19:52, 29 - جەلتوقسان 2016 | GMT +5
نەپالدا پىلدەر شابۋىل جاساعان ەلدى مەكەنگە اسكەريلەردى شاقىرۋعا تۋرا كەلدى
استانا. قازاقپارات - نەپالدىڭ وڭتۇستىك- باتىسىندا پىلدەردىڭ شابۋىلىنان كەمىندە ءبىر ادام قازا تاۋىپ، تاعى بىرنەشە ادام جاراقات الدى، دەپ حابارلايدى AP.
وقيعا پراسەني ەلدى مەكەنىندە ورىن الدى. پىلدەر ادامدار تۇراتىن مەكەنگە 28 -جەلتوقسان كۇنى، سارسەنبىدە تاڭەرتەڭگىلىك ءالى قاراڭعى سەيىلە قويماعان جانە تۇمان تۇسكەن ساتتە شابۋىل جاسادى، دەپ ءمالىم ەتتى جۋرناليستەرگە جەرگىلىكتى اكىمشىلىك وكىلدەرى.
ولاردىڭ ايتۋلارىنشا، بيلىك تەز ارادا ارنايى ماقساتتاعى ءبولىم قىزمەتكەرلەرىن اۋىلعا جىبەرىپ، پىلدەردى ورمانعا قۋدى. زارداپ شەككەن تۇرعىندار اۋرۋحانالارعا جاتقىزىلدى. پراسەني اۋىلى نەپالداعى تانىمال "بارديا" ۇلتتىق پاركىنىڭ ماڭىندا ورنالاسقان. مۇندا پىلدەر، جولبارىستار، ءمۇيىزتۇمسىقتار مەن كوپتەگەن باسقا دا جانۋارلار بار. دەگەنمەن جانۋارلاردىڭ شابۋىلىنان قازا تاپقان وقيعالار ءجيى كەزدەسپەيدى.
