جىل قورىتىندىسى: بيىل قازاق سپورتى قانداي بيىكتەردى باعىندىردى

استانا. قازاقپارات - ەندى ساناۋلى كۇننەن كەيىن، مەشىن جىلىن دا تاريح قويناۋىنا اتتاندىرامىز. جاڭا جىلدىڭ تابالدىرىعىن اتتاماس بۇرىن، وتكەن كۇندەردى وي ەلەگىنەن وتكىزبەۋ مۇمكىن ەمەس. ولاي بولسا، بۇگىن مەشىن جىلعى سپورتتاعى جەتىستىكتەرىمىزدى، ەل نامىسىن قورعاعان سپورتشىلارىمىزدىڭ قانداي تابىسقا قول جەتكىزگەنىن ءبىر شولىپ شىعايىق.

 بيىل سپورت جارىستارىنىڭ تورەسى وليمپيادا ويىندارى ءوتتى. برازيليانىڭ ريو- دە- جانەيرو قالاسىندا وتكەن بايراقتى باسەكەدە جەرلەستەرىمىز 3 التىن، 5 كۇمىس، 9 قولا مەدال جەڭىپ الىپ، جالپى ەسەپتە 22-ورىندى يەلەنگەنى وسى جىلدىڭ باستى جاڭالىعى دەسەك ارتىق ايتقانىمىز ەمەس. سونداي- اق، وزگە دە حالىقارالىق سىنداردا كىمدەر ەل بايراعىن كوتەرىپ، ءانۇرانىمىزدى اسقاقتاتتى؟ كىمدەر ەل مەرەيىن تاسىتتى؟ قاي سپورت تۇرىنەن جۇلدەگەر اتاندىق؟ ەندى وسى سۇراقتارعا جاۋاپ ىزدەپ كورەيىك.

 وليمپيادادا ابىرويىمىز تاسىدى

بيىلعى جىلدىڭ باستى جارىسى - ريو- دە- جانەيرو وليمپياداسى. ءتورت جىلدا ءبىر كەلەتىن باستى دودادا جەرلەستەرىمىز قانشا مەدال العانىن ءسوز باسىندا ايتىپ وتتىك. تامىزدىڭ 5-21 ارالىعىندا برازيليانىڭ ريو- دە- جانەيرو قالاسىندا وتكەن دۇنيەجۇزىلىك دوداعا ەلىمىزدەن 107 سپورتشى قاتىستى. سپورتتىڭ 17 تۇرىنەن باق سىناعان قىز- جىگىتتەرىمىز قورجىنىمىزعا 3 التىن، 5 كۇمىس، 9 قولا مەدال سالىپ، كوماندالىق ەسەپتە 22-ورىننان كورىندى. بۇل ارينە، وسىدان ءتورت جىل بۇرىنعى لوندون وليمپياداسىنداعى ناتيجەمىزدەن الدەقايدا تومەن كورسەتكىش. دەگەنمەن، جۇلدە سانى جاعىنان بيىل قازاقستان سپورتشىلارى جالپى 17 مەدال جەڭىپ الىپ، رەكورد جاڭارتتى.

 ريو- دە- جانەيرو وليمپياداسى كەزىندە قازاقستان سپورت تاريحىنا التىن ارىپپەن جازىلاتىنداي بىرنەشە وقيعا تىركەلدى. ايتالىق، اۋىر اتلەتيكادان تۇڭعىش رەت قازاق قىزى جازيرا جاپارقۇل وليمپ شىڭىنا تۋ تىگىپ، كۇمىس مەدالعا يە بولدى. قازاقستاننىڭ سپورت تاريحىندا وليمپيادا ويىندارىندا مەدال العان بويجەتكەندەرىمىز جەتىپ ارتىلادى. الايدا، سول بويجەتكەندەردىڭ اراسىندا ءوزىمىزدىڭ قاراكوز قارىنداستارىمىزدىڭ جوقتىعى جانىمىزعا باتىپ جۇرگەن ەدى. سول ولقىلىقتىڭ ورنىن ءبىرىنشى بولىپ، اۋىر اتلەتيكادان الەمنىڭ ەكى دۇركىن كۇمىس جۇلدەگەرى جازيرا جاپارقۇل تولىقتىردى. سونىمەن قاتار كۇرەس تۇرلەرىنەن دە بيىلعى وليمپيادا ويىندارىندا تۇڭعىش رەت قازاق قىزى وليمپيادا ويىندارىنىڭ جەڭىس تۇعىرىنان كورىندى. ول - ەلميرا سىزدىقوۆا.

