پوليتسيا سەرجانتى ءتارتىپ بۇزۋشىنى قۋامىن دەپ مەرت بولدى

كوكشەتاۋ. قازاقپارات - اقمولا وبلىسىندا جول اپاتىنان پوليتسيا سەرجانتى مەرت بولدى، دەپ حابارلايدى «قازاقپارات» ح ا ا ءتىلشىسى ءى ءى د باسپا ءسوز قىزمەتىنە سىلتەمە جاساپ.

پوليتسەيلەردىڭ مالىمەتى بويىنشا، جول- پاترۋلدىك پوليتسياسىنىڭ سەرجانتى رۇستەم سەرىك ۇلى ايتماعانبەتوۆ اعىمداعى جىلى 26 - جەلتوقسان كۇنى «الماتى ەكاتەرينبور» تاس جولىنىڭ بويىندا جول قوزعالىسى قاۋىپسىزدىگىن باقىلاۋدى قامتاماسىز ەتۋدە قىزمەتتىك مىندەتىن ورىنداۋ ۇستىندە جول اپاتىنا ۇشىراپ، كوز جۇمعان.

«اتالعان جولدىڭ بويىنداعى ارشالى اۋدانى جىبەك جولى اۋىلىنىڭ ماڭىندا جىلدامدىقتى شامادان اسىرعان كولىكتىڭ سوڭىنا تۇسكەن ونىڭ كولىگى جول قورشاۋىنا سوعىلدى. پوليتسيا سەرجانتى رۇستەم ايتماعانبەتوۆ العان دەنە جاراقاتىنان وقيعا ورنىندا كوز جۇمدى»، دەپ كورسەتىلگەن حابارلامادا.

پوليتسيا سەرجانتى رۇستەم ايتماعانبەتوۆ 1992 -جىلدىڭ 14- ناۋرىزىندا تۋعان. ىشكى ىستەر ورگاندارىندا 2014 -جىلدان باستاپ قىزمەت ىستەيدى. بويداق.

 اۆتور: اسلان وسپانوۆ