بەلارۋس ەلىنىڭ پرەزيدەنتى سامميتكە نەگە كەلمەدى؟
جىل قورىتىندىسى تارازىعا تارتىلىپ، الداعى جىلدىڭ جوسپارى بەزبەنگە سالىناتىن سامميتكە قازاقستان، قىرعىزستان، رەسەي جانە ارمەنيا مەملەكەت باسشىلارى قاتىستى. ال القالى جيىنعا بەلارۋس ەلىنىڭ پرەزيدەنتى الەكساندر لۋكاشەنكو كەلمەدى. نەگە؟
«بەلارۋس ءبىزدىڭ جاقىن وداقتاسىمىز. ولار بارلىق حالىقارالىق ىستەردە، ساۋدا- ەكونوميكالىق ىنتىماقتاستىقتا اسا ماڭىزدى ارىپتەستەرىمىزدىڭ ءبىرى. بەلارۋس حالقى رەسەيلىكتەرمەن بىرگە ازا تۇتىپ جاتقانىن اسا جوعارى باعالايمىز. بۇل وتە ماڭىزدى، بۇل ءبىزدىڭ ارا قاتىناسىمىز بەن وداقتىڭ دەڭگەيىن تاعى ءبىر مارتە دالەلدەي ءتۇستى»، - دەيدى ول.
بۇل ر ف پرەزيدەنتى باسپا ءسوز حاتشىسىنىڭ جۇمسارتىپ ايتقانى. شىنتۋايتىندا، سەبەپ باسقا سەكىلدى. «سوڭعى بىرەر جىلدا بەلارۋس پەن باتىس ەلدەرى اراسىندا جىلىمىق ورنادى. ا ق ش باستاعان الپاۋىتتار بەلارۋس كومپانيالارىنا جانە بيلىگىنە سالعان سانكسيانى الىپ تاستادى. ينۆەستيتسيا كەلە باستادى. بۇل رەسمي مينسكىگە ءبىراز وي سالدى. بۇل ءبىر.
ەكىنشىدەن، جاڭادان ازىرلەنگەن ە ا ە و- نىڭ كەدەن كودەكسىنە لۋكاشەنكونىڭ كوڭىلى تولمادى. ويتكەنى كەدەندىك كودەكستە وعان قاتىسۋشى ەلدەردىڭ مۇددەسى قورعالماعان. ۇشىنشىدەن، الەكساندر لۋكاشەنكونىڭ ويىنشا، ەۋرازيالىق ەكونوميكالىق وداققا مۇشە بولۋ بەلارۋسسياعا ەشقانداي پايدا اكەلمەگەن. كەرىسىنشە ساۋدا اينالىمى تومەندەپ كەتكەن. وسىنىڭ ءوزى لۋكاشەنكونىڭ ە ا ە و - قا كوزقاراسىن تۇپكىلىكتى وزگەرۋىنە اكەلىپ سوقتىرۋى مۇمكىن. رەسەي مەن بەلارۋس اراسىندا ەكونوميكالىق ساۋدا - ساتتىق سالاسىندا كەيبىر تۇسىنىسپەۋشىلىك بار. رەسمي مينسك ماسكەۋدەن كوپتەگەن تاۋارلارعا جەڭىلدىك جاساۋىن سۇراۋمەن كەلەدى. ءبىراق رەسەي تاراپى بۇعان يلىككىسى جوق. وسىعان وكپەلەگەن لۋكاشەنكو قازىر بەتىن ەۋروپاعا قاراي بۇرا باستادى. سامميتكە كەلمەۋى رەسەيگە كورسەتكەن قىرى» دەسەدى. مۇمكىن.
اينۇر قازىكەنوۆا
«ايقىن» گازەتى
