قىزىلوردالىق كاسىپكەر كۇن مەن جەلدەن قۋات كوزىن ءوندىرىپ، شارۋاسىن دوڭگەلەتىپ وتىر

قىزىلوردا. قازاقپارات - سوڭعى جىلدارى اۋىلداعى اعايىننىڭ دا ەڭسەسى كوتەرىلە تۇسكەنى بەلگىلى.

مەملەكەت تاراپىنان جاسالىپ جاتقان ءتۇرلى جەڭىلدىكتەر دالا پەرزەنتتەرىنىڭ كاسىبىن وركەندەتۋىنە ايتارلىقتاي سەپتىگىن تيگىزۋدە. سونىڭ ءبىرى - بەرىك سۇلتانبەكوۆ باسشىلىق جاسايتىن «ايزات» شارۋا قوجالىعى.

بۇل تۋرالى قازاقپارات ءتىلشىسى قازالى اۋداندىق اكىمدىگىنە سىلتەمە جاساي وتىرىپ حابارلادى. مايداكول اۋىلىنىڭ اۋماعىندا، ارال تەڭىزى بەتكەيىندە ورنالاسقان شارۋا قوجالىعى ءوزىنىڭ جۇمىسىن مۇنان ءبىرشاما ۋاقىت بۇرىن باستاعان بولاتىن.

العاشقىدا «اۋىل شارۋاشىلىعىن قارجىلاي قولداۋ» قورىنان ءتورت ميلليون تەڭگە نەسيە العان كاسىپكەر ازامات شارۋاسىن دوڭگەلەنتىپ اكەتتى. ءمۇيىزدى ءىرى قارا، قوي، ەشكى، جىلقى وسىرەتىن شارۋا قوجالىعى ەگىن ەگۋمەن دە اينالىسادى.

اعىمداعى جىلى شارۋا قوجالىعى ب ۇ ۇ دامۋ باعدارلاماسىنىڭ پيلوتتىق جوباسى اياسىندا قۇنى 7,5 ميلليون تەڭگەنى قۇرايتىن كۇن جانە جەل ارقىلى قۋات كوزىن وندىرەتىن قۇرىلعى جانە تاۋلىگىنە 150 ليتر سۋ تۇشىتاتىن قوندىرعى الدى.

بۇعان قوسا حالىقارالىق «ارالدى قۇتقارۋ قورىنىڭ» قارجىسىنا شاحتالىق قۇدىق ورناتىلدى. بۇعان دەيىن شالعايداعى ۋچاسكەنىڭ سۋى تۇزدى، كەرمەك بولعاندىقتان اۋىز سۋ جايى وزەكتى بولىپ كەلگەن ەدى.

ەندى تىعىرىقتان شىعار جول تابىلدى. وعان قوسا تۇنەمەلىكتە ماي شاممەن وتىراتىن كۇندەر دە ارتتا قالدى. «يەن دالادا جارىق جانىپ، اۋىز سۋ ماسەلەسى شەشىمىن تاپتى. كۇندەلىكتى تۇرمىسقا قاجەتتى تۇتىنۋ بۇيىمدارىن پايدالانىپ وتىرمىز. بۇل - ەل تاۋەلسىزدىگىنىڭ ارقاسى»، - دەيدى ىسكەر جان.

اۆتور: ەلۋباي اۋەزوۆ