اقجارقىن تۇرلىبايدىڭ اناسى قىزىنىڭ قىتاي تۇرمەسىندەگى ءومىرى تۋرالى ايتتى
كەيىن سوت ونىڭ جازاسىن جەڭىلدەتىپ، بۇگىندە ءىستى قايتا قارا جاتىر دەپ حابارلايدى NUR. KZ پورتالىنىڭ وڭىردەگى ءتىلشىسى.
ارادا ۋاقىت ءوتىپ، تۋىستارى مەن قورعاۋشىلارى بۇل شەشىممەن كەلىسپەي، اپپەلياتسيالىق شاعىم ءتۇسىرىپ، ءۇمىت وتى تۇتاندى. بولجام بويىنشا 2017-جىلدىڭ قاڭتار ايىندا قىزدىڭ الداعى ومىرىنە تۇبەگەيلى نۇكتە قويىلادى.
بۇگىنگى احۋالدى ءبىلۋ ءۇشىن NUR. KZ ءتىلشىسى قاتاڭ ايىپ تاعىلعان بويجەتكەننىڭ اناسى زۋحرا سەيتىموۆامەن ارنايى سۇحباتتاستى. جانارى جاسقا تولىپ جىلاعان انا ادىلدىك ورناپ، قىزىنىڭ اقتالىپ شىعاتىنىنا سەنەدى.
سەنىمگە كىرگەن قۇربى
- زۋحرا مامانحان قىزى، جولداسىڭىز سۇحباتقا تۇبەگەيلى قارسى بولدى. نەلىكتەن؟
- وسىنداي جاعداي ورىن العان كەزدە جۋرناليستەر كەلىپ سۇحبات الدى. الايدا ولار ءبىزدىڭ ءسوزدى ەلگە باسقاشا جەتكىزگەن. ءتىپتى كەيبىرى اقجارقىندى جەڭىل ءجۇرىستى، اكە-شەشەسىنىڭ ايتقانىن ىستەمەيتىن قىز دەپ كورسەتكەن. وسىدان كەيىن تىلشىلەرگە قاتتى رەنجىدىك.
- ارينە، سىزگە قانشالىقتى اۋىرعا سوعاتىنىن بىلەمىز، دەگەنمەن، بولعان جايدى ءوز اۋزىڭىزدان ەستىسەك...
- قىزىم بالا كۇنىنەن ءتىل مەڭگەرۋگە بەيىم بولىپ، الماتىداعى قازاق مەملەكەتتىك قىزدار پەداگوگيكالىق ۋنيۆەرسيتەتىنە ءتۇستى. ەلىمىزدە جاتاقحانا ماسەلەسى قيىن عوي، كۋرستاستارىمەن بىرگە پاتەر جالداپ تۇردى. 3- كۋرس وقىپ جۇرگەنىندە بىزگە اۋىرتپاشىلىق سالمايىن دەپ جۇمىس ىستەدى. پاتەرىندەگى ءبىر كۋرستاسى تۇرمىسقا شىعىپ، ونىڭ ورنىنا دينارا ەسىمدى قىز بىرگە تۇردى. ول اقجارقىنمەن قاتارلاس. ءبىراق، وقىمايدى، جۇمىس ىستەيدى.
مەن ول كەزدە اياعىم اۋىر بولىپ، قىزىما بارا المايتىنمىن. تەك حابارلاسىپ، قاجەتتىلىگىن سالىپ جىبەرىپ وتىردىم. قارشاداي عانا دينارا وزدىگىنشە «اناليز» جاساپ، اقجارقىننىڭ ىزدەۋشىسى جوق دەپ ويلاعان بولۋ كەرەك، ونىڭ ۇستىنە قىزىمنىڭ اقكوڭىلدىلىگى، سەنگىشتىگى بار، بىرگە تۇراتىن ەكى قۇربىسىمەن ۇرىستىرادى. كەيىن اقجارقىن دينارامەن بولەك پاتەرگە شىعادى.