ايەلدەر كۇرەسىندە 69 كەلى سالماقتا كۇرەسىپ، قولا جۇلدەنى ەل قورجىنىنا سالدى. ەلميرا وليمپيادا ويىندارىنىڭ مەدالىن تاققان تۇڭعىش بالۋان قىز رەتىندە تاريحىمىزعا تاڭبالاندى. سونداي- اق، بىلعارى قولعاپ كيگەن قازاق قىزدارىنىڭ اراسىندا 75 كەلى سالماقتا جۇدىرىقتاسقان داريعا شاكىموۆا قاراكوز قىزدارىمىزدىڭ اراسىندا تۇڭعىش بولىپ، وليمپيادا مەدالىن جەڭىپ الدى. ريو- دە- جانەيرودا كوڭىلگە مەدەۋ بولعانى - ەلميرا سىزدىقوۆا، جازيرا جاپارقۇل، داريعا شاكىموۆا سىندى قازاقتىڭ قارشاداي عانا قىزدارى وليمپيادا مەدالىن جەڭىپ الۋلارى بولدى. سۋ سپورتىندا وسىعان دەيىن وليمپيادا مەدالىنە قول جەتكىزبەگەن ەدىك. ريو- دە- جانەيرودا سول ولقىلىقتىڭ ورنىن دميتريي بالاندين تولتىردى.

 2014 -جىلى جازعى ازيا ويىندارىندا جاپونيا مەن كورەيا سپورتشىلارىن جولدا قالدىرىپ، ءۇش بىردەي قاشىقتىقتا وزا شاپقان بالاندين برازيليادا تاعى دا الدىنا جان سالمادى. بالانديننىڭ التىن مەدالى - قازاقستان سپورتى تاريحىنداعى سۋ سپورتىنان العان تۇڭعىش مەدال. ريو- دە- جانەيرو وليمپياداسىنىڭ قاھارماندارى تاعى ءبىر اتاپ وتسەك ارتىق بولماس. سونىمەن بيىلعى جىلدىڭ باستى باسەكەسىندە جەڭىمپاز بەن جۇلدەگەر اتانعان سپورتشىلار: دانيار ەلەۋسىنوۆ (بوكس)، نيجات راحيموۆ (اۋىر اتلەتيكا)، دميتري بالاندين (ءجۇزۋ) - التىن مەدال؛ ادىلبەك نيازىمبەتوۆ (بوكس)، ۆاسيلي ليەۆيت (بوكس)، ەلدوس سمەتوۆ (دزيۋدو)، جازيرا جاپارقۇل (اۋىر اتلەتيكا)، گۇزەل مانيۋروۆا (ايەلدەر كۇرەسى) - كۇمىس مەدال؛ ەلميرا سىزدىقوۆا (ايەلدەر كۇرەسى)، ەكاتەرينا لاريونوۆا (ايەلدەر كۇرەسى)، يۆان دىچكو (بوكس)، گالبادراح وتگونتسەتسەگ (دزيۋدو)، الەكساندر زايچيكوۆ (اۋىر اتلەتيكا)، فارحاد حاركي (اۋىر اتلەتيكا)، داريعا شاكىموۆا (ايەلدەر بوكسى)، ولگا رىپاكوۆا (ءۇش قارعىپ سەكىرۋ)، كارينا گوريچيەۆا (اۋىر اتلەتيكا).

