جاڭا جىلداعى استانا كەلبەتى - فوتو
استانا قالالىق مادەنيەت باسقارماسىنان قازاقپارات تىلشىسىنە حابارلاعانداي، بيىلعى جاڭا جىلدا قالا كوك ءتۇستى سيپاتقا يە بولىپ وتىر.
«ەلوردانى جاڭا جىلعا دايىنداۋ ءۇشىن ءار جىلدا جاڭا تۇجىرىمداما ازىرلەنەدى. جىل سايىن جاڭا تۇستەر قوسىلىپ، جاڭا كونسترۋكتسيالار ويلاپ تابامىز. بيىلعى جىلدىڭ ءتۇسى - كوگىلدىر ءتۇس. ايتا كەتەيىك، استانانى جاڭا جىلعا دايىنداۋ كەزىندە وتكەن جىلدان قالعان بۇيىمداردى دا پايدالانامىز»، - دەپ حابارلادى مادەنيەت باسقارماسىنىڭ باسپا ءسوز قىزمەتىنەن.
استانانىڭ جاڭاجىلدىق كەلبەتى تۇرعىندار مەن قوناقتاردى تاڭعالدىرىپ ۇلگەردى. ماسەلەن، قالانىڭ بىرنەشە كوشەسىندە ورناتىلعان ارحيتەكتۋراسى مەن ءپىشىنى ەرەكشە 3D فورماتتى بەزەندىرۋلەر، «سيقىرلى كۇركە»، «مۇز بۇعىسى» سياقتى 20 ءتۇرلى «سيقىرلى» فورمالار، سونداي-اق «قازاق ەلى» مونۋمەنتى، «وتان قورعاۋشىلار» الاڭى، جاڭا وقۋشىلار سارايى مەن سارىارقا اۋداندىق اكىمدىگى الدىنداعى الاڭداردا بوي تەپكەن فونتان ىسپەتتى كونسترۋكتسيالار.
«سونداي-اق، بيىل كوشە بويىنداعى اعاشتار دا جاڭاشا اشەكەيلەنەدى. قالانىڭ سانىنە ۇيلەسىپ، اعاشتاردىڭ بويىنا جارىق ديناميكالىق شارلار، جۇلدىزشالار مەن ويىنشىقتار ءىلىندى. «استانا» كونسەرت زالىنىڭ (بۇرىنعى كونگرەسس-حولل - اگەنتتىك) الدى مەن باۋىرجان مومىش ۇلى داڭعىلىنىڭ بويىنا، «كەرۋەن» ساۋدا ورتالىعىنىڭ الدىنا تۋننەل سىندى جارىق ينستاللياتسيالار ورناتىلدى»، - دەپ حابارلادى مادەنيەت باسقارماسىنان.
ال، «بايتەرەك» الاڭىنىڭ الدى «ساراي قاقپاسى» اتتى جارىق يلليۋميناتسيالىق كومپوزيتسيامەن تولىعىپ تۇر. كوپتەگەن عيماراتتار مەن ساياباقتاردىڭ الدى «ەكسپو-2017» كورمەسىنىڭ تاقىرىبىنا ساي اشەكەيلەنگەن.
«ەسىل وزەنىنىڭ جاعاسىن ساندەۋگە ەرەكشە كوڭىل بولەمىز. جالپى، استانا قالاسى بويىنشا بيىل 37 شىرشا كونسترۋكتسياسى ورناتىلدى»، - دەپ تولىقتىردى باسقارمانىڭ باسپا ءسوز قىزمەتىنەن.
اۆتور: كەنجەكەي توقتامۇرات قىزى