قىزىم ونى جاقىن قۇربىسى ساناپ، سونىڭ ايتۋىمەن تۇنگى كلۋبقا داياشى بولىپ جۇمىسقا تۇرادى. ارادا ءبىر اي وتپەي جان قۇربىسى بولىپ جۇرگەن دينارا الەنا ەسىمدى اپكەسىنە كومەكتەسىپ، قىتايدان تاۋار الىپ كەلىپ، اقجارقىنعا كۇرتەشە، قىمبات ساعات سىيلايدى. مۇنى ەستىگەن مەن دينارادان كۇدىكتەنە باستادىم. قىزىما «بايقاشى» دەپ تە ەسكەرتكەنمىن.
اقجارقىن تاعى دا سول سەنگىشتىگىنە سالىپ، «ول جاقسى قىز» دەپ شىقتى. 2013-جىلدىڭ سوڭىندا اقجارقىن «دينارانىڭ اپكەسى الەنانىڭ اياعى اۋىر بولعاندىقتان قىتايدان تاۋار الىپ كەلۋگە كومەكتەسۋىن ءوتىندى، سول ءۇشىن شەتەلگە شىعۋ ءتول قۇجاتىم كەرەك» دەدى. مەن قارسىلىق تانىتتىم. سالىپ جىبەرمەدىم. ارادا تاعى ۋاقىت ءوتىپ، 2014-جىلدىڭ باسىندا «وقۋ ورنىم پراكتيكاعا جىبەرىپ جاتىر» دەپ قوياردا-قويماي قۇجاتىن الدىرتتى.
ونىڭ ۇستىنە الەناعا دا كومەك بەرەتىنىن ايتتى. الەنامەن تەلەفون ارقىلى سويلەسىپ، ول قىزدارعا ارنالعان قىمبات سومكەلەردى الىپ كەلۋ قاجەتتىگىن ايتىپ، ءمان-جايدى راستادى. مۇنى ەستىگەن اكەسى دە قارسى بولدى. ىشكى تۇيسىگى سەزگەن عوي. كوپ ۋاقىت وتپەي ۆيزا اشتىرىپ، بيلەت العانىن ايتتى. قانشا قارسىلىق تانىتقانىمىزبەن اقىرى جولعا شىقتى. نەگىزى قىزىم ومىرىندە وتىرىك سويلەمەيتىن. بالكىم قۇربىسى جاقسى تابىس تاپقانىن كورىپ، كەلىسكەن بولۋ كەرەك.
قۇزىرلى ورگاننىڭ سالعىرتتىعى دا بار
- وسىنداي جاعدايعا تاپ بولعانىن كىمنەن ەستىدىڭىزدەر؟
- اقجارقىنمەن كۇن سايىن تەلەفونمەن سويلەسىپ وتىراتىنمىن. 2014-جىلدىڭ 9- ناۋرىزىندا بايلانىس مۇلدەم ءۇزىلدى. سارى ۋايىمعا سالىنىپ، تەلەفونىن جوعالتىپ العان شىعار دەپ ويلادىم. ەسىرتكىمەن ۇستالادى دەگەن وي ءۇش ۇيىقتاسام دا تۇسىمە كىرمەدى.
ءۇش كۇندەي حابار بولىپ قالار دەگەن ۇمىتپەن كۇتىپ، 13- ناۋرىزدا الماتىدا بولدىم. قۇزىرلى مەكەمەلەرگە شاعىمداندىم.
ونداعىلار «قىتايعا كەتكەن قىزىڭىزدى ءبىز قايدان تابامىز؟ قازاقستاندا بولسا، ىزدەۋ جاريالايتىن ەدىك» دەپ شىعارىپ سالدى. كونسۋلدىق ارقىلى قىتايعا حات جولدادىم. رەسمي حات كەلمەي تۇرىپ-اق ونداعىلار ماعان ءمان-جايدى جەتكىزدى. ال وعان دەيىن تەلەفونىما قازاقستاندىق بەيتانىس ءبىر نومىردەن الدەكىم « قىزىڭىز وسىنداي قاتەرگە ۇشىرادى» دەپ حابارلاما جىبەردى. قايتا قوڭىراۋ شالعانىمدا «ماعان حابارلاسپاڭىز» دەپ سول كۇيى تىلدەسە المادىم.
