شىمكەنتتە تانىمال سۋرەتشى كەرىمباي قىستاۋبايدىڭ كورمەسى ءوتتى

استانا. قازاقپارات - بۇگىن شىمكەنتتە وبلىستىق ادەت- عۇرىپ جانە سالت-ءداستۇر ورتالىعىندا قازاقستاننىڭ ەڭبەك سىڭىرگەن قايراتكەرى، سۋرەتشى كەرىمباي قىستاۋبايدىڭ «تاۋلاردىڭ تاعدىرى» اتتى جەكە شىعارماشىلىق كورمەسى ۇيىمداستىرىلدى.

بەينەلەۋ ونەرىندە وزىندىك قولتاڭباسى بار، قىلقالام شەبەرىنىڭ كورمەسىنە وبلىس اكىمى جانسەيىت تۇيمەبايەۆ ارنايى قاتىسىپ، جينالعاندارعا ريزاشىلىعىن ءبىلدىردى، دەپ حابارلايدى و ق و اكىمدىگىنىڭ باسپا ءسوز قىزمەتى. «بۇل تۋىندىلار ەرتەڭىمىز ءۇشىن ۇمىتىلماس تاريح. قىلقالاممەن تاريحىمىزدى بەينەلەپ، بەدەرلەۋدە قىستاۋباي كەرىمبايدىڭ ونەرىنە ءتانتى بولماسقا شارا جوق. شىعارماشىلىعىڭىزعا شالقار شابىت تىلەيمىن. بەكزات ونەردىڭ بەكزاداسىنا اينالىڭىز»، - دەدى وبلىس باسشىسى.

شارانىڭ ماقساتى - جاستاردىڭ سالت-ءداستۇرىمىز بەن ادەت-عۇرىپىمىزعا دەگەن سۇيىسپەنشىلىگىن ارتىرىپ، كوركەم شىعارمالار ارقىلى ەستەتيكالىق تاربيە بەرۋ. سۋرەتشى شىعارمالارىنداعى سىرلى بوياۋلار وتە نازىك تە جۇمساق رەڭكپەن ۇيلەسىمىن تاپقان. اۆتوردىڭ مىنەزىنە ءتان جۇمساقتىق كارتيناداعى بەينەلەردەن دە انىق بايقالادى. اسىرەسە، ونىڭ ەلىمىزدىڭ سۇلۋ تابيعاتتارى تاقىرىبىنداعى «حان ءتاڭىرى»، «الاتاۋ اسۋلارى»، «اق قارلى الاتاۋ»، «اۋىلىم»، «كۇز سوناتاسى»، «بالالىق شاققا ساياحات»، «تاۋ شىڭى»، «كەمپىرقوساق»، «اڭىزعا ساياحات» سىندى تۋىندىلارى ايقىندىلىعىمەن، كومپوزيتسيالىق ويلارىنىڭ تەرەڭدىگىمەن ەرەكشەلەنەدى.

ايتا كەتەيىك، كەرىمباي ىسا ۇلى بۇگىندە و. تاڭسىقبايەۆ اتىنداعى الماتى ساندىك- قولدانبالى ونەر كوللەدجىنىڭ ديرەكتورى قىزمەتىن ابىرويمەن اتقارىپ كەلەدى. ول ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ پروفەسسورى، قازاقستان سۋرەتشىلەر وداعىنىڭ مۇشەسى.