تەگىن باسپانا العىڭىز كەلسە - ۋنيۆەرسياداعا بيلەت ساتىپ الىڭىز

استانا. قازاقپارات - تەگىن ەكى بولمەلى ءۇي العىڭىز كەلسە، ۋنيۆەرسياداعا بيلەت ساتىپ الىپ، ۇتىسقا قاتىسىڭىز.

مۇنداي اقپاراتتى الماتى تورىندە وتەتىن 2017-جىلعى 28-دۇنيەجۇزىلىك قىسقى ۋنيۆەرسياداعا دايىندالۋ جانە وتكىزۋ جونىندەگى ديرەكسيا ءوزىنىڭ رەسمي سايىتىندا جاريا ەتتى، دەپ حابارلايدى «قازاقپارات» ح ا ا ءتىلشىسى.

18 جاستان اسقان كەز كەلگەن ادام ۋنيۆەرسيادا ويىندارىنىڭ بيلەتىن ساتىپ الىپ، ۇتىس ويىنى ارقىلى الماتىدان ەكى بولمەلى پاتەر جانە وزگە دە باعالى سىيلىقتارعا يە بولا الادى.

پاتەردەن بولەك، نوۋتبۋك، سمارتفون، پلانشەت، تۇرمىستىق تەحنيكا، سونداي-اق، 2017-جىلى ساپپورودا وتەتىن ازيا ويىندارىنا 2 بيلەت ويناتىلاتىن بولادى.


ۇتىس ويىنى ەكى كەزەڭنەن تۇرادى. ءبىرىنشى كەزەڭدە 2016-جىلدىڭ 11- قاراشاسىنا دەيىن ساتىپ الىنعان بيلەتتەر قاتىسسا، ەكىنشى كەزەڭدە 2017-جىلدىڭ 8- اقپانىنا دەيىن ساتىپ الىنعان بيلەتتەردىڭ بارلىعى قاتىسادى.

وندا ساتىپ الىنعان بيلەتتىڭ بىرەگەي 9 ساندى ءنومىرى وينالاتىن بولادى. ۇتىستىڭ شارتى ۇتىسقا قاتىسۋشىنىڭ جاسى 18 دەن اسقان بولۋى ءتيىس. سونداي-اق، تەگىن تاراتىلعان بيلەتتەر مەن ارنايى شاقىرىلعان قوناقتاردىڭ بيلەتتەرى ۇتىسقا قاتىستىرىلمايدى. ۇتقان بيلەت ءنومىرىن انىقتايتىن ۇتىس ويىنىنا ارنايى كوميسسيا باقىلاۋ جۇرگىزەدى.

بيلەتتەر الماتى (ب. شولاق اتىنداعى سپورت سارايى، رەسپۋبليكا سارايى، مەملەكەتتىك سيرك، مەلومان كاسسالارىندا) جانە استانا (حان شاتىرداعى، «كەرۋەن» ساۋدا ورتالىعىنداعى، «مەچتا» ساۋدا ۇيىندەگى مەلومان كاسسالارىندا، MyTown كەڭسەسىندە) قالالارىندا ساتىلادى. سونداي-اق، ولاردى www.almaty2017.com, www.fisuticket.com, www.kassir.kz, www.biletiastana.kz سايتتارىندا ونلاين ارقىلى ساتىپ الۋعا دا بولادى.

اۆتور: كۇنسۇلتان وتارباي