رەسەي حالقى ازا تۇتۋدا
ەل پرەزيدەنتى ۆلاديمير پۋتين قارا تەڭىز ۇستىندە بولعان اۋە اپاتىنا بايلانىستى، وسىنداي شەشىم قابىلدادى.
ودان بولەك، رەسەيلىك كوشباسشى ەل اۋماعىنداعى مەملەكەتتىك تۋلاردى ءتۇسىرۋ؛ مادەنيەت مەكەمەلەرى مەن تەلەراديوكومپانيالارعا ويىن-ساۋىق شارالارى مەن باعدارلامالاردان باس تارتۋ جانە قازا تاپقانداردىڭ وتباسىلارىنا كومەك كورسەتۋ بويىنشا قاجەتتى شارالاردى جاساۋ تۋرالى قاۋلى ەتتى.
جەكسەنبى كۇنى 25- جەلتوقساندا سيرياعا بەت العان تۋ-154 اسكەري ۇشاعى قارا تەڭىزگە قۇلادى. قورعانىس مينيسترلىگىنىڭ حابارلاۋىنشا، ۇشاق بورتىندا 92 ادام بولعان - سەگىز ەكيپاج مۇشەسى جانە 84 جولاۋشى.
جولاۋشىلار اراسىندا سەگىز اسكەري، ۆالەري حاليلوۆ جەتەكشىلىك ەتكەن الەكساندروۆ اتىنداعى ءانساملدىڭ 64 ءارتىسى، ءۇش تەلەارنا وكىلى، اسكەريلەر، «دوكتور ليزا» دەگەن اتاۋمەن تانىمال «ادىلەتتى كومەك» قايىرىمدىلىق قورىنىڭ باسشىسى ەليزاۆەتا گلينكا جانە ر ف قورعانىس مينيسترلىگىنىڭ مادەنيەت دەپارتامەنتىنىڭ باسشىسى انتون گۋبانكوۆ بولعان.
ر ف قورعانىس مينيسترلىگىنە قارايتىن ۇشاق سيريالىق لاتاكياعا رەيس جاساعان. ارتىستەر سيرياداعى جاۋىنگەرلەردى جاڭا جىلمەن قۇتتىقتاۋعا بارا جاتقان. ۇشاق ماسكەۋ ۋاقىتىمەن ساعات 5:20 دا سوچيدەن ۇشىپ، 20 مينۋتتان كەيىن راداردان جوعالعان جانە قارا تەڭىزگە قۇلاعان.
ۆلاديمير پۋتين قايعىلى وقيعانى مۇقيات تەرگەۋگە جانە قازا تاپقانداردىڭ وتباسىنا كومەك كورسەتۋگە ۋادە بەردى. ۇكىمەتتىك كوميسسياعا كولىك ءمينيسترى ماكسيم سوكولوۆ جەتەكشىلىك ەتۋدە.
ر ف كولىك مينيسترلىگىنىڭ مالىمەتتەرىنە سۇيەنسەك، اپاتتا مەرت بولعانداردىڭ ءمايىتىن تانۋ جۇمىستارى ماسكەۋ قالاسىندا جۇرەدى. مەكەمە باسشىسى ىزدەستىرۋ-قۇتقارۋ وپەراتسياسىنىڭ مەرزىمى انىقتالماعاندىقتان، قازا تاپقانداردىڭ تۋىستارى مەن جاقىندارىنا سوچيعا كەلۋدىڭ قاجەتى جوق ەكەنىن حابارلادى.
ازىرگە ماماندار قارا تەڭىزدەگى تۋ-154 ۇشاعى قۇلاعان ورىندى شامامەن بولجاپ وتىر. لاينەردىڭ قۇلاۋى مۇمكىن دەپ بولجانعان ورىنداعى سۋ ءتۇبىن زەرتتەۋ ءۇشىن گيدرولوكاتورلارمەن جابدىقتالعان كەمەلەر ءتۇسىرىلدى. ر ف وڭتۇستىك اسكەري وكرۋگىنىڭ بولىمشەلەرى مەن جەرگىلىكتى توتەنشە قىزمەت بىرلەسىپ، قايعىلى وقيعاعا بايلانىستى زاتتاردى الۋ ءۇشىن جاعالاۋدى تەكسەرىپ جاتىر.
ىزدەۋ ايماعىنداعى سۇڭگۋىرلەر توبى 109 ادامعا دەيىن ۇلعايدى. ماماندار راديولوكاتسيالىق قۇرالداردان مالىمەتتەر الىپ، تۋ-154 ۇشاعىنىڭ ۇشۋ تراەكتورياسىن انىقتادى. «بۇل ۇشاق قۇلاعان اۋداندى ناقتى انىقتاۋعا مۇمكىندىك بەردى. بولجانعان اۋدانداعى ىزدەستىرۋ-قۇتقارۋ وپەراتسياسى تەڭىزدىڭ تەرەڭدىگىمەن جانە تەڭىز ءتۇبىنىڭ بەدەرىمەن قيىنداي ءتۇستى»، - دەپ حابارلادى ر ف قورعانىس مينيسترلىگى.
«اۋە اپاتى اۋدانىنداعى ىزدەستىرۋ-قۇتقارۋ كۇشتەرىنىڭ توبى ۇلعايۋدا. ىزدەستىرۋ-قۇتقارۋ جۇمىستارى ءۇش اۋىسىممەن ءجۇرىپ جاتىر. قۇتقارۋشىلار سانى 3500 ادامعا دەيىن جەتتى»، - دەلىنگەن حابارلامادا.
سونىمەن بىرگە، ارنايى وپەراتسيا ءجۇرىپ جاتقان اۋدانعا 16 سۇڭگۋىر مەن «تايگەر» تەلەباسقارۋ اپپاراتى بار قارا تەڭىز فلوتىنىڭ «ەپرون» قۇتقارۋ كەمەسى كەلە جاتىر. جاقىن ارادا اپات ورنىنا يل-76 ۇشاقتارىمەن رەسەي گەوگرافيالىق قوعامىنىڭ ەكى تەرەڭ سۋاستى اپپاراتى جەتكىزىلەدى.