 پاراليمپيادا ويىندارىندا دا كۇتپەگەن جەتىستىككە جەتتىك

 بيىل ريو- دە- جانەيرو وليمپياداسى اياقتالعاننان كەيىن اراعا ەكى اپتا سالىپ، برازيليا جەرىنە پاراليمپياداشىلار باس قوستى. تاعدىردىڭ تاۋقىمەتىن تارتىپ، مۇمكىندىگى شەكتەلگەن مۇگەدەك جاندارىمىزدىڭ ءوزى ريو تورىندە بايراعىمىزدى جەلبىرەتىپ، ءانۇرانىمىزدى اسقاقتاتىپ قايتتى. بيىلعى پاراليمپياداعا ەلىمىزدەن 11 سپورتشى باردى. ولار سپورتتىڭ بەس تۇرىنەن سىنعا ءتۇسىپ، 1 التىن، 1 كۇمىس مەدالعا يە بولدى. پاراليمپيادانىڭ التىن مەدالىن ءجۇزۋ سپورتىنان ءزۇلفيا عابيدۋلينا جەڭىپ السا، پاۋەرليفتينگتەن 67 كەلى سالماقتا ونەر كورسەتكەن راۋشان قويشىبايەۆا كۇمىس مەدالعا يە بولدى. ءزۇلفيا عابيدۋلينانىڭ جەڭىپ العان التىن مەدالى - قازاقستان ءۇشىن پاراليمپيادا تاريحىنداعى تۇڭعىش التىن مەدال.

 جاسوسپىرىمدەرىمىز جارادى

 بيىل جىل باسىندا جاسوسپىرىمدەرىمىز نورۆەگيانىڭ ليللەحاممەر قالاسىندا ءتورت جىلدا ءبىر كەلەتىن وليمپيادا ويىندارىندا باق سىنادى. وندا قازاقستاننىڭ جاسوسپىرىمدەرى 2 قولا مەدال جەڭىپ الىپ، كوماندالىق ەسەپتە 27-ورىنعا يە بولدى. نورۆەگيا جەرىندە مانەرلەپ سىرعاناۋدان ەليزابەت تۇرسىنبايەۆا 167,88 ۇپايمەن العاشقى قولا جۇلدەنى سىيلاسا، ارينا پانتوۆا ەكىنشى قولاعا قول جەتكىزدى. پانتوۆا بياتلون جارىسىنىڭ سپرينتتىك باعدارلاماسىندا مارەگە ءۇشىنشى بولىپ جەتتى. جاسوسپىرىمدەر وليمپياداسىنىڭ كوماندالىق ەسەبىندە ا ق ش، وڭتۇستىك كورەيا جانە رەسەي سپورتشىلارى العاشقى ۇشتىكتى قورىتىندىلادى. ازيا ەلدەرىنىڭ اراسىندا قازاقستاندىقتار ادەتتەگىدەي، كورەيا، جاپونيا جانە قىتاي ەلدەرىنەن كەيىنگى ءتورتىنشى ورىنعا ورنالاستى.

 جەڭىل اتلەتتەرىمىزدىڭ جەتىستىكتەرى

 بيىل قازاقستان جەڭىل اتلەتتەرى ءۇشىن دە تابىستى جىل بولدى. ولار جىل باسىندا جابىق عيماراتتا وتكەن ازيا چەمپيوناتىنا قاتىسىپ، 4 التىن، 2 كۇمىس، 4 قولا مەدالمەن ورالدى. سارى قۇرلىق بىرىنشىلىگى كاتاردىڭ دوحا قالاسىندا وتكەنى بەلگىلى. قازاقستان قۇراماسىنىڭ ساپىنان ولگا رىپاكوۆا (ءۇش قارعىپ سەكىرۋ)، ۆيكتوريا زيابكينا (60 مەتر)، اناستاسيا سافرونوۆا (60 م. كەدەرگى)، رومان ۆالييەۆ (ءۇش قارعىپ سەكىرۋ) سىندى سپورتشىلارىمىز بۇل باسەكەدە جەڭىس تۇعىرىنىڭ ەڭ بيىك ساتىسىنان كورىندى.