ال قۇربىسى بولىپ جۇرگەن دينارا ەشنارسە بىلمەيمىن دەپ شىقتى. ايتقانى، دجونني ەسىمدى جىگىت اقجارقىنعا بيلەت الىپ، شىعارىپ سالعان. ونى ەستىپ مەن «ول قارا ءناسىلدى جىگىت قايدان شىقتى؟» دەپ تاڭ قالدىم. بەلگىلى بولعانداي، گۋانجوۋ اۋەجايىندا الەنانىڭ كۇيەۋى اقجارقىندى كۇتىپ الىپ، تاۋار ءالى دايىن بولماعاندىقتان، ءبىر كۇنگە قوناق ۇيگە ورنالاستىرعان.
ەرتەڭىنە سومكەلەردى اقجارقىنعا ۇستاتىپ، اۋەجايعا الىپ كەلگەن. سول ساتتە شاباداننىڭ ىشىنەن 4,5 كەلى ەسىرتكى تابىلىپ وتىر. ەسىرتكى شاباداننىڭ ىشىندەگى تىگىلگەن قالتاشاعا جاسىرىنىپ سالىنىپتى. ال قىزىم ودان مۇلدەم بەيحابار بولعان.
قىزىمنىڭ قامالۋىنا وسىنداي ادامداردىڭ قاتىسى بار دەپ پروكۋراتۋراعا شاعىم ءتۇسىردىم. اقجارقىننىڭ ءبىر دوسى دجوننيدى كورگەن ەكەن. ونى ەرتىپ الىپ، الماتىنىڭ تۇنگى كلۋبتارىنان نيگەريالىق جىگىتتى ىزدەدىك. قاتەلەسپەسەم، «پرايم» دەگەن كلۋبتىڭ ىشىنەن دجوننيدى كەزدەستىرىپ، سول ساتتە ىشكى ىستەر بولىمىنە حابارلاسقانىمدا، ونداعىلار «بىزدە ازىرگە بوس پاترۋل كولىگى جوق، ءوزىڭىز الىپ كەلىڭىز» دەدى.
تۋىستارىمنىڭ كولىگىمەن الگى دجوننيدى ىشكى ىستەر بولىمىنە سۇيرەپ الىپ باردىم. ونداعىلار تەك سۇراۋ الىپ، بوساتا سالدى.
اقجارقىننىڭ ءوزى بولماي، ونى قاماۋعا الا المايدى. ءبىر قىزىعى، قۇزىرلى مەكەمەدە وتىرعاندارعا دجونني قۇجاتىن جوعالتىپ العانىن ايتتى. شەت ەلدەردە وزگە ەلدىڭ ازاماتى قۇجاتسىز جۇرسە، بىردەن قاماپ قويادى عوي. ال بىزدە ونداي ەمەس ەكەن. كەيىن دجونني قاشىپ كەتكەن. ءى ءى ب- ءنىڭ سالعىرتتىعى بولىپ تۇر عوي بۇل جەردە...
- اقجارقىننىڭ ىسىنەن سوڭ تۋرا ءسىزدىڭ قىزىڭىز سەكىلدى رەسەيلىك بىرنەشە بويجەتكەن دە نيگەريالىق مافيانىڭ قۇربانى بولعانى تۋرالى اقپارات تارادى. حابارىڭىز بار ما؟
- ەستۋىمشە، ءۇش قىز وسىنداي جاعدايعا تاپ بولعان ەكەن. ونىڭ ءبىرى رەسەيدىڭ جۋرناليست قىزى. وعان ءبىر تانىسى گونكونگ اۋەجايى ارقىلى رەسەيگە كىتاپ جەتكىزىپ بەرۋىن وتىنگەن. كىتاپتاردىڭ اراسىندا ەسىرتكى زاتى بولعان. ودان كەيىن تاعى ءبىر رەسەيلىك قىز تايلاند اۋەجايىندا ۇستالدى. بۇگىندە ول قىزبەن حابارلاسىپ تۇرامىن. ونىڭ كىناسىز ەكەندىگى دالەلدەنىپ، اقتالىپ شىقتى.
قىتايلىقتار دا اقجارقىننىڭ كىناسىزدىگىنە سەنىمدى...
