لۋكاشەنكونىڭ سامميتكە كەلمەۋى رەسەيمەن اراداعى پروبلەمالارعا بايلانىستى

استانا. قازاقپارات - رەسەيدىڭ سانكت- پەتەربۋرگ قالاسىندا وتكەن ەۋرازيالىق ەكونوميكالىق وداقتىڭ بەيرەسمي سامميتىنە بەلارۋس پرەزيدەنتى الەكساندر لۋكاشەنكو كەلگەن جوق.

رەسەيلىك بۇقارالىق اقپارات قۇرالدارىنىڭ مالىمەتىنە سەنسەك، بەلارۋس باسشىسىنىڭ سامميتكە كەلمەۋى وداقتىڭ جۇمىسىنا ەشبىر قاتىسى جوق. وسى ارەكەتپەن ول رەسمي كرەملگە ءوز تالاپتارىن ورىنداتۋدى كوزدەيدى، دەپ حابارلايدى قازاقپارات رەسەيلىك «ر ب ك» مەديا حولدينگىنە سىلتەمە جاساپ.

رەسمي اقپاراتقا سايكەس، مينسكىدەن لۋكاشەنكونىڭ سامميتكە كەلمەۋىنە قاتىستى تۇسىنىكتەمە كەلگەن جوق. بەلارۋس پرەزيدەنتىنىڭ باسپا ءسوز حاتشىسى دا ەشتەڭە ايتپادى. ال رەسەي باسشىسىنىڭ باسپا ءسوز حاتشىسى دميتري پەسكوۆتىڭ سوزىنە قاراعاندا، بەلارۋس جاعى لۋكاشەنكونىڭ كەلمەيتىنىن ەسكەرتكەن. دەگەنمەن، سامميتكە ەل پرەزيدەنتى قاتىسا الماسا، پرەمەر- مينيستر، يا بولماسا، باسقا ءبىر ۋاكىلەتتى تۇلعا كەلۋى ءتيىس. بەلارۋس بولسا، ەشكىمدى جىبەرمەدى.

«سامميتتى ۇيىمداستىرۋ جۇمىستارىنا جاقىن جۇرگەن دەرەككوزدىڭ مالىمەتىنە سايكەس، لۋكاشەنكونىڭ سامميتكە كەلمەۋى رەسەيمەن اراداعى پروبلەمالارعا بايلانىستى. ءبىر جىلدان بەرى ماسكەۋ مەن مينسك رەسەيلىك گازدى بەلورۋسسياعا تاسىمالداۋ شارتتارى بويىنشا كەلىسە الماي كەلەدى. بۇگىندە بەلورۋسسيانىڭ «گازپروم» الدىنداعى قارىزى شامامەن 425 ميلليون دوللاردى («كوممەرسانت» گازەتىنىڭ اقپاراتى بويىنشا) قۇرايدى. سونداي- اق بەلارۋس جاعى گازدىڭ باعاسىن 1 مىڭ كۋب مەتر ءۇشىن 132 دوللاردان 73 دوللارعا دەيىن تومەندەتۋدى تالاپ ەتىپ وتىر. ەكى ەلدىڭ پرەزيدەنتتەرى مەن پرەمەر- مينيسترلەرى اتالعان ماسەلەنى بىرنەشە رەت تالقىلادى. سوڭعى رەت پۋتين مەن لۋكاشەنكو ماسكەۋدە قاراشا ايىندا كەزدەسكەن ەدى. الايدا ءبىر كەلىسىمگە كەلە المادى»، - دەپ جازدى ر ب ك.

بۇدان بولەك، بەلورۋسسيا مەن رەسەي اراسىندا سانكسيالىق تاۋارلارعا قاتىستى پىكىرتالاس قىزا ءتۇستى. ر ف اۋىل شارۋاشىلىعى قاداعالاۋ قىزمەتىنىڭ باسشىسى سەرگەي دانكۆەرتتىڭ ايتۋىنشا، ۋكراينا ارقىلى كەلەتىن ەۋروپالىق وداق ەلدەرىنىڭ تاۋرلارىنا تىيىم سالۋ شارالارىن بەلورۋسسيا ءوز مۇددەسى ءۇشىن پايدالانىپ وتىر.

 ايتا كەتەيىك، سانكت- پەتەربۋرگ قالاسىندا ەۋرازيالىق ەكونوميكالىق وداق پەن ۇجىمدىق قاۋىپسىزدىك شارتى ۇيىمىنىڭ بەيرەسمي سامميتتەرى وتكەن بولاتىن. بۇعان دەيىن پرەزيدەنتتەر اتالعان ۇيىمداردىڭ بارلىق جيىندارىنا تولىق قۇرامدا جينالىپ تۇرعان. الايدا بەلارۋس پرەزيدەنتى ەكى جيىنعا قاتىسقان جوق. 2009 - جىلى ۇ ق ش ۇ سامميتىنە كەلمەگەندە لۋكاشەنكو ونىمەن «ءسۇت سوعىسىنا» ءوز قارسىلىعىن بىلدىرگەن. سول كەزدە رەسەي ءسۇت ونىمدەرىن يمپورتتاۋعا تىيىم سالعان بولاتىن. ال 2014 - جىلى بەلارۋس باسشىسى رەسەي مۇناي- گازدىڭ باج سالىعى بويىنشا جەڭىلدىك جاسامايىنشا ەۋرازيالىق ەكونوميكالىق وداق تۋرالى كەلىسىمگە قول قويمايتىنىن ەسكەرتكەن.

اۆتور: ارمان اسقاروۆ