ءسۇت، ەت پەن جۇمىرتقا قىتايعا ەكسپورتتالادى - فوتو

استانا. قازاقپارات - سولتۇستىك قازاقستان وبلىسىنا ءوڭىردىڭ ينۆەستيتسيالىق الەۋەتىمەن تانىسۋ ماقساتىندا شانشي پروۆينتسياسىنىڭ شيان قالاسىنان دەلەگاتسيا توبى كەلدى. بۇل تۋرالى قازاقپارات وبلىس اكىمىنىڭ باسپا ءسوز قىزمەتىنە سىلتەمە جاساپ حابارلايدى.

 كەزدەسۋدى اشقان وبلىس اكىمى ەرىك سۇلتانوۆ ءوڭىردىڭ الەۋمەتتىك- ەكونوميكالىق دامۋى تۋرالى ايتتى. «وبلىس جىلىنا 500 مىڭ توننا ءسۇت، 90 مىڭ توننا ەت، 600 ميلليون دانا جۇمىرتقا شىعارادى. ءبىز ورگانيكالىق، ەكولوگيالىق تازا ءونىم وندىرەمىز. بۇگىندە ق ر ۇكىمەتى مەن ق ح ر اراسىندا ءبىزدىڭ ازىق- تۇلىك ونىمدەرىن قىتايعا ەكسپورتقا شىعارۋ بويىنشا كەلىسسوزدەر جۇرگىزىلۋدە. ونىمدەرىمىزدىڭ ساپاسى جوعارى جانە باسەكەگە قابىلەتتى»، - دەدى ءوڭىر باسشىسى.

 ەرىك سۇلتانوۆتىڭ سوزىنە قاراعاندا، وبلىستا ينۆەستيتسيا اۋدارۋدىڭ وزگە دە ءتيىمدى كوزدەرى بار. ءداستۇرلى اگرارلىق جانە ماشينا جاساۋ سالاسىنان بولەك، باسقا دا بيزنەس- جوسپارلار مەن بىرلەسكەن جوبالاردى جۇزەگە اسىرۋدىڭ مۇمكىندىكتەرى كوپ. بۇل جونىندە تولىعىراق وبلىس اكىمىنىڭ ورىنباسارى راتمير احمەتوۆ باياندادى.

«قازاقستاندا مال شارۋاشىلىعىن دامىتۋ مەملەكەتتىك دەڭگەيدە قولداۋعا يە. اسىل تۇقىمدى مال شارۋاشىلىعىن دامىتۋ، ونىمدىلىكتى ارتتىرۋ، مال شارۋاشىلىعى ءونىمىنىڭ ساپاسىن جوعارىلاتۋ سالاسى سۋبسيديالانادى. مال شارۋاشىلىعىن دامىتۋ كەزىندە ءىرى قارا مال تەرىسى مەن ءجۇنىن وڭدەيتىن ءوندىرىس ۇيىمداستىرۋعا مۇمكىندىك بەرەتىن شيكىزات پايدا بولادى»، - دەدى احمەتوۆ.

 سونداي- اق، وبلىس اكىمى قوناقتاردى ينۆەستيتسيالىق جانە كاسىپكەرلىك قىزمەتتى جۇرگىزۋ بويىنشا جەڭىلدىكتەر جونىندە حاباردار ەتتى. ءوز كەزەگىندە شانشي پروۆينتسياسىنداعى شيان قالاسىنىڭ جالپى قىتايلىق حالىق وكىلدەرى جينالىسى تۇراقتى كوميتەتىنىڭ ءتوراعاسى چەن باوگەن سولتۇستىك قازاقستان وبلىسىنىڭ باسشىلىعىنا قوناقجايلىلىعى ءۇشىن العىسىن ءبىلدىرىپ، سولتۇستىك ءوڭىرىنىڭ زور الەۋەتىن اتاپ ءوتتى.

«سىزدەرگە راسىن ايتايىن، قىتايدا وسىنداي از ۋاقىتتا زاۋىت سالىنباس ەدى. مەن قازاقستاننىڭ ينۆەستيتسيالاردى قابىلداۋ مەن دامىتۋعا دايار ەكەنىن كوردىم. سولتۇستىك قازاقستان وبلىسىنا «ايتسزيۋ» كومپانياسىنىڭ كاسىپورىن سالۋى ءوڭىردىڭ اۋىل شارۋاشىلىعى كەشەنى مەن اۋىل شارۋاشىلىعى ونىمدەرىن وڭدەۋدى دامىتۋعا اسەرىن تيگىزەدى»، - دەدى ول.

 چەن باوگەن قىتايلىق ينۆەستورلار اراسىنان دا «ايتسزيۋ» كومپانياسى سياقتى سولتۇستىك قازاقستان جەرىندە جوبالاردى جۇزەگە اسىرۋعا تىلەك بىلدىرۋشىلەردىڭ تابىلاتىنىنا سەنىمىن ءبىلدىردى. كەزدەسۋ سوڭىندا تاراپتار ەكىجاقتى ىنتىماقتاستىق تۋرالى مەموراندۋمعا قول قويدى. وبلىس اكىمى ەرىك سۇلتانوۆ وسى كەزدەسۋ وڭىرلەر اراسىندا ءوزارا ىسكەرلىك جانە دوستىق بايلانىستاردىڭ تابىستى دامۋىنا ىقپالىن تيگىزەتىندىگىن اتاپ ءوتتى.

 ايتا كەتەيىك، جاقىندا عانا س ق و- دا قازاقستان- قىتاي جوباسى ىسكە قوسىلىپ، «ايتسزيۋ» كومپانياسى تايىنشا اۋدانىندا مايلى داقىلداردى وڭدەيتىن زاۋىت اشقان بولاتىن.

 اۆتور: مارلان جيەمباي