سەرىك احمەتوۆ ىسىنە قاتىستى ءۇش ادام بوساتىلدى
«اباي اۋداندىق سوتى سوتتالۋشىلار ايدار تەلگارين (قاراعاندى اكىمىنىڭ ەكس- ورىنباسارى)، اناتولي ەسسە مەن ورازالى ايمەنبەتوۆتى («مەتاللۋرگيا- مەتاللووبرابوتكا» يندۋستريالدىق پاركى ديرەكتورىنىڭ بۇرىنعى ورىنباسارلارى) جازالارىنىڭ وتەلمەگەن بولىگىن جۇمسارتۋ تۋرالى ءوتىنىشىن قاناعاتتاندىردى»، - دەپ ايتتى اباي اۋداندىق سوتىنىڭ ب ا ق- پەن جۇمىس بويىنشا ۇيلەستىرۋشىسى گۇلنار مارزالينوۆا.
اباي اۋداندىق سوتىنىڭ 2016 -جىلعى 2 -جەلتوقسانداعى ۇكىمىمەن جازالانۋ مەرزىمدەرى اقشالاي ايىپپۇلمەن الماستىرىلدى: ا. تەلگارينگە - 161 ايلىق ەسەپتىك كورسەتكىش (ا ە ك) كولەمىندە (2016 -جىلى 1 ا ە ك = 2121 تەڭگە)، ا. ەسسە - 256 ا ە ك، و. ايمەنبەتوۆ - 87 ا ە ك. وسىلايشا، ايىپپۇلدار 185 مىڭ تەڭگەدەن 543 مىڭ تەڭگەگە دەيىنگى ارالىقتى قۇرايدى. ەسسەنىڭ جازاسىن وتەۋ مەرزىمىنىڭ وتەلمەگەن بولىگى 2 جىل 10 اي 12 كۇن، تەلگارين - 1 جىل 9 اي 27 كۇن، ايمەنبەتوۆ - 1 جىل 80 كۇن. «ۇكىم زاڭدىق كۇشىنە ەنىپ، سوتتالۋشىلار بوستاندىققا شىقتى»، - دەپ قوستى گ. مارزالينوۆا.
ونىڭ ايتۋىنشا، بۇنداي ارەكەتكە راقىمشىلىق زاڭىنىڭ قاتىسى جوق. «ءۇش سوتتالۋشى راقىمشىلىق تۋرالى زاڭعا سايكەس كەلدى. الايدا ولار ءوز ەركىلەرىمەن بۇل شارادان باس تارتىپ، جازاسىن وتەۋ مەرزىمىنىڭ قالعان بولىگىن ايىپپۇلعا الماستىرۋ تۋرالى ءوتىنىش جاسادى»، - دەپ ءتۇسىندىردى ب ا ق- پەن جۇمىس ۇيلەستىرۋشىسى.
ەسكە سالا كەتەيىك، بۇرىن سىبايلاس جەمقورلىق ءۇشىن سوتتالعان قاراعاندى وبلىسىنىڭ ەكس-اكىمى باۋىرجان ابدىشەۆ، قاراعاندى جەر قاتىناستارى ءبولىمىنىڭ بۇرىنعى جەتەكشىسى ەرنار دارىبەكوۆ شارتتى مەرزىمىنەن بۇرىن بوساتۋعا قول جەتكىزدى. سىبايلاس جەمقورلىق جاسادى دەگەن ايىپ تاعىلعان ەكس- پرەمەر- مينيستر س. احمەتوۆ، بۇرىڭعى شەنەۋنىكتەر مەن كاسىپكەرلەرگە قاتىستى توپتىق قىلمىستىق ءىستى قاراعاندى وبلىستىق قىلمىستىق ءىس بويىنشا مامانداندىرىلعان اۋدانارالىق سوتى قارادى. 21 ادامعا ايىپ تاعىلدى. ۇكىمدى جاريالاۋ 2015 -جىلدىڭ 11 -جەلتوقسان كۇنى ءوتتى. احمەتوۆتىڭ مۇلكى تاركىلەنىپ، مەملەكەتتىك ورگانداردا لاۋازىمدى قىزمەت اتقارۋ قۇقىعىنان 5 جىلعا ايىرىلا وتىرىپ، 10 جىل مەرزىمگە باس بوستاندىعىنان ايىرۋ جازاسى تاعايىندالدى. قاراعاندى وبلىستىق سوتىنىڭ اپپەلياتسيالىق سوت القاسىنىڭ 2016 -جىلدىڭ 14 -ناۋرىزىندا شىعارعان قاۋلىسىمەن ءبىرىنشى ينستانسياداعى سوتتىڭ شەشىمى وزگەرتىلىپ، كوپتەگەن ادامداردىڭ جازاسى جەڭىلدەدى. سونىڭ ىشىندە، احمەتوۆتىڭ جازالانۋ مەرزىمى 8 جىلعا دەيىن تومەندەدى.
