توقايەۆ ۇستەل تەننيسى فەدەراتسياسىنىڭ پرەزيدەنتى بولدى
بۇل تۋرالى بۇگىن استانادا فەدەراتسيانىڭ كەزەكتەن تىس وتكەن باسپا ءسوز وتىرىسىندا بەلگىلى بولدى.
بۇل لاۋازىمدا قاسىم-جومارت توقايەۆتىڭ الدىندا باقتىقوجا ىزمۇحامبەتوۆ بولعان ەدى. ودان باسقا، فەدەراتسيانىڭ باسشىلىق ورگانى سايلانىپ، دانيار ءابىلعازين باس حاتشى بولدى.
«ناتيجەلى جۇمىسقا جانە ماعان كورسەتىلگەن سەنىمگە وراي مەن كونفەرەنتسياعا قاتىسۋشىلارعا العىس بىلدىرەمىن. ءبىزدىڭ الدىمىزدا ءتورت جىلدىق جاڭا كەزەڭ باستالدى. 2020-جىلى توكيودا وتەتىن وليمپياداداعى ماڭىزدى جارىستاردا سىنعا تۇسەتىن بولامىز. ۇستەل تەننيسىندەگى ناتيجەلەردى جاقسارتۋ جونىندەگى كۇردەلى دە قيىن جولداردى بىرگە باعىندىرامىز.
سوندىقتان ايماقتارداعى ماتەريالدىق- تەحنيكالىق بازانى نىعايتۋ جانە ايماقتىق فەدەراتسيانى دامىتۋ، جاتتىقتىرۋشىلار قۇرامىنىڭ بىلىكتىلىگىن ارتتىرۋ، ءبىزدىڭ سپورتشىلاردى ساپالى جاتتىعۋ جاعدايلارىمەن قامتاماسىز ەتۋ، حالىقارالىق ىنتىماقتاستىقتى دامىتۋ جانە ۇستەل تەننيسىنەن الەمدىك سپورت ارەناسىندا قازاقستان ورنىن كۇشەيتۋ قاجەت دەپ سانايمىن. فەدەراتسيانىڭ باستى مىندەتتەرىنىڭ ءبىرى - ۇستەل تەننيسىنىڭ ەلىمىزدە كەڭىنەن قانات جايۋىن قامتاماسىز ەتۋ، سپورتتىڭ وسى تۇرىنە بۇقارالىق سيپات بەرۋ بولىپ تابىلادى. سونداي-اق ۇستەل تەننيسىن دامىتۋ سالاسىندا وزىق تاجىريبەلەرمەن الماسۋدى ۇيىمداستىرۋ دا ماڭىزدى»، - دەپ اتاپ ءوتتى ق. توقايەۆ.
كونفەرەنتسياعا قاتىسۋشىلار قازاقستانداعى وسى سپورت ءتۇرىن دامىتۋدىڭ قازىرگى كەزدەگى وزەكتى ماسەلەلەرىن تالقىلادى. سونداي-اق كونفەرەنتسيادا فەدەراتسيانىڭ اتقارۋ كوميتەتىنىڭ جاڭا قۇرامى بەكىتىلدى.
ەستەرىڭىزگە سالا كەتەيىك، بيىل قازاقستان ۇستەل تەننيسىنەن تۇڭعىش رەت وليمپيادا ويىندارىنا جولداما جەڭىپ العان بولاتىن. ريو-دە-جانەيرودا قازاقستان اتىنان كيريلل گەراسيمەنكو سايىسقا تۇسكەن. الايدا، جۇلدەلى ورىنداردان كورىنە المادى.
اۆتور: كۇنسۇلتان وتارباي
