سايلانعان پرەزيدەنتى دونالد ترامپپەن كەزدەسكىسى كەلەتىنىن مالىمدەدى. ترامپ بۇعان دەيىن ب ۇ ۇ- دا ەلەۋلى وزگەرىستەر جاساۋعا شاقىرعان.

2017 - جىلى 1 - قاڭتاردان قىزمەتىنە كىرىسەتىن گۋتەرريش ترامپپەن «بارىنشا تەز ارادا» «كونسترۋكتيۆتى ديالوگ ورناتقىسى كەلەتىنىن» ايتتى.

«ارينە، بارىنشا جاقىن ۋاقىتتا وعان بارعىم كەلىپ تۇر. ا ق ش - ب ۇ ۇ- نىڭ باستى دونورلارىنىڭ ءبىرى عانا ەمەس، سونىمەن قاتار ۇيىم قىزمەتىندەگى باستى ەلەمەنتتەردىڭ ءبىرى» دەدى گۋتەرريش.

دونالد ترامپ 28 - جەلتوقساندا ا ق ش- تىڭ ب ۇ ۇ- عا بولەتىن قارجىسىن ۇيىم قىزمەتىنە ۇلكەن وزگەرىستەر جاساۋعا قول جەتكىزەتىن قۇرال رەتىندە پايدالاناتىنىن مالىمدەگەن. دەگەنمەن ترامپ ناقتى قانداي وزگەرىستەردى قالايتىنىن اشىپ ايتپادى.

ترامپتىڭ سوزىنە قاراعاندا، ب ۇ ۇ- نىڭ الەۋەتى مەن قاۋقارى وراسان زور، ءبىراق ونى پايدالانبايدى. «ب ۇ ۇ- نىڭ ءبىر ماسەلەنى شەشكەنىن كوردىڭىزدەر ما؟ ول ەشنارسەنى شەشپەيدى. ب ۇ ۇ پروبلەما تۋىنداتادى» دەدى ترامپ. ونىڭ ايتۋنىشا، ب ۇ ۇ قىزمەتىن رەفورمالاماسا، وندا ول اقشانى جەلگە ۇشىراتىن ۇيىمعا اينالادى.

دونالد ترامپ 20 - قاڭتاردا قىزمەتىنە كىرىسكەن سوڭ ب ۇ ۇ قىزمەتىندە وزگەرىستەر بولاتىنىن بىرنەشە رەت مالىمدەگەن.

«ازاتتىق» جاڭالىقتارى