ساراپشى پىكىرى: قازاقستاننىڭ كونفەسسياارالىق كەلىسىم تاجىريبەسى سيريا ءۇشىن پايدالى بولار ەدى
بۇل پىكىردى قازاقپاراتتىڭ بىشكەكتەگى ارناۋلى تىلشىسىنە «شىعىس- باتىس ستراتەگياسى» ساراپتامالىق ورتالىعىنىڭ باس ديرەكتورى دميتري ورلوۆ ءبىلدىردى. «قازاقستاننىڭ ءتۇرلى بىتىمگەرشىلىك ميسسيالارعا قاتىسۋداعى وڭ تاجىريبەسى، ونىڭ ىشىندە رەسەيلىك- تۇركيالىق قارىم- قاتىناستى رەتتەۋدەگى اراعايىندىعى، سونىمەن بىرگە قازاقستاننىڭ سيريالىق جانجالدى بەيبىت جولمەن شەشۋ بويىنشا ۇستانىمى رەسەي، تۇركيا جانە يران اراسىنداعى نەگىزگى ماسەلەلەردە قول جەتكىزىلگەن ورتاق كوزقاراستى نىعايتىپ، ودان ارى دامىتا تۇسۋگە ءوز سەپتىگىن تيگىزەتىن بولادى»، - دەدى ول قازاقستان استاناسىندا سيريا ماسەلەسىن رەتتەۋ بويىنشا كەلىسسوزدەردىڭ كەلەسى كەزەڭىن وتكىزۋگە قاتىستى پىكىرىن بىلدىرە كەلە.
ونىڭ پايىمىنشا، ءبىرىنشى كەزەكتە تۇرعان لاڭكەستىك ۇيىمدارمەن كۇرەس مىندەتتەرىمەن قاتار قازىردىڭ وزىنەن باستاپ سوعىستان كەيىنگى سيريانى ودان ارى دامىتۋدا سيريالىق بيلىك پەن وپپوزيتسيا اراسىنداعى ءوزارا قارىم- قاتىناستى دۇرىس جولعا قويۋعا دەن قويۋ قاجەت.
«سيريادا باشار اساد لاڭكەستەرمەن سوعىس جۇرگىزىپ جاتسا دا ول جاقتا كونفەسسياارالىق كەلىسىمنىڭ دە بار ەكەندىگىن ەسكەرۋ قاجەت. ەرتە مە، كەش پە، ايتەۋىر بۇل باعىتتا دا كەلىسسوزدەر جۇرگىزۋگە تۋرا كەلەدى. سيريا تاريحىندا الاۆيتتەر مەن سۇننيتەردىڭ بەيبىت جاعدايدا ءومىر سۇرگەن كەزدەرى دە بولعان. دەگەنمەن، قازىرگى جاعدايدا ءدىني ماسەلە سيرياداعى تۇراقسىزدىقتىڭ تۇتاندىرعىشى دا بولا الادى. بۇل رەتتە قازاقستاننىڭ كونفەسسياارالىق كەلىسىم تاجىريبەسى سوعىستان كەيىنگى سيريا ءۇشىن پايدالى بولار ەدى»، - دەدى ورلوۆ. سونىمەن قاتار ساراپشى سيريا ماسەلەسى بويىنشا كەلىسسوزدەردىڭ وتكىزۋ مەرزىمىنە قاتىستى دا پىكىر ءبىلدىرىپ، ونىڭ 2017 -جىلدىڭ قاڭتار- اقپان ايلارىندا ورىن الۋى مۇمكىن ەكەندىگىن ايتتى.
«سيريا بويىنشا بەيبىت كەلىسسوزدەردىڭ قاجەت ەكەندىگى ءسوزسىز. بۇل رەتتە كەزدەسۋدىڭ ناتيجەلىلىگى كەلىسسوزدەر پروتسەسسىنە بارلىق قاتىسۋشىلارعا، ونىڭ ىشىندە امەريكالىق تاراپقا دا بايلانىستى بولادى. دەگەنمەن، بۇل رەتتە ەڭ باستى مىنانى ءتۇسىنۋ قاجەت: قازىر ا ق ش مەملەكەتتىك دەپارتامەنتى نە بولسا سونى ماقۇلداي الادى. ءبىراق، مۇنىڭ بارلىعى دا دونالد ترامپ ۇلىقتالعاننان كەيىن عانا مانگە يە. سوندىقتان كەلىسسوزدەردى باستاۋعا بارىنشا وڭتايلى داتا كەلەسى جىلدىڭ قاڭتار ايىنىڭ سوڭى نەمەسە اقپان ايىنىڭ باسى»، - دەدى ورلوۆ.
اۆتور: مارلان جيەمباي