- اقجارقىنىنىڭ قىتاي اباقتاسىندا بولعانىنا از ۋاقىت وتپەدى. قانشا رەت كەزدەستىڭىز؟
- ەكى-اق رەت كەزدەستىم. ءۇش جىلعا جۋىق ۋاقىتتىڭ ىشىندە پەرزەنتىڭدى ەكى-اق رەت كورۋ - قانداي اۋىر... قىتايدىڭ سوتى مەن پروكۋرورلارى ەسىرتكى زاتىمەن ءىستى بولعاندارعا وتە قاتال قارايدى. العاشقى سوت وتىرىسىندا قىزىممەن سويلەستىرمەك تۇگىلى، ءتىپتى ماڭىنا دا جولاتپادى. سوتقا «سەنى دە انا تۋعان شىعار» دەپ تىزەرلەپ جالىندىم. اقجارقىنىم كوزىنىڭ قيىعىمەن قاراپ وتىردى. «مىقتى بولىڭىز»، - دەپ ءبىر-اق اۋىز ءسوز ايتتى.
قيىن جاعدايعا تاپ بولعان بالاپانىم ماعان وسىنداي جۇباتۋ ايتتى (كوزىنە جاس الىپ). «ءومىر بويىنا باس بوستاندىعىنان ايىرىلۋ» جازاسى تاعايىندالعانىن ەستىگەندە ەسىمنەن تانىم قالدىم.
ادۆوكاتتارى اپپەلياتسيالىق سوتقا شاعىمدانۋ مۇمكىندىگى قالعانىن ايتقاندا بويىمدا ءۇمىت وتى تۇتاندى. ال ەكىنشى سوت وتىرىسىندا اۋىر جازا الىنىپ، ءىس قايتا قارالدى. سوڭعى سوت وتىرىسى قاراشا ايىنىڭ باسىندا بولدى. ءبىراق، شەشىم شىقپادى.
جەلتوقساننىڭ سوڭىندا بولىپ قالادى دەگەن، ءالى حابار جوق. قاڭتاردىڭ باسىندا ۇكىم شىعادى دەپ كۇتىپ وتىرمىز. ارينە، اقتالىپ شىعادى دەگەن ءۇمىت باسىم. ەگەر جازا تاعايىندالسا، ەلدە وتەۋ (ەكستراديتسيالاۋ) جايى قارالادى. كەيىنگى وتىرىستاردا سوتتىڭ اقجارقىنعا دەگەن كوزقاراسى وزگەرگەنىن بايقادىم. ولار دا قىزىمنىڭ كىناسىز ەكەنىنە كوزدەرىن جەتكىزگەن بولۋ كەرەك.
ونىڭ ۇستىنە اۋەجايداعى باقىلاۋ كامەراسىنداعى جازبانى كورگەن قىتايدىڭ پسيحولوگتارى اقجارقىننىڭ سومكەسىندە ەسىرتكى زاتى بار ەكەنىنەن بەيحابار ەكەنىن دە راستادى. ونىڭ ءوزىن ءوزى ۇستاۋ ارەكەتىنەن سوڭ سونداي شەشىم شىعارعان.
- قورعاۋشىلارى اقتالىپ شىعۋ مۇمكىندىگىن قالاي باعالاپ وتىر؟
- اقجارقىندى اقتاپ شىعۋعا قاجەتتى بارلىق دالەلدەردى سوتقا ۇسىنعانىن ايتتى. ونىڭ ۇستىنە بۇل ىسكە قاتىسى بار ادامداردان الىنعان جاۋاپتار سىرتقى ىستەر مينيسترلىگى ارقىلى قىتاي سوتىنا جولداندى. تۋرا وسىنداي جاعدايدىڭ قۇربانى بولعان وزگە ەلدىڭ قىزدارىنان دا جاۋاپتارى الىندى.
ەلباسىدان اراشا سۇرادىم...