 سونىمەن قاتار، دوحا جەرىندە ولگا رىپاكوۆا مەن ۆيكتوريا زيابكينا ازيا رەكوردىن جاڭارتتى. وندا رىپاكوۆا 14 مەتر 32 سانتيمەترگە سەكىردى. ۆيكتوريا زيابكينا 60 مەتردى 7,27 سەكۋندتا جۇگىرىپ ءوتتى. ءۇش قارعىپ سەكىرۋدە الدىنا جان سالماعان ولگا رىپاكوۆا ۇزىندىققا سەكىرۋ باعدارلاماسىندا قولا مەدالعا يە بولدى. سونىمەن قاتار 60 مەترگە كەدەرگىلەر ارقىلى جۇگىرگەن قىزدارىمىز اناستاسيا سافرونوۆا ازيانىڭ التىن مەدالىن موينىنا تاقسا، سافرونوۆامەن قاتار جۇگىرگەن اناستاسيا پيليپەنكو كۇمىس مەدال جەڭىپ الدى. قورجىنىمىزعا تۇسكەن تاعى ءبىر كۇمىس مەدال ەلەنا ميحينانىڭ (400 م.) ەنشىسىندە. ميحايل ليتۆين (400 م.)، ناتاليا نەروزناك (800 م.)، ەكاتەرينا ەكتوۆا (ءۇش قارعىپ سەكىرۋ) سىندى سپورتشىلار ازيا چەمپيوناتىنان قولا مەدالمەن قايتتى.

 كۇرەستەن دە مەدالدى كۇرەپ الدىق

 بيىل كۇرەس تۇرلەرىنەن ازيا چەمپيوناتى تايلاندتىڭ بانگكوك قالاسىندا ءوتتى. وندا بالۋاندارىمىز كۇرەستىڭ ءۇش تۇرىنەن 2 التىن، 7 كۇمىس، 8 قولا مەدال جەڭىپ الدى. 61 كەلى سالماقتا كىلەمگە شىققان داۋلەت نيازبەكوۆ ەكىنشى مارتە ازيا چەمپيونى اتاندى. داۋلەت نيازبەكوۆ - ازيا چەمپيوناتىنىڭ ەكى دۇركىن جەڭىمپازى اتانعان تۇڭعىش قازاق بالۋانى. سوناۋ 1993 -جىلدان بەرى قاتىسىپ كەلە جاتقان ازيا بىرىنشىلىگىندە بىردە- ءبىر قازاق بالۋانى ەكى مارتە ازيانىڭ باس جۇلدەسىن الماعان ەكەن. تەك، ماريد مۋتاليموۆ قانا ازيا چەمپيوناتىندا 3 رەت جەڭىسكە جەتكەن. تاعى ءبىر ايتا كەتەرلىگى، سەرگەي بەلوگلازوۆ باپتايتىن ەركىن كۇرەس شەبەرلەرى ءبىرىنشى رەت ازيا چەمپيوناتىنان 6 مەدال الدى - 1 التىن، 2 كۇمىس، 4 قولا مەدال. بۇعان دەيىنگى ەڭ جوعارعى كورسەتكىشىمىز 5 مەدال بولاتىن . بۇل جولى قورجىنىمىزعا تۇسكەن التى جۇلدەنى داۋلەت نيازبەكوۆتەن بولەك (61 كەلى، التىن مەدال)، نۇرجان بەكجانوۆ (65 كەلى، كۇمىس مەدال)، جىگەر زاكىروۆ (74 كەلى، كۇمىس مەدال)، اسلان كاحيدزە (86 كەلى، قولا مەدال)، باقداۋلەت المەنتاي (97 كەلى، قولا مەدال)، داۋلەت شابانباي (125 كەلى، قولا مەدال) سىندى بالۋاندار سالدى.

