حاسەن ءورالتايدىڭ رۋحاني قازىنالارى قازاقستاننىڭ اكادەميالىق كىتاپحانا قورىنا تاپسىرىلدى
«حاسەن ءورالتاي - كورنەكتى قوعام قايراتكەرى، بەلگىلى جۋرناليست- پۋبليتسيست ءارى تاريحشى. حاسەن ءورالتايدىڭ جەكە مۇراعاتىنداعى كىتاپتار، ءبىرقاتار قۇجاتتار مەملەكەتتىك «مادەني مۇرا» باعدارلاماسى اياسىندا جەتكىزىلگەن ماقالالارى، باعدارلامالارىنىڭ جازبالارى قازاقستان رەسپۋبليكاسى ۇلتتىق اكادەميالىق كىتاپحاناسىنىڭ قورىنا تاپسىردى. ق ر ۇلتتىق اكادەميالىق كىتاپحاناسىنىڭ ماماندارى مۇراعاتتىق ماتەريالدار بويىنشا حاسەن ءورالتايدىڭ سويلەگەن سوزدەرى نەگىزىندە بەس ديسك شىعاردى» - دەيدى كىتاپحانا قىزمەتكەرلەرى.
بەس بىردەي ديسكىنىڭ ءارقايسىسىنىڭ ءوزى مىندەتى، ءوز اتاۋى بار.
1 - «قازاقستان تاۋەلسىزدىگىنە 10 جىل»،
2 - «ماناش قوزىبايەۆ قازاق مەملەكەتتىلىگى جايلى»،
3 - «شىعىس تۇركىستان ازاتتىعى ءۇشىن كۇرەس»،
4 - «جەلتوقسان وقيعاسىنا 5 -جىل»،
5 - «الاش زيالىلارى».
حاسەن ءورالتايدىڭ جازبالارى قازاق حالقىنىڭ تاريحىن، ادەبيەتىن زەردەلەۋگە قوسىلعان ولشەۋسىز ۇلەس بولىپ وتىر.
بۇل بەس ديسكدەن بولەك حاسەن ءورالتاي قازاق حالقىنىڭ تاريحىنا قاتىستى بىرنەشە كىتاپتار جازدى:
«قازاق تۇرىكتەرى» (يزمير,1961)،
«ۇلى تۇرىكشى ماعجان جۇماباي ۇلى (يزمير، 1965)،
«شىعىس تۇركىستان تاريحىنداعى باستى ماسەلەلەر» (ستامبۋل، 1975)
«كوممۋنيزممەن شايقاس» (يزمير، 1965) ، ت. ب..
1968 -جىلى حاسەن ءورالتاي «ازات ەۋروپا» /«ازاتتىق» راديوسىنىڭ قازاق راديوسىنا جۇمىسقا شاقىرىلدى، سول كەزدە راديونىڭ باس كەڭسەسى گەرمانيانىڭ ميۋنحەن قالاسىندا بولاتىن. حاسەن ءورالتاي 1988-1995 -جىلدار ارالىعىندا «ازاتتىق» راديوسىنىڭ قازاق بولىمىنە باسشىلىق ەتتى. 1995 -جىلى باس رەداكسيا پراگاعا كوشتى، سول كەزەڭدە حاسەن ءورالتاي زەينەت دەمالىسىنا شىقتى. ءومىرىنىڭ سوڭعى كۇندەرىنە دەيىن ح. ورالتاي قازاق ەميگراتسياسى كوشباسشىلارىنىڭ ءبىرى رەتىندە بەلسەندى قوعامدىق قىزمەتىن جالعاستىردى.
قازاقستاننىڭ تاۋەلسىزدىگى جىلدارىندا جۋرناليستىڭ شىعارماشىلىق قىزمەتى قازاقستان ۇكىمەتىنىڭ نازارىنان تىس قالعان ەمەس. 2007 -جىلى حاسەن ءورالتاي قازاقستان جۋرناليستيكا اكادەمياسىنىڭ ب ا ق سالاسىنداعى جالپىۇلتتىق «التىن سامۇرىق» مارتەبەلى سىيلىعىمەن ماراپاتتالعان.