- سىرتقى ىستەر مينيسترلىگى تاراپىنان تاعى قانداي قولداۋ كورسەتىلىپ جاتىر؟
- قىزىم ءىستى بولعان ساتتە ءى ءى د، پروكۋراتۋراعا شاعىمدانىپ، اقىرى بولماعان سوڭ سىرتقى ىستەر ءمينيسترى ەرلان ىدىرىسوۆتىڭ قابىلداۋىندا بولىپ، ول كىسى قولىنان كەلگەن كومەكتىڭ ءبارىن جاسايتىنىن ايتتى. ەلباسىدان اراشا سۇراپ، حات تا جازدىم. ونىڭ كومەكشىلەرى قابىلدادى. تالاي ەسىكتى قاققان سوڭ قىتايدا سوتتالعانداردى ەلگە ەكستراديتسيالاۋ ماسەلەسى قارالىپ، وڭ شەشىم شىقتى.
بۇعان دەيىن ءبىزدىڭ ەل قىتايدا سوتتالىپ جاتقان قازاقستاندىقتاردىڭ ناقتى سانىن دا بىلمەيتىن بولىپ شىقتى. كەيىن ءبىلدىم، گۋانجوۋ اباقتىسىندا جاتقان التى قازاقستان ازاماتى اۋىر جازاعا تارتىلعان . ونىڭ كەيبىرى جاقىندا ەلگە ەكستراديتسيالاندى.
قازاقستاننىڭ سىرتقى ىستەر مينيسترلىگى ۆيزا جاعىنان كومەكتەسىپ جاتىر. ەلشىلىك جاقسى ادۆوكات تابۋعا كەڭەسىن بەردى. ءتىپتى ونداعىلار ۇكىمەت ءوزى تاعايىنداعان اقىسىز قورعاۋشىلار ءىستى تەزىرەك جاۋىپ تاستايتىنىن، مۇمكىندىگىنشە اقىلى ادۆوكات جالداۋ قاجەتتىگىن دە ايتتى. سەبەبى اقشاسىن العاندار بارىنشا ءىستى سوڭىنا دەيىن جەتكىزەدى.
- ادۆوكاتتارعا قانشا تولەدىڭىز؟
- قىتايلىق قوس قورعاۋشى قىزىمنىڭ ىسىمەن اينالىسىپ جاتىر. ونىڭ ءبىرى اعىلشىن جانە ورىس تىلدەرىن جەتىك مەڭگەرگەن، ال ەكىنشىسى قىتاي تىلىندە سويلەيدى.
قورعاۋشىلاردىڭ بۇل قىزمەتىنە 10 مىڭ ا ق ش دوللارىن بەردىم. ءبىر باۋىرىم 1600، ەكىنشىسى 1000 ا ق ش دوللارىن بەردى. ۇيدەگى زاتتاردى ساتتىق. كەيىن ءۇيىمىزدى دە ساتىپ، جەتپەگەن قارجىنى نەسيە الىپ تولتىردىق.
اللانىڭ قاراسقانى عوي، قورعاۋشىلارى مەنىڭ جاعدايىمدى ءتۇسىنىپ وتىر. ال قازاقستاندا سۇڭقار نۇرماعانبەتوۆ ەسىمدى زاڭگەر اقىسىز اراشا بولىپ ءجۇر.
- ەكىنشى وتىرىستا اقجارقىن سوت پروتسەسىنىڭ قىتاي تىلىندە ءوتۋىن قالاپتى. ءتىلدى سول جاقتا مەڭگەرگەن بە؟
- ول ستۋدەنت كەزىندە قىتاي يەروگليفتەرىن ۇيرەنىپ جۇرگەن. ەركىن سويلەۋدى قىتايدا مەڭگەردى. مۇنىسىن ەستىگەن مەن قىزىما «نە دەگەنمەن ءتىلىڭ باسقا. قانشا ۇيرەنگەنىمەن، اۋدارماشىدان باس تارتپاساڭشى» دەپ اقىلىمدى ايتقانىمدا، «اۋدارماشى مەنىڭ ويىمدى دۇرىس جەتكىزە المايدى» دەدى.
- وتاندىق اقپارات قۇرالدارىنىڭ بىرىنەن «اقجارقىن اناسىنان كوزىلدىرىك، كىتاپ الدىرىپتى» دەگەندى وقىدىق...
