بالا تۋۋىنا بايلانىستى بەرىلەتىن جاردەماقى مەن زەينەتاقى مولشەرىنىڭ قالاي وسەتىنى بەلگىلى بولدى
بۇگىن ق ر دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا بالا تۋۋىنا بايلانىستى بەرىلەتىن جاردەماقى مەن زەينەتاقى مولشەرىنىڭ 2017 -جىلى ارتۋى تۋرالى ناقتى تۇسىندىرمە بەردى.
ق ر د س ءا د م باسشىسى ق ر قارجى مينيسترلىگىمەن بىرلەسىپ جۇرگىزىلگەن ەسەپتى ەسكەرە وتىرىپ، 2017 -جىلعى 1 -شىلدەدەن باستاپ بازالىق جانە ىنتىماقتى زەينەتاقى مولشەرىنىڭ 20 پايىزعا وسەتىنىن حابارلادى.
"2017-2019 -جىلدارعا ارنالعان بيۋدجەتكە سايكەس، ىنتىماقتى زەينەتاقىنىڭ مولشەرى 2017 -جىلعى 1 -قاڭتاردان باستاپ 9 پايىزعا، مەملەكەت باسشىسىنىڭ تاپسىرماسىن ورىنداۋ ماقساتىندا 2017 -جىلدىڭ 1-شىلدەسىنەن تاعى دا 11 پايىزعا ۇلعايتىلادى. ماسەلەن، ەگەر ىنتىماقتى زەينەتاقى مولشەرى 2016 -جىلى 40000 تەڭگە بولسا، 2017 -جىلدىڭ 1 -قاڭتارىنان باستاپ 9 پايىزعا ارتتىرىلىپ، 43600 تەڭگەنى قۇرايتىن بولادى. 2017 -جىلدىڭ 1 -شىلدەسىنەن باستاپ تاعى 11 پايىزعا ۇلعايتىلىپ، جالپى مولشەرى 48396 تەڭگە بولادى. وسىلايشا، 2017 -جىلى ىنتىماقتى زەينەتاقى مولشەرى 2016 -جىلمەن سالىستىرعاندا 20 پايىزعا ۇلعايتىلماق.
بازالىق زەينەتاقى 2017 -جىلعى 1 -قاڭتاردان 7 پايىزعا، مەملەكەت باسشىسىنىڭ تاپسىرماسىن ورىنداۋ ماقساتىندا 2017 -جىلدىڭ 1 -شىلدەسىنەن تاعى دا 13 پايىزعا ۇلعايتىلادى. ماسەلەن، اعىمداعى جىلى ەگەر بازالىق زەينەتاقى مولشەرى 11965 تەڭگە بولسا، 2017 -جىلدىڭ 1 -قاڭتارىنان باستاپ 7 پايىزعا ارتتىرىلىپ، 12802 تەڭگەنى قۇرايتىن بولادى. 2017 -جىلدىڭ 1 -شىلدەسىنەن باستاپ تاعى 13 پايىزعا ۇلعايتىلىپ، جالپى مولشەرى 14466 تەڭگە بولادى. وسىلايشا، 2017 -جىلى بازالىق زەينەتاقى مولشەرى 2016 -جىلمەن سالىستىرعاندا 20 پايىزعا ارتتىرىلادى"، - دەپ حابارلادى تامارا دۇيسەنوۆا.
سونىمەن قاتار، مينيستر 2,1 ميلليونعا جۋىق زەينەتكەردىڭ زەينەتاقىسىن ارتتىرۋ ماقساتىندا رەسپۋبليكالىق بيۋدجەتتەن قوسىمشا 79,8 ميلليارد تەڭگە بولىنەتىنىن اتاپ ايتتى.
جوعارىدا اتالعان وزگەرىستەردى ەسكەرە وتىرىپ، زەينەتاقىنىڭ ەڭ تومەنگى مولشەرى (بازالىق زەينەتاقىنى ەسەپتەگەندە) 2016 -جىلعى 37789 تەڭگەدەن 2017 -جىلعى 1 -شىلدەدە 45711 تەڭگەگە ارتادى. زەينەتاقىنىڭ ورتاشا مولشەرى (بازالىق زەينەتاقىنى ەسەپتەگەندە) 55154 تەڭگەدەن 66721 تەڭگەگە دەيىن ۇلعايادى.
بالا تۋۋىنا بايلانىستى بەرىلەتىن بىر جولعى مەملەكەتتىك جاردەماقى مولشەرى 2017 -جىلعى 1 -قاڭتاردان 7 پايىزعا، ال 2017 -جىلعى 1 -شىلدەدەن تاعى 20 پايىزعا ارتتىرىلادى. ناتيجەسىندە 2017 -جىلى 2016 -جىلمەن سالىستىرعاندا ءوسىم 27 پايىزدى قۇرايتىن بولادى.
«ەگەر اعىمداعى جىلى ءبىرىنشى، ەكىنشى، ءۇشىنشى بالانىڭ تۋۋىنا بايلانىستى بەرىلەتىن بىر جولعى مەملەكەتتىك جاردەماقى مولشەرى 66621 تەڭگە بولسا، 2017 -جىلعى 1-قاڭتاردا 71270 تەڭگە بولىپ، 1 -شىلدەدە 86222 تەڭگەگە دەيىن ارتپاق. اعىمداعى جىلى ءتورتىنشى بالانىڭ تۋۋىنا بايلانىستى بەرىلەتىن بىر جولعى مەملەكەتتىك جاردەماقى مولشەرى 111035 تەڭگە بولسا، 2017 -جىلعى 1 -قاڭتاردا 118 مىڭ تەڭگە بولىپ، 1 -شىلدەدە 142947 تەڭگەنى قۇراماق»، - دەپ ءتۇسىندىردى تامارا دۇيسەنوۆا.
وسى ماقساتتارعا رەسپۋبليكالىق بيۋدجەتتەن كەلەسى جىلى قوسىمشا 1,8 ميلليارد تەڭگە بولىنەدى.
جالپى العاندا، جوعارىدا اتالعان زەينەتاقى مەن جاردەماقى مولشەرلەرىنىڭ ارتۋىنا رەسپۋبليكالىق بيۋدجەتتى ناقتىلاۋ كەزىندە قوسىمشا 81,6 ميلليارد تەڭگە قاراستىرىلماق.
ەستەرىڭىزگە سالا كەتەيىك، اعىمداعى جىلعى 15 -جەلتوقساندا ق ر تاۋەلسىزدىگىنىڭ 25 جىلدىعىنا ارنالعان سالتاناتتى شارادا مەملەكەت باسشىسى 2017 -جىلدىڭ 1 -شىلدەسىنەن زەينەتاقىنىڭ بارلىق مولشەرىن 2016 -جىلمەن سالىستىرعاندا 20 پايىزعا، بالانىڭ تۋۋىنا بايلانىستى بەرىلەتىن بىر جولعى جاردەماقى مولشەرىن 20 پايىزعا ارتتىرۋدى تاپسىرعان بولاتىن.
