ارىستانبەك مۇحامەدي ۇلى «ماركو پولونىڭ جىبەك جولى» فيلمىن تاماشالادى

استانا. قازاقپارات - ەلوردادا «ماركو پولونىڭ جىبەك جولى» اتتى عىلىمي- كوپشىلىك فيلمىنىڭ پرەمەرالىق كورسەتىلىمى ءوتتى.

بۇل جايىندا قازاقپارات ەلىمىزدىڭ مادەنيەت جانە سپورت مينيسترلىگىنە سىلتەمە جاساپ حابارلايدى.

 فيلم تۇساۋكەسەرىندە ءسوز سويلەگەن ق ر مادەنيەت جانە سپورت ءمينيسترى ارىستانبەك مۇحامەدي ۇلى جوبا وتاندىق كينەماتوگرافتى حالىقارالىق دەڭگەيگە شىعارۋعا باعىتتالعىندىعىن اتاپ ءوتتى.

«ەلباسى ءبىزدى بارشا الەمگە تانىتقان ۇلى جىبەك جولىن قايتا جاڭعىرتۋىمىز قاجەت ەكەندىگىن ۇنەمى ەسكەرتىپ كەلەدى. بۇل جوبا مەملەكەتىمىزدىڭ يميدجىن ارتتىرۋدى، وتاندىق كينەماتوگرافقا شەتەلدىك كورەرمەندەردىڭ قىزىعۋشىلىعىن شاقىراتىن جوعارى ساپالى عىلىمي- كوپشىلىك جانردى قالىپتاستىرۋدى ماقسات ەتەدى. جوبانى شەتەلدىك ارىپتەستەرىمىزبەن بىرلەسە جۇزەگە اسىرىپ وتىرعاندىعىمىز ماڭىزدى. الداعى ۋاقىتتا قازاقستاندىق كينو ونىمدەردى ۇلكەن حالىقارالىق اۋديتوريا الدىندا جۇزەگە اسىرۋىمىزعا بولادى»، - دەدى مينيستر.

 ق ر مادەنيەت جانە سپورت مينيسترلىگى قازاق عىلىمي- زەرتتەۋ مادەنيەت ينستيتۋتىنىڭ باس ديرەكتورى اندرەي حازبۋلاتوۆ فيلمدى تۇسىرۋگە دايىندىق كەزەڭىندە كولەمدى زەرتتەۋ جۇمىستارى جۇرگىزىلگەندىگىن ايتتى.

يتاليانىڭ الەمگە تانىمال ساياحاتشىسى تۋرالى عىلىمي- بيوگرافيالىق ماتەريال جيناقتاۋ ءۇشىن ۇستىمىزدەگى جىلدىڭ مامىر ايىندا استانادا ماركو پولو مۇراسى تۋرالى «دوڭگەلەك ۇستەل» ءوتتى. شاراعا قىتاي، يتاليا، رەسەي جانە قازاقستان عالىمدارى مەن كينوماتوگرافيستەرى قاتىستى. ولاردىڭ قاتارىندا ميلانداعى امبروزيانو اكادەمياسىنىڭ پروفەسسورى ەدواردو كانەتتا، تۇركىتانۋشى عالىم، فيلولوگيا عىلىمدارىنىڭ دوكتورى الەكساندر گاركاۆەتس سەكىلدى وزگە دە بەلدى عالىمدار بولدى.

«ماركو پولونىڭ جىبەك جولى» عىلىمي- كوپشىلىك فيلمى يتاليالىق تانىمال كوپەس ماركو پولونىڭ ۇلى دالا بويىنداعى ساياحاتتارى تۋرالى كىتابىنىڭ جەلىسى بويىنشا ءتۇسىرىلدى. كارتينادا نەگىزىنەن ورتالىق ازيا مەن بۇگىنگى قازاقستان ايماعىن سيپاتتاۋعا ايرىقشا ماڭىز بەرىلەدى. رەجيسسەردىڭ ويى عىلىمي سۇحبات، تاريحي رەكونسترۋكسيا مەن ەتنوگرافيالىق فيلم ۇيلەسىمى نەگىزىندە قۇرىلعان. جەتەكشى قازاقستاندىق جانە شەتەلدىك تاريحشى- ساراپشىلار قازاق عىلىمي- زەرتتەۋ مادەنيەت ينستيتۋتىمەن قازاق تىلىنە العاش رەت اۋدارىلعان ماركو پولونىڭ «الەمنىڭ ءارالۋاندىعى» اتتى كىتابىنىڭ بىرەگەيلىگى تۋرالى باياندايدى.

 فيلم ساراپشىلارىنىڭ ءبىرى، تانىمال پولياك زەرتتەۋشىسى ياتسەك پالكيەۆيچ 2017 -جىلى ماركو پولونىڭ جولىن قايتالاۋعا نيەتىن ءبىلدىردى.

«ماركو پولونىڭ جىبەك جولى» فيلمى جەتى مەملەكەتتىڭ وكىلدەرى قاتىساتىن حالىقارالىق ەكسپەديتسيا باعدارىنىڭ بارلىعىندا كورسەتىلەتىن بولادى. سونىمەن قاتار فيلمدى ا ق ش، قىتاي، يتاليادا كورسەتۋ جوسپاردا بار. قازاقستانداعى كورسەتىلىم ءۇشىن فيلم قازاق تىلىنە اۋدارىلادى. بۇل مەملەكەتتىك ءتىلدىڭ دامۋى مەن تاريحي- مادەني اعارتۋ ىسىنە سەپتىگىن تيگىزەدى»، - دەدى قاز ع ز م ي ديرەكتورى ا. حازبۋلاتوۆ.

 مادەنيەت جانە سپورت مينيسترلىگى ماركو پولو تۋرالى قازاقستاندىق فيلمىن حالىقارالىق كينوفەستيۆالدەرگە قاتىستىرۋ ارقىلى شەتەلدىك كينونارىقتاعى قازاقستان بەدەلىن ارتتىرۋعا ۇلەس قوسۋدى جوسپارلاپ وتىر.

ايتا كەتەرلىگى، ق ر مادەنيەت جانە سپورت مينيسترلىگىنىڭ تاپسىرىسىنا وراي قازاق عىلىمي- زەرتتەۋ مادەنيەت ينستيتۋتى يتاليالىق جانە قىتايلىق ارىپتەستەرىمەن بىرلەسىپ تۇسىرگەن فيلمنىڭ تۇساۋكەسەر كورسەتىلىمىنە مادەنيەت جانە سپورت ءمينيسترى ارىستانبەك مۇحامەدي ۇلى، فيلمنىڭ شەتەلدىك ارىپتەستەرى، عىلىمي جانە شىعارماشىلىق زيالى قاۋىم مەن ب ا ق وكىلدەرى قاتىستى.

 اۆتور: مارلان جيەمباي