تاۋىق جىلى قانداي بولادى؟
سونىمەن، بيىلعى «وتتاي لاۋلاعان» جىل بارشامىزعا نە بەرەدى؟ قورازدىڭ بيىل قانداي مىنەز تانىتاتىنىن Baq.kz ءتىلشىسى انىقتاپ كوردى.
كارىقۇلاق، كونەكوز قاريالاردان تاريحتا تاۋىق جىلى قانداي بولعانىن ەستىپ وستىك. قاريالاردىڭ ايتۋىنا قاراعاندا ءدال وسى مەشىن كەتىپ، تاۋىق تۋاتىن 1969 -جىلدىڭ جازى قۋاڭشىلىقپەن ءوتىپ، قىسى مالشى مەن شارۋاعا وتە ءجايسىز بولىپتى. بۇكىل ەل اۋماعىن قالىڭ قار جاۋىپ، ۇسكىرىك بوران بىرنەشە اپتالاپ سوققان ەكەن. سودان 1969 -جىلعى تاۋىق جىلى «جۇت بولعان جىل» رەتىندە ەلدىڭ ەسىندە قالعان...
تاۋىق جىلى تۋار- تۋماستان، مەشىننىڭ ءوزى كەتپەي جاتىپ اق، قالىڭ قاردىڭ باسىن بيىل دا كورىپ وتىرمىز. ونىڭ ارتى نەمەن ۇلاسارى ازىرگە تەك جاراتۋشىعا عانا ايان. ال ەندى جاۋىرىنشىلار مەن بولجاعىشتار نە دەيدى؟..
2017 -جىلدىڭ ءبىرقالىپتى وتپەيتىنى انىق. بيىلعى جىلدىڭ سيمۆولى سياقتى 12 اي شيراق مىنەز تانىتادى. باسىندا قوراز ءبىرقالىپتى، بايسالدى بولعانىمەن، كوكتەمگە قاراي قۇس ءتۇرلى جاڭالىقتارىمەن بارشانى اۋرە- سارساڭعا سالا باستايدى. بۇل جىلدىڭ باستى قاعيداسى - ومىردەگى كەز- كەلگەن وزگەرىسكە فيلوسوفيالىق تۇرعىدان قاراۋ. جالقاۋلىقتى ۇمىتقان ادامدار ءۇشىن قوراز جىلى بەرەكەلى بولماق. ەپتىلەردىڭ قىزمەتى ءوسىپ، ولارعا كوپتەگەن ۇتىمدى ءارى ءتيىمدى ۇسىنىستار جاسالادى. دەسەك تە، 2017 -جىلى تىم اسىعىپ كەتپەڭىز، ودان دا وزىڭىزگە ساي كەلەتىن ىڭعايلى جۇمىستى تاڭداڭىز.
قوراز جارقىراپ توپتىڭ الدىندا جۇرگەندى ۇناتاتىندىقتان ادامداردان دا سونداي مىنەز كۇتەدى. تۇرلەنىڭىز، بەينەڭىزدى قۇبىلتىپ، «ەكسپەريمەنت» جاساڭىز، سەبەبى قوراز وزگەرىستى ۇناتادى. قاتىپ قالعان ەرەجەگە باعىنباي، ءوز ىشكى تۇيسىگىنە سەنەتىندەرگە جىل سيمۆولى مىندەتتى تۇردە كومەككە كەلەدى.
الداعى جىلدا كەز كەلگەن ينتەللەكتۋالدى جۇمىس ورگە باسادى، اسىرەسە شىعارماشىلىق ەڭبەكپەن اينالىساتىنداردىڭ جولى بولادى.
2017 -جىل قارجىلىق تۇراقتىلىعىمەن دە قۋانتادى. سەبەبى، قوراز شوقىپ جەيتىن ءداندى ىزدەپ ءجۇرىپ تابادى. ول بۇنىمەن شەكتەلمەي، بارشاعا ءتيىمدى تابىس كوزىن تابۋعا كومەكتەسەدى. قوراز بارلىق جۇلدىز بەلگىلەرىنە قۇرمەت كورسەتەدى، اسىرەسە وسى جىلى تۋعانداردىڭ بارلىق سالادا جولى بولماق.
جالپى قوراز جىلى قىزىعى مەن شىجىعى كوپ جىل بولادى. جەكە ءومىر ۇمىت قالمايدى، تانىستىقتار كوبەيىپ، ءوز تاعدىرىن كەزدەستىرگەندەر دە از بولمايدى. سوندىقتان، باسى بوس جاندار جاقسى جاڭالىقتىڭ اۋىلى الىسى ەمەستىگىن اڭعارۋى كەرەك.
وتباسىلى ادامداردىڭ ءومىرى دە ءبىرقالىپتى بولمايدى، جانۇيا مۇشەلەرى، اسىرەسە، بالالار قۋانىش سىيلاۋمەن بولادى. ءسابيى جوق وتباسىلار دا بيىل بالا ءسۇيۋدى ويلاستىرعانى ءجون بولار. سەبەبى، قوراز جىلى تۋعان بالالاردى جارقىن ءارى عاجايىپ ءومىر كۇتىپ تۇر دەگەن بولجامدار ءجيى كەزدەسەدى. قوراز جىلى تۋعان سابيلەر ساياساتتا، جالپى ءومىردىڭ كەز كەلگەن سالاسىندا بيىك اسۋلاردى باعىندىرادى ەكەن.
سونىمەن، 2017 -جىل ءار ادامنىڭ ومىرىنە تەك باقىت پەن ساتتىلىك سىيلايدى، سەبەبى «وتتاي لاۋلاعان» قوراز جىلىندا پروبلەما مەن كەلەڭسىزدىككە ۋاقىت مۇلدە قالمايتىن سياقتى.
قىمبات ەلتاي قىزى