تاعى ءبىر ايتا كەتەرلىگى، جاقىندا عانا ۆەنگريانىڭ بۋداپەشت قالاسىندا كۇرەس تۇرلەرىنەن وليمپيادا باعدارلاماسىنا كىرمەگەن سالماقتار بويىنشا الەم چەمپيوناتى ءوتىپ، وندا نۇرلان بەكجانوۆ 70 كەلى سالماقتا كۇمىس مەدال الدى. قازاق بالۋاندارىنىڭ ىشىندە بۇعان دەيىن بىردە- ءبىر ەركىن كۇرەس شەبەرى الەمدىك سايىستىڭ فينالىندا كۇرەسپەگەن ەدى. نۇرلان سول بيىكتى باعىندىرىپ، قازاق بالۋاندارى اراسىندا تۇڭعىش رەت الەم چەمپيوناتىنىڭ كۇمىس جۇلدەگەرى اتاندى. سول الەم چەمپيوناتىندا ايىم ءابىلدينا دا جۇلدەلى ورىننان كورىنىپ، قولا مەدال جەڭىپ الدى.

بانگكوكتەگى ازيا چەمپيوناتىنا قايتا ورالار بولساق، گرەك- ريم كۇرەسىندە دوسجان قورتىقوۆ (75 كەلى) تا ازيانىڭ ەڭ كۇشتى بالۋانى اتاندى. اسقات جاڭبىروۆ (گرەك ريم كۇرەسى)، يرينا بوريسوۆا (قىزدار كۇرەسى)، ايىم ءابىلدينا (قىزدار كۇرەسى)، ەلميرا سىزدىقوۆالار (قىزدار كۇرەسى) فينالدا كۇرەسكەنىمەن قارسىلاستارىنان ايلاسىن اسىرا الماي، كۇمىس مەدالدى قاناعات تۇتتى. ازيا چەمپيوناتىنىڭ قولا جۇلدەگەرى اتانعان بالۋانداردىڭ قاتارىندا مەيرامبەك ايناعۇلوۆ (گرەك- ريم كۇرەسى)، دارحان باياحمەتوۆ (گرەك- ريم كۇرەسى)، اسقات دىلمۇحامەدوۆ (گرەك- ريم كۇرەسى)، دامير كۇزەنبايەۆ (گرەك- ريم كۇرەسى) بار.

 فۋتزالدان ەۋروپا چەمپيوناتىنىڭ قولا جۇلدەگەرى اتاندىق

 بيىل اقپان ايىنىڭ 2-13 ارالىعىندا سەربيانىڭ بەلگراد قالاسىندا فۋتزالدان ەۋروپا چەمپيوناتى ءوتىپ، وندا قازاقستان قۇراما كومانداسى قولا جۇلدەگە يە بولدى. كوماندالىق سپورت تۇرلەرىنىڭ ىشىندە 2016 -جىلداعى ەڭ جوعارعى تابىس دەپ وسى فۋتزال قۇراماسىنىڭ جەتىستىگىن ايتۋعا بولادى. ديماش سۇلەيمەنۆوۆ، سەرىك جامانقۇلوۆ باستاعان ساڭلاقتارىمىز ەۋروپا چەمپيوناتىندا سەنساتسيا جاسادى. توپتىق كەزەڭدە رەسەيدى العا جىبەرىپ، ەكىنشى ورىنمەن شيرەك فينالعا شىققان قازاقستاندىق اياقدوپشىلار يتاليا سىندى ەۋروپانىڭ الپاۋىت كومانداسىن 5:2 ەسەبىمەن ويسىراتا جەڭدى. جارتىلاي فينالدا يسپانيا سياقتى ەۋروپانىڭ 6 دۇركىن چەمپيونىنا ايتارلىقتاي قارسىلىق كورسەتتى. يسپانيا سول سىندا قازاقستاننان 5:3 ەسەبىمەن ايلاسىن اسىردى. فينالدا 7:3 ەسەبىمەن رەسەي قۇراماسىن جەڭىپ، جەتىنشى مارتە ەۋروپانىڭ ۇزدىك كومانداسى اتاندى.

