كومپوزيتور يليا جاقانوۆ ءان كەشىن وتكىزدى

استانا. قازاقپارات - اتىراۋدا كومپوزيتور، جازۋشى يليا جاقانوۆتىڭ «ەدىل- جايىق» اتتى ءان كەشى ءوتتى. كەشتى اتىراۋ وبلىسىنىڭ تۇرعىندارىمەن جانە قوناقتارىمەن قاتار ايماق باسشىسى نۇرلان نوعايەۆ تا تاماشالادى.

 مەرەكەلىك كونسەرتكە، سونىمەن قاتار اقىن مارالتاي رايىمبەك ۇلى مەن باقۇشتاپ باقتىگەرەيەۆا، قۇرمەتتى تەمىرجولشى امانگەلدى سەلبايەۆ پەن بەلگىلى زاڭگەر بەكەت تۇرعارايەۆ تا كەلدى، دەپ حابارلايدى قازاقپارات ءوڭىر اكىمدىگىنىڭ باسپا ءسوز قىزمەتىنە سىلتەمە جاساپ.

كونسەرتتە كومپوزيتوردىڭ «سول ءبىر ءان»، «تۇنگى سەرەنادا»، «تولاعاي»، «اسەلىم» سىندى اندەرى شىرقالىپ، كورەرمەننىڭ كوڭىلىن ءجىبىتتى. «ونەر ادامدارىنىڭ ەڭبەگىن توننامەن، كەلىمەن، مەترمەن ولشەۋگە بولمايدى. ولاردىڭ جۇمىسىن ەلدەگى بەيبىتشىلىك پەن قوعامداعى تازالىقتان بايقايمىز»، - دەدى ءان كەشىندە ءسوز العان ايماق باسشىسى نۇرلان نوعايەۆ.

 وبلىس اكىمى كومپوزيتور يليا جاقانوۆتى بيىلعى 80 جىلدىق مەرەيتويىمەن قۇتتىقتاي وتىرىپ، ەلباسى اتىنان «قازاقستان رەسپۋبليكاسىنىڭ تاۋەلسىزدىگىنە 25 جىل» مەرەكەلىك مەدالىن تابىستادى. يليا جاقانوۆ - كومپوزيتور، جازۋشى، پۋبليتسيست، مۋزىكاتانۋشى، قازاقستان مەن قىرعىزستاننىڭ ەڭبەك سىڭىرگەن مادەنيەت قايراتكەرى. «ءبىرجان سال»، «اقان سەرى»، «ۇكىلى ىبىراي»، «ەستاي ءانشى» سىندى زەرتتەۋ ەڭبەكتەرىنىڭ، «ىقىلاس» رومانىنىڭ، «قايتا ورالعان ءان»، «قوش بول، ۆالس» پوۆەستەرىنىڭ، حالىق اراسىندا كەڭ تارالعان «اسەلىم ءانىم»، «دانياردىڭ ءانى»، «اققايىڭ»، «جايلاۋكول كەشتەرى» اندەرىنىڭ اۆتورى.