ءسابينا التىنبەكوۆا ءوزىنىڭ ۆولەيبول كلۋبىن اشادى

استانا. قازاقپارات - قازاقستاندىق ۆولەيبولشى قىز، اقتوبە قالاسىنىڭ تۋماسى ءسابينا التىنبەكوۆا ءوزىنىڭ تۋعان قالاسىندا ۆولەيبول كلۋبىن اشپاق، - دەپ حابارلايدى «دياپازون».

سپورتشىنىڭ ايتۋىنشا، بۇل كلۋبتا ايەلدەر دە، ەر ادامدار دا جاتتىعا الادى. «ءبىز ايەلدەر اراسىنداعى كوماندالارعا جوعارعى ليگا مەن پرەمەر ليگا ۇيىمداستىرعىمىز كەلەدى. سونداي-اق، ءبىز وسى كلۋبتى ۆولەيبولمەن اينالىسقىسى كەلگەن كىشكەنتاي قىزداردىڭ ارمانىن ورىنداۋ ءۇشىن اشىپ جاتىرمىز»، - دەدى ءسابينا التىنبەكوۆا.

سونىمەن قاتار، سپورتشى باسىلىم تىلشىلەرىنە قازىرگى ۋاقىتتا «الماتى» كلۋبىنىڭ 23 جاسقا دەيىنگى قىزدارعا ارنالعان ۇلتتىق ليگاسىندا ونەر كورسەتىپ جۇرگەنىن ايتتى. التىنبەكوۆانىڭ ايتۋىنشا، وعان ۆولەيبولدى قويىپ، مودەل بولۋعا دا ۇسىنىستار كەلگەن، الايدا ول بۇدان باس تارتقان ەكەن. سەبەبى ءسابينا ءۇشىن سپورت ءبىرىنشى ورىندا. «مەن كىشكەنتاي كەزىمنەن باستاپ ءومىرىمدى سپورتمەن بايلانىستىرعىم كەلدى، جەتكىم كەلەتىن ماقساتتار كوپ»، - دەپ كەلتىرەدى باسىلىم سپورتشىنىڭ ءسوزىن.

ايتا كەتەيىك، ءسابينا التىنبەكوۆا 2014-جىلى ازيادا جاستار اراسىندا وتكەن چەمپيوناتتان سوڭ تانىمال بولا باستادى. قازىرگى ۋاقىتتا سپورتشىنىڭ Instagram جەلىسىندەگى جازىلۋشىلارىنىڭ سانى 610 مىڭنان اسقان. سونداي-اق، وسىعان دەيىن ءسابينا التىنبەكوۆانىڭ ءوز كيىم جەلىسىن شىعاراتىنى حابارلانعان بولاتىن. سپورتتىق كيىمدەردىڭ بۇل جەلىسىن ءسابينا التىنبەكوۆا وتاندىق Zibroo Sportswear ديزاينەرلىك كومپانياسىمەن بىرىگىپ ويلاستىرعان ەكەن. ايتا كەتەيىك، ريو ويىندارىنداعى قازاقستان قۇراماسىنىڭ كيىمدەرىن وسى كومپانيا دايىنداعان بولاتىن.