 قازاقستان قۇراماسى الاڭ قوجايىندارى سەربيانى 5:2 ەسەبىمەن ۇتىپ، كارى قۇرلىقتىڭ قولا جۇلدەسىنە يە بولدى. فۋتزالشىلاردىڭ تاعى ءبىر ەرەن ەڭبەگى - بيىلعى الەم چەمپيوناتىنا قاتىسۋى. كولۋمبيادا جالاۋىن كوتەرگەن الەمدىك جارىستا قازاقستان قۇراماسى توپتىق باسەكەدەن شىعىپ، 1/8 فينالدا تاعى دا يسپانياعا جول بەردى.

دزيۋدوشىلارىمىز دا جۇلدەسىز بولمادى

 بيىل قازاقستاندىق تاتامي شەبەرلەرى دە جۇلدەسىز قالمادى. ولار كوكتەمدە تاشكەنتكە قۇرلىقتىق بىرىنشىلىكتە ەل قورجىنىنا 3 التىن، 2 كۇمىس، 6 قولا مەدال سالىپ، كوماندالىق ەسەپتە جاپونيا مەن موڭعوليادان كەيىنگى ءۇشىنشى ورىنعا تابان تىرەدى. ەرلەر باسەكەسىندە 60 كەلى سالماقتا ونەر كورسەتكەن ەلدوس سمەتوۆ قارسىلاس شاق كەلتىرمەي، ازيا چەمپيوناتىنىڭ باس جۇلدەسىن جەڭىپ الدى. قىزدار اراسىندا گالبادراح وتگونسەتسەگ (48 كەلى) پەن ماريام وردابايەۆا (63 كەلى) توپ جاردى. فينالدا كۇرەسكەن ديدار حامزا (73 كەلى) مەن گۇلجان يسانوۆا (+78 كەلى) قارسىلاستارىنا جول بەرىپ، كۇمىس مەدالدى قاناعات تۇتتى. ەلدوس جۇماحانوۆ (66 كەلى)، ازيز قالقامان ۇلى (81 كەلى)، ماكسيم راكوۆ (100 كەلى)، ەرجان شىنكەيەۆ (+100 كەلى) سياقتى جىگىتتەردىڭ ەنشىسىندە قولا مەدال. سونداي- اق، ەرلەر مەن ايەلدەر قۇراماسى كوماندالىق سايىستا ازيا چەمپيوناتىنىڭ قولا جۇلدەگەرلەرى اتاندى.

 استانا الەم ارۋلارىنىڭ باسىن قوستى

 بيىل ەلوردا تورىندە وتكەن سپورتتاعى ەڭ ايتۋلى وقيعالارىنىڭ ءبىرى - بوكستان قىزدار اراسىندا وتكەن الەم چەمپيوناتى. ريو- دە- جانەيرو وليمپياداسىنىڭ قارساڭىندا استانا تورىندە وتكەن الەم بىرىنشىلىگىندە قازاقستاندىق بويجەتكەندەر بۇرىن- سوڭدى بولماعان تابىسقا كەنەلدى. بويجەتكەندەرىمىز الەم چەمپيوناتىنىڭ قورىتىندىسى بويىنشا 4 التىن، 2 قولا مەدال الىپ، كوماندالىق ەسەپتە ءبىرىنشى ورىنعا شىقتى. 48 كەلى سالماقتا ەل نامىسىن قورعاعان نازىم قىزايباي قازاق بوكسىنىڭ تاريحىندا تۇڭعىش رەت ەكى دۇركىن الەم چەمپيونى اتاندى. 54 كەلى سالماقتا كۇش سىناسقان بويجەتكەندەر اراسىندا دينا جولاماننىڭ دا جۇلدىزى جاندى.

