كۇيەۋىم «ەكىنشىسىن السام» دەيدى

 استانا. قازاقپارات - ايرانداي ۇيىعان وتباسىم، اۋزىندا اللاسى، جۇرگىندە يمانى بار ارىستاي ازاماتىم مەن بولاشاعىنان ءۇمىت كۇتتىرگەن ءۇش ۇلىم - ايەل باقىتىن، انا باقىتىن سەزىنىپ، اللانىڭ مەيىرىنە بولەنىپ، الاڭسىز كۇن كەشۋىمە سەبەپكەر بولدى.

كۇيەۋىم شاعىن دۇكەن مەن كولىك جۋاتىن ورتالىق اشىپ، سونىمەن اينالىسادى. مەن تاپقان تابىسىنىڭ بەرەكەسىن كىرگىزىپ، ۇيدە بالالارىمىزدى باعىپ وتىرامىن. انە- مىنە دەپ ءتورتىنشىمىزدى كۇتىپ جۇرگەنبىز. ءبىر كۇنى كۇيەۋىم كەلىپ:

- اقىلداساتىن اڭگىمە بولىپ تۇر.. . جاقىندا ءبىر كەلىنشەكتىڭ كۇيەۋى جول اپاتىنان قايتىس بولدى. كەلىنشەك بۇعاناسى بەكىمەگەن 4 بالاسىمەن جەسىر قالدى، جۇمىسى دا جوق. وعان ارقا سۇيەر ەركەك كەرەك، ەكىنشى ايەلدىككە الىپ، قاراسىپ تۇرايىن. ساۋابى مول ءىس قوي.. . - دەپ باستاپ كەلە جاتىر ەدى، قىزعانىشىم بەتىمە شىعىپ، جولداسىمدى ءارى قاراي سويلەتپەدىم. مەنىڭ اياعىم اۋىر ەكەنىن ەسكەرگەن ول دا اڭگىمەسىن توقتاتتى. تەك، ويلانۋىمدى ءوتىندى. قالاي ويلانسام دا، ەرىمدى باسقا ايەلمەن ءبولىسۋ دەگەن شەشىمگە كەلىسە المادىم. كۇيەۋىمنىڭ وزگە ايەلدى قۇشىپ، ءسۇيۋى، ماعان ايتقان سوزدەرىن وعان ايتۋى.. . بۇل تۋرالى ويلاۋدىڭ ءوزى اۋىر. سوڭىندا:

- مەن ەكىنشى ايەل الۋىڭا قارسىمىن، ەگەر ول ايەلدى الاتىن بولساڭ، مەن كەتەمىن! بالا تۋىپ بەرە الماسام جارار ەدى، ەكىنشى ايەلدى قانداي سىلتاۋمەن الماقشىسىڭ؟ - دەپ ىشىمدەگىنى اقتارىپ تاستادىم. كۇيەۋىم ول ايەلدى ماعان قاناعاتتانباعاننان ەمەس، ساۋاپ ءۇشىن الامىن دەپ قانشا ايتسا دا، تۇك شىقپاسىن ءتۇسىندى دە، مەنىڭ ىشىمدەگى بالانى ويلاپ، ول ايەلگە ۇيلەنبەدى. كۇندەر جىلجىپ وتە بەردى، ومىرگە ءسۇپ- سۇيكىمدى قىزىمىز كەلدى. ءسابيىمىز ءبىر جاستان اسقاندا اكەسىنىڭ دەنساۋلىعى سىر بەرىپ، مازاسىزدانا باستادى. «مەنينگيت» اۋرۋىنا شالدىققان جولداسىم، كوپ ۇزاماي ومىردەن وزدى. ول كەتكەن سوڭ اينالام تۇماندانىپ، ءومىردىڭ كولەڭكەلى تۇستارى قىلاڭ بەرە باستادى. ءوزى كەتكەن سوڭ، كاسىپتەرى دە قۇلدىراپ، بانكروتقا ۇشىرادى. مەن جۇمىسقا شىعايىن دەسەم، قۇشاعىمدا ەمىزۋلى بالام بار. اعامنىڭ ۇيىنە كوشىپ بارۋىما تۋرا كەلدى. اعامنىڭ بەس بالاسىنا مەنىڭ ءتورت بالام قوسىلدى، ۇيدەگى جەڭگەمە بۇل ۋ- شۋ ۇناماعانى بايقالىپ ءجۇردى. سودان، پاتەر جالداپ بولەك شىقتىم. الايدا، پاتەراقىسىن تولەۋگە، تاماققا اقشا تابۋعا مەن دارمەنسىز ەدىم، بولەك تۇرعانىم بولماسا، ءبارىبىر اعامنىڭ موينىنا ماسىل بولۋعا تۋرا كەلدى. كۇندەر وتە بەردى. اعاما دا وڭاي سوعىپ جۇرمەگەنى جۇدەۋ جۇزىنەن كورىنەتىن. كەلىنشەگىن دە رەنجىتكىسى كەلمەيدى، باۋىرىن دا قيىندىقتا قالدىرىپ كەتە المايدى.. .