- ءيا، وزگە ەلدە، ونىڭ ۇستىنە ول جاقتا قازاقتار قايدان بولسىن، ءتىلىن ۇمىتپاسىن دەپ قازاق تىلىندەگى كىتاپتاردى قورعاۋشىسى ارقىلى بەرىپ جىبەرگەنمىن. ويتكەنى مەنىڭ ونىمەن كەزدەسۋىمە بولمايدى. تالاپ سونداي. الايدا ءبىزدىڭ ءتىلدى بىلمەگەندىكتەن، تەك اعىلشىن تىلىندەگى كىتاپتارعا رۇقسات بەرىپ، سۇراعان تۋىندىلارىن جەتكىزىپ بەردىم. ال كوزىلدىرىككە، ونىڭ بۇرىننان كوزى ناشار كورەتىن. قازىر جاعدايى تىپتەن قيىنداعان عوي.
قورعاۋشىسى ارقىلى بارلىق قاجەتتىلىگىن جىبەرىپ وتىرامىن. ءتىپتى تاماعىنا قاجەتتى قارجىنى دا. قورعاۋشىلارىمەن كەزدەسكەندە بىزگە «ءبارى جاقسى بولادى، شىندىقتىڭ جەڭىپ شىعاتىنىنا سەنەمىن» دەپ سالەمدەمە ايتىپ جىبەرەدى. بالاپانىم ءبىزدى ۋايىمداماسىن دەيتىن شىعار. كىشى ىنىسىنە الاڭداۋلى. ءسابي كەزىندە كورگەن عوي.
«اناشىم، ءال-فارابي ءوسىپ قالعان شىعار؟ مەنى سۇرايدى ما؟» دەيدى. سوڭعى بارعان كەزىمدە اتا-اجەسىن سۇرادى.
اقجارقىن سولاردىڭ قولىندا تاربيەلەنگەن عوي. بارىنەن دە سول كىسىلەرگە اۋىر ءتيىپ جاتىر. قاراشا ايىنداعى سوت وتىرىسىندا جاساعان ۆيدەو ۇندەۋىن كورگەن ولار تىپتەن قينالدى.
قىزىمنىڭ كوزى مۇڭعا تولى
- اقجارقىننىڭ بويىنان قانداي دا ءبىر وزگەرىستەردى بايقادىڭىز با؟
- سالماق تاستاماعان. سول قالپى. قارشاداي عانا بالاپانىم وندا جاتىپ ەسەيگەن. كوزى مۇڭعا تولى...
- باۋىرلارىنا توقتالىپ كەتىڭىزشى...
- وزىنەن كەيىن ەكى ءىنىسى مەن ءبىر ءسىڭلىسى بار. ەكەۋى دە ستۋدەنت. ۇلىم ءوزى جۇمىس ىستەپ، وقۋىن تولەپ ءجۇر. قىزىم گرانتتا وقيدى. ۇيدە كەنجە بالاما اقجارقىنىمنىڭ سۋرەتىن قۇشاقتاپ، «بۇل سەنىڭ اپكەڭ. الىستا. وقۋعا كەتكەن» دەپ وتىرامىن.
- قىتايدا قازاقستان سەكىلدى جازاسىن وتەۋشىلەردى تاماقتاندىرۋعا مەملەكەتتەن قارجى بولىنبەيدى مە سوندا؟
- نەگىزى تەگىن تاماق بەرىلەدى ەكەن. ءبىراق، «جۋىندى» سەكىلدى. « قىزىمنىڭ تاماعى دۇرىس بولسىن» دەپ اقشاسىن تولەپ وتىرمىز. ءبىزدىڭ ۆاليۋتامەن شاققاندا ايىنا 50 مىڭ تەڭگە. كوبى سولاي جاسايدى ەكەن.