كەيىننەن ۆالەنتينا حالزوۆا (69 كەلى) مەن ءلاززات كۇنگەيبايەۆا (+81 كەلى) دا ءوز سالماقتارىندا توپ جارىپ، الەم چەمپيونى دەگەن اتاققا قول جەتكىزدى. دۇنيەجۇزىلىك جارىستىڭ قولا جۇلدەلەرىن جاينا شەكەربەكوۆا (51 كەلى) مەن ايجان قوجابەكوۆا (57 كەلى) يەلەندى.

شورت- ترەكتەن دە شوقتىعىمىز بيىكتەدى

 بيىل شورت- ترەك سپورتىنان دا شوقتىعىمىز بيىك بولدى. شورت- ترەكشىلەرىمىز الەم كۋبوگى كەزەڭدەرىندە ءارتۇرلى دارەجەدە بىرنەشە مەدال سىيلادى. بۇل - بۇرىن- سوڭدى بولماعان جەتىستىك. وڭتۇستىك كورەيا، گوللانديا، ا ق ش، كانادا، رەسەي سياقتى وسى سپورت ءتۇرىنىڭ الپاۋىتتارىنان ءبىزدىڭ سپورتشىلار ايلاسىن اسىرا الاتىن دەڭگەيگە كوتەرىلدى. بۇگىندە ءبىزدىڭ سپورتشىلار وسى ماۋسىمداعى الەمدىك شورت- ترەكتىڭ توپ- پاراعىن (رەيتينگىن) باستاپ تۇر. بيىل قازاقستاندىق شورت- ترەكشىلەرىمىز الەم كۋبوگىنىڭ ءتورت كەزەڭىنە قاتىستى.

 الەم كۋبوگىنىڭ 1- كەزەڭى كانادادا ءوتتى. وندا 500 مەتردەن ەرلەر اراسىندا - ابزال اجىعاليەۆ پەن دەنيس نيكيشا 4- ورىندى، 1000 مەتردە ايەلدەر اراسىنان كيم يونگ 10-ورىندى يەلەندى. ەكنىشى كەزەڭ ا ق ش- تا ءوتتى. وندا 500 مەتردە ەرلەر اراسىندا ابزال اجىعاليەۆ باس جۇلدەنى جەڭىپ الدى. ال ايدار بەكجانوۆ 13-ورىنعا، دەنيس نيكيشا 18-ورىنعا تابان تىرەدى. 1500 مەتردەن نۇربەرگەن جۇماعازيەۆ 9-ورىنعا تابان تىرەدى. ال وسى كەزەڭدە 5 مىڭ مەترلىك ەستافەتالىق جارىستا ەرلەر قۇراماسى قولا جۇلدەگەر اتاندى. الەم كۋبوگىنىڭ 3-كەزەڭى قىتايدا ءوتتى. وندا 500 مەتردە ابزال اجىعاليەۆ ءتورتىنشى، ايدار بەكجانوۆ بەسىنشى ورىننان كورىندى. 1000 مەتر قاشىقتىقتا نۇربەرگەن جۇماعازيەۆ 6-ورىنعا تۇراقتادى. الەم كۋبوگىنىڭ 4-كەزەڭى وڭتۇستىك كورەيادا ءوتتى. وندا 1000 مەتردەن نۇربەرگەن جۇماعازيەۆ چەمپيون اتانسا، دەنيس نيكيشا كۇمىس جۇلدەنى قانجىعاسىنا بايلادى. ءتورت كەزەڭنىڭ قورىتىندىسى بويىنشا قازاقستان قۇراماسى الەمدىك رەيتينگتە 6-ورىندا كەلەدى. مىنە، وسىلايشا قازاقستان سپورتشىلارى 2016 -جىلدى ءساتتى اياقتادى دەپ نىق سەنىممەن ايتا الامىز.

 اۆتور: كۇنسۇلتان وتارباي