اتىراۋ مەن شىمكەنتتىڭ تۋريستەرىن جەتكىزگەن ۇشاق شاردجاعا ءساتتى قوندى

اتىراۋ. قازاقپارات - شاردجا قالاسىنىڭ اۋەجايىنداعى قالىڭ تۇمان سالدارىنان وندا بەت الاتىن رەيستىڭ اتتاندىرىلۋى بەلگىسىز بولىپ كەلگەنىمەن اتىراۋلىق تۋريستەر دىتتەگەن جەرلەرىنە ۇشىپ شىعىپ، ءساتتى جەتتى، دەپ حابارلايدى قازاقپارات ح ا ا ءتىلشىسى.

«جاڭا جىلدى بىرىككەن اراب امىرلىكتەرىندە قارسى الماق بولعان جاندار شاردجا اۋەجايىنداعى قالىڭ تۇمان جايىندا عالامتوردان وقي وتىرىپ ءبىرشاما الاڭداعانى بەلگىلى. الايدا ءبارى جاقسى اياقتالدى. اتىراۋعا شىمكەنتتىك تۋريستەردى جەتكىزگەن SCAT اۋە كومپانياسىنىڭ ۇشاعى كەرى قايتقاندا شاردجاعا بەت العان اتىراۋلىق جولاۋشىلاردى الىپ ۇشتى. تۋريستەردىڭ حابارلاۋىنشا، بورتىندا 180 ادامى بار ۇشاق جەرگە ءساتتى قونعان. ءبىر جايسىز جەرى، ولار ەلگە ورالعاندا الدىمەن شىمكەنتكە قونىپ سودان كەيىن وڭىرگە كەلەدى»، - دەپ ءمالىم ەتتى «بەس جۇلدىز» ساياحات اگەنتتىگىنىڭ اتىراۋلىق مەنەدجەرى ەۆگەنيا نەفەدوۆا.

ەسكە سالا كەتسەك، بىرنەشە كۇنگى اۋا رايىنىڭ قولايسىزدىعى سالدارىنان (تۇمان) شاردجا (ب ا ءا) قالاسىنىڭ اۋەجايىندا اۆيارەيستەر كەيىنگە قالدىردى. «ەير ارابيا» اۆياكومپانياسىنىڭ دەرەكتەرىنە سايكەس بۇگىن شاردجادان ەكى رەيس ۇشۋى ءتيىس - الماتىعا (180 ادام) جانە استاناعا (140 ادام) رەيستەر كەيىنگە قالدىرىلدى.

تۋروپەراتورلاردىڭ مالىمەتى بويىنشا قازاقستاندىق جولاۋشىلارعا تاماق بەرىلىپ، قوناق ۇيلەرگە جايعاستىرىلعان. مينيسترلىكتىڭ حابارلاۋىنشا، «ەير ارابيا» كومپانياسى استانا مەن الماتىدان شاردجاعا ۇشاتىن رەيستەردى دە كەيىنگە قالدىردى.

بۇل رەيتتە 300 جولاۋشى بار، ولاردىڭ قاتارىندا شاردجا ارقىلى ترانزيتپەن كولومبوعا (شري لانكا) ۇشاتىن 50 ادام تىركەلگەن. ق ر ينۆەستيتسيالار جانە دامۋ مينيسترلىگى شاردجادا (ب ا ءا) قالىپ قويعان قازاقستاندىقتاردى ەلگە جەتكىزۋ ماسەلەسى بويىنشا جۇمىسشى شتابىن قۇردى، وعان قازاقستاننىڭ سىرتقى ىستەر مينيسترلىگى، اۋەكومپانيالار جانە تۋريستىك وپەراتورلار كىرەدى.

«قازىرگى ۋاقىتتا قازاقستاندىق تۋريستەردى جەتكىزۋ ماسەلەسىن شەشۋدىڭ ەكى جولى بار. «ەير ارابيا» اۋەكومپانياسى قوسىمشا رەيستەر اشىپ، جولاۋشىلاردى جەتكىزەدى. الايدا اۋەكومپانيانىڭ باسشىلىعى وسى ماسەلەگە قاتىستى ناقتى جاۋاپ بەرگەن جوق. قازاقستاندىق تۋروپەراتورلار SCAT اۋەكومپانياسىنىڭ بورتىمەن شاردجادان تۋريستەرىمىزدى الماتىعا اكەلەدى، قايتارىندا شاردجاعا ۇشاتىن بارلىق تۋريستەردى الىپ كەتەدى.

«ەير ارابيا» كومپانياسى كەيىنىرەك وپەراتورلارعا تۋريستەردى تاسىمالداۋ قۇنىن قايتارىپ بەرەدى»، - دەلىنگەن ق ر ي د م حابارلاماسىندا.