اقتاۋدا قازاق جانە كورەي تىلدەرى ۇيرەتىلۋدە

استانا. قازاقپارات - اقتاۋداعى دوستىق ۇيىندە «چوسون» كورەي ەتنومادەني بىرلەستىگىنىڭ تىلدەردى ۇيرەتۋ جەكسەنبىلىك مەكتەبى اشىلدى.

بۇل تۋرالى ماڭعىستاۋ وبلىستىق ق ح ا حابارلادى. ماڭعىستاۋ وبلىسى تىلدەردى دامىتۋ باسقارماسىنىڭ مەملەكەتتىك الەۋمەتتىك تاپسىرىسى نەگىزىندە ۇيىمداستىرىلىپ وتىرعان جەكسەنبىلىك مەكتەپتە قازاق جانە كورەي تىلدەرىن تەگىن ۇيرەتەدى.

سونىمەن قاتار، قاتىسۋشىلار بۇل مەكتەپتە قوس مەملەكەتتىڭ مادەنيەتى، سالت-ءداستۇرى، تاريحى مەن تۇرمىسى تۋرالى بىلىمدەرىن جەتىلدىرەدى. دارىستەر ءار جەكسەنبى سايىن وتەتىن بولادى. وعان ماڭعىستاۋ وبلىسىنىڭ ءتىل ۇيرەنەمىن دەپ نيەت بىلدىرگەن كەز كەلگەن ادام قاتىسا الادى. جەكسەنبىلىك مەكتەپتىڭ اشىلۋ كۇنىندە-اق 25 ادام تىركەلىپ ۇلگەردى. ولاردىڭ اراسىندا، مەكتەپ وقۋشىلارى، ستۋدەنتتەر مەن ءتىپتى قارتتار دا بار.

«ادام بالاسى قانشالىقتى كوپ ءتىل بىلسە، سونشالىقتى باي بولادى. بۇل جەكسەنبىلىك مەكتەپتىڭ جاستار مەن ەرەسەك بۋىننىڭ باسىن قوساتىنى مەنى قۋانتادى. ولار تەك مەملەكەتتىك ءتىلدى عانا ۇيرەنىپ قانا قويماي، كورەي ءتىلىن دە مەڭگەرە الادى. سونداي-اق، قازاق حالقى مەن كورەي ۇلتىنىڭ ۇقساستىقتارى مەن ايىرماشىلىقتارىن دا زەرتتەۋگە بەت بۇرامىز»، - دەيدى «چوسون» كورەي ەتنومادەني بىرلەستىگىنىڭ ءتورايىمى رايسا مادەنوۆا.

جەكسەنبىلىك مەكتەپ اعىمداعى جىلدىڭ قازان، قاراشا ايلارىندا دا وتكەن ەدى. وعان ورىس، كارىس، ءازىربايجان، ۋكراين ۇلتىنان قۇرالعان 18 ادام مەملەكەتتىك ءتىلدى ۇيرەنىپ، ارنايى سەرتيفيكاتتارمەن ماراپاتتالعان بولاتىن.