ۇكىمەتتە مينيستر بيشىمبايەۆتىڭ تىركەۋ كارتوچكاسى ىستەمەي قالدى

استانا. قازاقپارات - ۇكىمەتتىڭ بۇگىنگى وتىرىسىندا ۇلتتىق ەكونوميكا ءمينيسترى قۋاندىق بيشىمبايەۆتىڭ تىركەۋ كارتوچكاسى ىستەمەي قالدى، دەپ حابارلايدى قازاقپارات ءتىلشىسى.

 وتىرىس بارىسىندا مينيسترلەر كابينەتى كەلەسى جىلدا زاڭ قابىلداۋ جۇمىسىنا قاتىستى قاۋلىنى ماقۇلداعان بولاتىن. قۇجاتتى ماقۇلداۋ ءۇشىن بارلىق مينيسترلەر ءوز كارتوچكالارىن سالىپ، داۋىس بەرۋ جۇيەسىنە تىركەلۋى كەرەك. الايدا بىردەن قۋاندىق بيشىمبايەۆتىڭ تىركەلمەگەنى تۋرالى حابار بەرىلدى. مينيستر: «مەنىكى ىستەمەي تۇر»، - دەپ اقتالدى. ارتىنان ءدىن ىستەرى جانە ازاماتتىق قوعام ءمينيسترى ەرمەكبايەۆ مىرزانىڭ دا تىركەۋدەن وتپەگەنى انىقتالدى. وسى كەزدە ۇكىمەت باسشىسى ەكى ءمينيستردىڭ تىركەۋدەن ءوتۋىن سۇرادى. الايدا مينيستر بيشىمبايەۆ تەحنيكانىڭ ىستەمەي قالعانىن تاعى دا العا تارتتى. وعان ۇكىمەت باسشىسى: «ءسىز كارتوچكانى قايتادان سالىڭىز. مىنە، قوسىلدى. ەندى، داۋىس بەرەمىز»، - دەپ كومەكتەستى. سوسىن «جىلدىڭ سوڭىندا كۇش تە قالماعان، تەحنيكا بولسا ىستەپ تۇر، قول دىرىلدەپ تۇر ما» دەپ قالجىڭداپ قويدى.

 اۆتور: ارمان اسقاروۆ