ءبىر كۇنى اعام مەنى وتىزدان اسقان ءبىر كىسىمەن تانىستىردى. قاتتى قۋاندىم، تانىسقان ازاماتتى جىگىتتىڭ تورەسىنە بالادىم. بايسالدى، يماندى ازامات ءسوزىنىڭ سوڭىندا:

- ۇيدە ءۇش بالامنىڭ اناسى، اياۋلى جارىم بار، ونىڭ الدىنان وتكەنىم ابزال. مەن سىزگە ءبىر جاۋابىن اعاڭىز ارقىلى ايتامىن، - دەدى. توبەمنەن بىرەۋ مۇزداي سۋ قۇيىپ جىبەرگەندەي مەڭ- زەڭ كۇيگە ءتۇستىم. مەنىڭ تاعدىرىمنىڭ قاي ارناعا اۋىسۋى اۋەلى اللانىڭ، سودان سوڭ بەيتانىس كەلىنشەكتىڭ شەشىمىنە بايلانىستى بولىپ تۇردى. كەزىندە جولداسىم رۇقسات سۇراعاندا ءبىر بەيباق ءدال مەن سەكىلدى قينالعان ەكەن عوي.. .

سول كەزدە ىستەگەن ىسىمە قاتتى وكىنىپ، ۇيالىپ، اللا تاعالادان كەشىرىم سۇرادىم. تۇنىمەن يستيحارا نامازىن وقىپ، كەلىنشەكتىڭ كۋيەۋىنە رۇقسات بەرۋىن تىلەدىم. تاڭەرتەڭ الگى ازامات كەلىنشەگىمەن بىرگە كەلىپتى. ۇيگە كىرگەن سوڭ، كەلىنشەگىن قالدىرىپ، كۇيەۋى سىرتقا شىعىپ كەتتى. ال مەن نە ايتار ەكەن دەپ قوبالجىپ تۇرعانىمدا، جاپ- جاس ءارى وتە ادەمى كەلىنشەك ماعان جاقىن كەلىپ، قولىمنان قىسىپ:

 -  اپكە! ءبىزدىڭ ماقساتىمىز ءبىر! ءبىز قىزعانىشقا بوي الدىرماي، ءجانناتقا دەگەن ۇمىتپەن، وسى ازاماتتى سىيلاي، قادىرلەي بىلەيىك! اللا قالاسا، بىرىگىپ، ەر ازاماتىمىزدىڭ رازىلىعىن ىزدەيىك، جاعدايىن جاساپ، جان تىنىشتىعىن الۋىن ويلايىق، يمانىنىڭ جارتىسى بولايىق. ءبىر ەركەكتى جالعىز قۇشاقتاپ جاتقانىم ءۇشىن دە سۇرالامىن عوي، ودان دا ساۋاپ جيناعانىم ابزال، - دەدى.

 ەكەۋمىز قوسىلىپ ءبىراز جىلادىق. نە دەگەن كەڭ جۇرەك، نەتكەن يمان! مەيىرىمى شەكسىز اللا تاعالا مەنى كەزىندەگى كەمشىلىگىم ءۇشىن كۇيەۋىمدى الىپ جازالاپ ەدى، ەندى تاۋبەمدى قابىل ەتىپ، وسىنداي وتباسى سىيلادى.

بۇل وقيعانى مەن سەكىلدى بىلمەستىكپەن اسىعىس شەشىم شىعارىپ جۇرگەن سىڭلىلەرىمە ساباق بولسىن دەپ سىزدەرگە جولداپ وتىرمىن.

P. S. ماقالادا ايتىلعاندار رەداكتسيانىڭ كوزقاراسىن بىلدىرمەيدى!

muslim.kz