مەيرامبەك بەسبايەۆ بالا كۇنگى دوسى توقتار سەرىكوۆتىڭ ەل بىلمەيتىن قىرلارىن جاريا ەتتى

استانا. قازاقپارات - ءبىر ۇستازدىڭ تاربيەسىن كورىپ، جاستايىنان بىرگە وسكەن مەيرامبەك بەسبايەۆ پەن توقتار سەرىكوۆ بۇگىندە قازاق ەستراداسىنداعى ورنى بولەك دارا انشىلەرگە اينالدى.

العاش تانىسقان ساتتەن باستاپ-اق ولاردىڭ جۇبى جازىلعان ەمەس. بالالىق شاقتارى، ۇمىتىلماس ستۋدەنتتىك كەزدەرى بىرگە ءوتتى. مەيرامبەك بەسبايەۆ العاش رەت بالا كۇنگى دوسىنىڭ ەل بىلە بەرمەيتىن قاسيەتتەرىن جاريا ەتتى.

بۇل تۋرالى 31 -ارنانىڭ «ايتا بەرسىن» باعدارلاماسىندا ايتىلدى.

«توقتاردىڭ ەڭ ءبىر جاقسى قاسيەتى - ونىڭ ەستە ساقتاۋ قابىلەتىنىڭ كۇشتىلىگىندە. ونىسىنا ءالى كۇنگە دەيىن تاڭعالامىن. «الگى جىگىت قوي، الگى كىسى عوي، ەسىڭدە ما؟» دەپ ءبارىن تانىپ جۇرەدى. جالپى توقتاردىڭ تاڭعالاتىن قاسيەتتەرى كوپ. اقىندىعى ءبىر بولەك. تابان استىندا ويدان قۇراستىراتىنى بار. سوسىن اڭشىلىق ونەرى بار. ەكىنىڭ بىرىنە بەرىلە بەرمەيتىن قاسيەت. قالجىڭباستىعى بار. قازىر كوپ كورە بەرمەيمىن. ويتكەنى «قايدا كەتتى؟» دەپ سۇراساڭ «اڭعا كەتتى» دەيدى. قىس بولسا قاسقىردىڭ، جاز بولسا ۇيرەكتىڭ سوڭىنان كەتەدى. كەيدە ساعىنىپ جاتامىز. ىلعي اڭ جاقتا جۇرەدى. نە اتىپ جاتاتىن قايدام، ايتەۋىر اتىپ جاتادى.

سوسىن ات قۇمارلىعى بار. «كوپ اتتارىم بار، مىقتى- مىقتى جانۋارلارىم بار» دەيدى. ءبىراق «توقتاردىڭ اتى كەلىپتى» دەگەندى ءوزىم ەستىگەن ەمەسپىن. ءوزى دە ونەردە، الامان بايگەدە شاۋىپ ءجۇر عوي. ەندى اتتارى كەلسە ەكەن. سونى تىلەيمىن»، - دەپ قالجىڭمەن اياقتادى ءسوزىن مەيرامبەك بەسبايەۆ.