يسلام كارىموۆتىڭ ەسكەرتكىشىن جاساۋعا حالىقارالىق بايقاۋ جاريالاندى

استانا. قازاقپارات - وزبەكستاننىڭ تۇڭعىش پرەزيدەنتى يسلام كارىموۆكە تاشكەنتتە ەسكەرتكىش تۇرعىزۋعا وراي حالىقارالىق شىعارماشىلىق بايقاۋ جاريالاندى.

بۇل تۋرالى قازاقپارات اتالعان ەلدىڭ قازاقستانداعى ەلشىلىگىنە سىلتەمە جاساپ حابارلايدى. بايقاۋ 2016-جىلعى 2- جەلتوقسانداعى وزبەكستان پرەزيدەنتىنىڭ 2667№ قاۋلىسى مەن مينيسترلەر كابينەتىنىڭ تاپسىرماسىنا سايكەس وتكىزىلەدى.

وسىعان وراي بايقاۋ وتكىزۋدىڭ ەرەجەسى ازىرلەنگەن. ونىڭ ماقساتى تاۋەلسىز وزبەكستاننىڭ نەگىزىن قالاۋشى، كورنەكتى مەملەكەت قايراتكەرى، وزبەك حالقىنىڭ كوشباسشىسى يسلام كارىموۆتىڭ ەسكەرتكىشىن جاساۋ ءۇشىن ۇزدىك جوبانى ىرىكتەۋ.

ەسكەرتكىش تاشكەنت قالاسىندا ورناتىلاتىن بولادى. بايقاۋ شارتىنا سايكەس، قاتىسۋشىلار وزبەكستاننىڭ كوركەمونەر اكادەمياسىنىڭ جانە ۇيىمداستىرۋ كوميتەتىنىڭ رەسمي سايتىنا كەلەسى قۇجاتتار مەن اقپاراتتىق ماتەريالداردى ورنالاستىرۋى قاجەت: بايقاۋ باعدارلاماسى مەن تالاپتارى، يسلام كارىموۆتىڭ ءومىرى مەن قىزمەتى تۋرالى تاريحي انىقتامالار مەن ىرىكتەلگەن سۋرەتتەرى، ەسكەرتكىش ورنالاستىرىلاتىن ورىن، ۋچاسكە سۋرەتى، اۋماعىنىڭ باس جوسپارى.

بايقاۋعا ارنالعان جۇمىستار قازىلار القاسىنا 2017-جىلدىڭ 31- ناۋرىزىنا دەيىن ۇسىنىلۋى قاجەت. حالىقارالىق شىعارماشىلىق بايقاۋىنىڭ ناتيجەسى وزبەكستاننىڭ كوركەمونەر اكادەمياسىنىڭ جانە ۇيىمداستىرۋ كوميتەتىنىڭ رەسمي سايتىندا جاريا ەتىلەتىن بولادى.

ايتا كەتەرلىگى، يسلام كارىموۆتىڭ ەسكەرتكىشى ماسكەۋدە، وزبەكستان كونسۋلدىق بولىمشەسىنە تاقاۋ ورنالاسقان گۇلزاردا دا بوي كوتەرۋى مۇمكىن. وزبەكستاننىڭ ءبىرىنشى پرەزيدەنتى كارىموۆ اعىمداعى جىلى 78 جاسقا قاراعان شاعىندا ومىردەن وزدى. ول مۇسىلمان داستۇرىمەن تۋعان جەرى سامارقاندتا جەرلەندى.

اۆتور: مارلان جيەمباي