ماتەريالدىق كومەك قاجەت
- اي سايىنعى تاماعى، سوت وتىرىسىنا بارۋ دا قوماقتى قاراجاتتى قاجەت ەتەدى. قولداۋ كورسەتىپ جاتقاندار بار ما؟
- ارينە، سونشا قارجىنى تابۋ قيىن. سوڭعى سوت ۇكىمى وقىلاتىن كۇنگە بارىپ-قايتۋىما 350 مىڭ تەڭگەدەن قارجى كەرەك. ءالى ونداي قارجى جيناپ ۇلگەرمەدىم. ءوزىم مەدبيكەمىن، اكەسى قۇرىلىس مەكەمەسىندە جۇمىسشى. العان جالاقىمىزعا نەسيە تولەپ وتىرمىز. جاقىندا دۋبايدان ءبىر قىز حابارلاسىپ، 60 مىڭ تەڭگە سالىپ جىبەردى. شەت ەلدە ءجۇرىپ، قىزىما الاڭداعان ول قىزعا العىسىمدى ايتامىن.
- ار جەرگىلىكتى ازاماتتار، بيلىك حابار الدى ما؟
- ءسوز دەمەۋىن جاساپ، مورالدىق تۇرعىدا قولداۋ ءبىلدىرىپ جاتقاندار بارشىلىق. ال بيلىكتەن ەشكىم كەلگەن دە، حابارلاسقان دا جوق.
- قۇربىسى بولىپ جۇرگەن دينارا قازىر قايدا؟ سويلەسىپ تۇراسىز با؟
- بىلمەيمىن. اللا بۇيىرتىپ، اقجارقىنىم اقتالىپ شىعىپ جاتسا، ونىڭ ۇستىنەن شاعىمدانبايمىز، بولعان جاعدايدى قايتا قوزعامايمىز دەپ وتىرمىز.
- « قىزىم قىتايعا بارماي تۇرىپ، كەلەڭسىز وقيعانىڭ بولاتىنىن سەزدىك» دەپ ايتىپ قالدىڭىز. انا جۇرەگى ءدال قازىرگى ساتتە قانداي بەلگى بەرىپ جاتىر؟
- قىزىمنىڭ اقتالىپ شىعاتىنىنا سەنەمىن. اكەسى دە « قىزىم قۇداي قالاسا كەلەدى» دەپ وتىر... بۇل جاعداي اكەسىنە قاتتى اۋىر ءتيدى. ەركەكتەر ءبىز سەكىلدى ەمەس قوي. جىلاي دا المايدى. قاتتى كۇيزەلىپ، ىشىمدىك ءىشىپ كەتتى. كەيىن 2-3 ايداي سىرقاتتانىپ، نامازعا جىعىلدى. ءوزىم دە بۇرىن ناماز وقىمايتىنمىن. قازىر بەس ۋاقىت نامازىمدى قازا قىلمايمىن.
- ەلگە ايتارىڭىز بار ما؟
- ومىردە قانشا ادام بولسا، سونشا پىكىر بار. «مەنىڭ قىزىم ولاي جاساماعان» دەپ ەشكىمنىڭ ويىنا بۇيرىق بەرە المايسىڭ. شىن مانىندە ءبىزدىڭ جاعدايدى ءتۇسىنىپ، ءسوز دەمەۋىن ءبىلدىرىپ جاتقاندارعا مىڭ العىسىمدى ايتامىن. ويتكەنى «اينالايىن» دەپ ايتقان ءبىر اۋىز جىلى ءسوزدىڭ ءوزى - ۇلكەن قولداۋ. سوڭعى ءۇمىت سوتتا. ءادىل شەشىم شىعارادى دەگەن ويدامىن. ۇمىتتەنەمىن، ءۇمىتىمدى ۇزبەيمىن. سەبەبى اقجارقىنىم - مەنىڭ بالاپانىم عوي!
اقپارات رەتىندە ايتا كەتەيىك، اقجارقىن تۇرلىبايدىڭ وتباسى وڭتۇستىك قازاقستان وبلىسى، ماقتارال اۋدانىنداعى شاعىن عانا اۋىلدا تۇرادى. قازاقتىڭ قارشاداي عانا قىزىنىڭ وتباسىنا قارجىلاي كومەك بىلدىرەمىن دەيتىندەر بولسا، تومەندەگى نومىرگە حابارلاسۋلارىن سۇرايمىز.
سەيتيموۆا زۋحرا ماماحانوۆنا
بايلانىس تەلەفونى: 87024381671
بانكتەگى ەسەپشوت ءنومىرى:
5128015203093145 كازكوم
720218402915 يين
