قىتاي ەكونوميكاسى سىر بەردى مە؟
«مىزعىماس قىتاي ەكونوميكاسى سىر بەردى» دەسەدى ساراپشىلار. ەكىنشى ءبىر ساراپشىلار «جوق دەسەدى. - قىتاي ەكونوميكاسى مىعىم. بۇل وتاندىق وندىرۋشىلەردى قولداعانى» دەسە، ءۇشىنشى ءبىر ساراپشىلار «قىتاي ۆاليۋتالىق سوعىستى باستادى» دەگەندى ايتادى.
بولجام سان ءتۇرلى. ءبىراق ءبىر اقيقات دۇنيە، رەسمي بەيجىڭ يۋاندى بەكەر قۇنسىزداندىرىپ وتىرعان جوق. ونىڭ ارتىندا ۇلكەن ساياسات جاتقانى بەلگىلى. ءبىر جىل ىشىندە قىتاي يۋانى دوللارعا شاققاندا 4 پايىزعا قۇنسىزدانعان. «ەگەر دە قىتاي وسىلاي جالعاستىرا بەرەتىن بولسا، الەمدىك ەكونوميكاعا قاۋىپ تونەدى» دەيتىندەر دە بار.
ساراپشىلار «بۇل شارا يۋاننىڭ ارى قاراي دا نىعايۋىن بولدىرماۋ ءۇشىن جاسالعان بولۋى مۇمكىن» دەگەن ءادىل باعا ايتۋدا. يۋاننىڭ نىعايۋىنا جول بەرسە، ميلليونداعان ادام جۇمىس ىستەيتىن، ەكسپورتقا باعىتتالعان ونەركاسىپ سالاسىندا جۇمىسسىزدىق دەڭگەيى ارتۋ قاۋپى تۋىندايدى.
ۆاليۋتانىڭ كۇشەيۋى ەكسپورتتىڭ قىمباتتاۋىنا، ودان ارى باسەكەگە قابىلەتتىلىك دەڭگەيىنىڭ تومەندەۋىنە ىقپال ەتەدى. ولاي بولسا، رەسمي بەيجىڭ دۇرىس قادام جاسادى دەۋگە بولادى. تاعى ءبىر ماسەلە، قىتايدىڭ قارجى سالاسىنداعى وزگەرىستەرى ا ق ش- تىڭ جاڭا سايلانعان پرەزيدەنتى دونالد ترامپتىڭ وسى ەلگە بايلانىستى ۇستانىمىنان تۋىنداۋى دا مۇمكىن.
ترامپ قىتايدى «1№ جاۋ» دەپ ساناۋىمەن قاتار، بۇل ەلگە قارسى ساۋدا-ساتتىق قاتىناسىنا دا ۇلكەن وزگەرىس ەنگىزۋگە تىرىسۋدا. ءتىپتى ترامپتىڭ ۇلتتىق ساۋدا كەڭەسىنىڭ باسشىسى ەتىپ قىتايعا قىرىن قارايتىن پيتەر ناۆاررونى تاعايىنداۋىندا دا گاپ جاتىر.
وسىنىڭ ءبارىن تارازىعا تارتقان اسپاناستى ەلى قالاي دا ءوز ەكونوميكاسىن ساقتاپ قالۋ ءۇشىن، بارلىق سالادا رەفورمالار جاساۋعا تىرىسىپ باعۋدا. ال، يۋاننىڭ جاڭا ديەۆالۆاتسياسى سونىڭ ءبىر كورىنىسى بولۋى مۇمكىن.
«ايقىن»
