اكسيا جەڭىمپازىنا اۆتوموبيل كىلتى تاپسىرىلدى

استانا. قازاقپارات - بۇگىن ق ر ق م مەملەكەتتىك كىرىستەر كوميتەتىندە ۆەدومستۆو ءتوراعاسى ارداق تەڭگەبايەۆ «چەكتى تالاپ ەت سىيلىقتى ۇتىپ ال!» اكسياسىنىڭ جەڭىمپازى راۆيل حايرۋلينگە اۆتوموبيلدىڭ كىلتىن تاپسىردى.

بۇل تۋرالى اتالعان ۆەدومستۆودان ءمالىم ەتتى، دەپ حابارلايدى قازاقپارات. ەستەرىڭىزگە سالساق، اعىمداعى جىلعى 23 -جەلتوقساندا مەملەكەتتىك كىرىستەر كوميتەتىندە «چەكتى تالاپ ەت سىيلىقتى ۇتىپ ال!» اكسياسى بويىنشا اقتىق سىن ءوتتى. وندا پەتروپاۆل قالاسىنىڭ تۇرعىنى راۆيل حايرۋليننىڭ 2016 -جىلعى 22 -قازاندا جىبەرگەن چەگى جەڭىمپاز دەپ تانىلدى. بۇگىن ول جۇبايىمەن پەتروپاۆل قالاسىنان «اتامەكەن» ۇ ك پ بيزنەس قاۋىمداستىعى اتىنان ۇسىنىلعان ۇتىسى Chevrolet ماركالى اۆتوكولىكتى الىپ كەتۋگە كەلدى. حايرۋلين 596 تەڭگە كولەمىندەگى چەك وعان شىن مانىندە باقىتتى بولعانى جانە اكسياعا قاتىسۋى مەن جەڭىسكە جەتۋى جايلى مالىمەتتەرمەن ءبولىستى.

ونىڭ ايتۋىنشا، بۇل اكسيا باستالعاننان بەرى قاتىسىپ كەلەدى. ەڭ ءبىرىنشى تۇبىرتەكتى 2016 -جىلدىڭ 4 -قازانىندا جىبەرگەن. اكسيا اياقتالعان ۋاقىتقا دەيىن 89 تۇبىرتەك جولداعان. «چەكتى تالاپ ەت سىيلىقتى ۇتىپ ال!» اكسياسىن م ك ك مەن «اتامەكەن» ۇ ك پ بىرلەسىپ اعىمداعى جىلعى 1 -قازان مەن 15 -جەلتوقسان ارالىعىندا وتكىزگەن بولاتىن. 27 مىڭداي قازاقستاندىق اكسياعا قاتىسىپ، «Wipon» موبيلدى قوسىمشاسى ارقىلى مەملەكەتتىك كىرىستەر ورگاندارىنا 1,5 ميلليوننان اسا فيسكالدى چەك جىبەرگەن.

ايتا كەتەرلىگى، اكسيا وتكەن ەكى جارىم اي ىشىندە رەسپۋبليكا بويىنشا 120 دان اسا قۇندى جۇلدە ۇتىسقا سالىندى، ونىڭ ىشىندە تۇرمىستىق جانە ورگتەحنيكا، بايلانىس قۇرالدارى مەن ىدىس- اياق بار. چەكتەردىڭ ەڭ كوپ سانىن وڭتۇستىك قازاقستان، شىعىس قازاقستان وبلىستارى مەن الماتى قالاسىنىڭ تۇرعىندارى جىبەرگەن. اتالعان اكسيا وسىمەن ەكىنشى جىل وتكىزىلىپ وتىر. ول كەلەسى جىلى دا ءوز جالعاسىن تابادى.

اۆتور: مارلان جيەمباي