ماسكەۋ سپورتشىلارىنىڭ دوپينگ قابىلداعانىن مويىندادى

استانا. قازاقپارات - رەسەي ءبىرىنشى رەت جىلدار بويى رەسەيلىك سپورتشىلار - وليمپيادا چەمپيوندارىنىڭ دوپينگ قولدانعانىن جاسىرىپ كەلگەنىن مويىندادى.

بۇل تۋرالى New York Times گازەتىندە جاريالانعان رەسەيدىڭ دوپينگكە قارسى اگەنتتىگى ديرەكتورىنىڭ مىندەتىن اتقارۋشى اننا انتسەلوۆيچتىڭ سۇحباتىندا ايتىلادى.

باسىلىمنىڭ جازۋىنشا، انتسەلوۆيچ دوپينگتى قولداۋ باعدارلاماسىنا پۋتيننىڭ نەمەسە ونىڭ جاقىن ادامدارىنىڭ قاتىسى بار دەگەن پىكىردى جوققا شىعاردى.

انتسەلوۆيچ باتىستا وتكەن جىلدىڭ مامىرىنان بەرى پايدا بولعان اقپاراتتى، اسىرەسە ماسكەۋدەگى دوپينگكە قارسى زەرتحانانىڭ بۇرىنعى ديرەكتورى، قازىر ا ق ش- تا تۇراتىن گريگوري رودچەنكوۆ سپورتشىلارعا دوپينگ بەردى جانە سوچي وليمپياداسىندا رەسەيلىك سپورتشىلاردىڭ دوپينگ تابىلعان سىنامالارىن جويعان دەگەن پىكىردى راستادى.

ول فەدەرالدىق قاۋىپسىزدىك قىزمەتىنىڭ قىزمەتكەرلەرى وليمپياداعا قاتىسقان رەسەي سپورتشىلارىنىڭ دوپينگ تابىلعان سىنامالارىن جاسىرىپ، تازا سىنامالارمەن الماستىرىپ قويعانىن، بۇرىنعى سپورت ءمينيسترىنىڭ ورىنباسارى يۋري ناگورنىيدىڭ تانىمال سپورتشىلاردىڭ تىيىم سالىنعان پرەپاراتتاردى قولدانعانىن جاسىرۋعا بۇيىرعانىن راستادى. رەسەي بۇعان دەيىن مۇنىڭ بارلىعىن تەرىستەپ كەلگەن.

دۇنيەجۇزىلىك دوپينگكە قارسى اگەنتتىك (WADA) تاعايىنداعان كوميسسيانىڭ باسشىسى ريچارد ماكلارەن رەسەي مويىنداۋ ارقىلى WADA- مەن بايلانىسىن قالپىنا كەلتىرۋگە تىرىسىپ جاتىر دەيدى.

WADA ماسكەۋدەن تاياۋدا جۇرگىزگەن تەكسەرۋ قورىتىندىسىمەن كەلىسۋدى تالاپ ەتەدى. كەلىسكەن جاعدايدا عانا رەسەيدىڭ دوپينگكە قارسى قىزمەتىنە دوپينگ تەست جۇرگىزۋگە، ال سپورت مينيسترلىگىنە ەلدە حالىقارالىق جارىستار وتكىزۋگە قايتا رۇقسات بەرىلمەك.

New York Times-قا بەرگەن سۇحباتىندا رەسەيدىڭ جوعارى شەندى سپورت شەنەۋنىگى ۆيتالي سميرنوۆ رەسەيلىك سپورتشىلار جاسىرىن تۇردە دوپينگ قولدانباي باتىستىق سپورتشىلارمەن باسەكەگە تۇسە المايتىنىن ايتقان. ونىڭ سوزىنشە، باتىس ەلدەرىنىڭ سپورتشىلارىنا مەديتسينالىق تۇرعىدان انابوليتيكالىق ستەرويدتەردى قابىلداۋعا رۇقسات ەتكەن WADA رەسەيلىكتەردىڭ وسىعان ۇقساس پرەپاراتتاردى اشىق قولدانۋىنا رۇقسات ەتپەس ەدى.

«ازاتتىق»