استانادا قىسقى سىرعاناۋ ماۋسىمى باستالدى- فوتو
استانا اكىمدىگىنىڭ باسپا ءسوز قىزمەتى حابارلاعانداي، قالاداعى بارلىق اشىق مۇز ايدىنىنداردا كونكي مەن شانانى جالعا بەرۋ باعاسى ساعاتىنا 500 تەڭگە بولادى.
«قىستا، تازا اۋاداعى دەمالىستى قولجەتىمدى ەتۋ ءۇشىن كونكيلەر مەن شانالاردى جالعا بەرۋ باعاسى دا ساعاتىنا 500 تەڭگە بولىپ بەكىتىلدى. مۇز ايدىندارىنىڭ اۋماعىندا ءدامحانا مەن مەديتسينالىق پۋنكت جۇمىس ىستەيدى»، - دەپ حابارلايدى اكىمدىكتىڭ باسپا ءسوز قىزمەتى.
ال، «اقبۇلاق» وزەنىنىڭ ۇستىنە سالىنعان مۇز ايدىننىڭ اشىلۋىندا «الماتى» اۋدانى اكىمىنىڭ اپپاراتى، استانا قالالىق دەنە شىنىقتىرۋ جانە سپورت باسقارماسى مەن سپورتتىق شارالاردى ۇيىمداستىرۋ ديرەكسياسى ديسكوتەكا مەن حوككەي جارىسىن ۇيىمداستىردى.
ايتا كەتەيىك، بۇگىن استانادا «اراي» ساياباعى ماڭىندا دا اۋماعى 5 مىڭ شارشى مەتردى قۇرايتىن مۇز ايدىنى اشىلدى. «ەسىل» اۋدانى اكىمدىگىنىڭ اپپاراتى مۇز ايدىندى جارىق بەرىپ تۇراتىن يلليۋميناتسيالىق قوندىرعىمەن جابدىقتاعان جانە وندا قالىڭ كوپشىلىكتىڭ كوڭىل- كۇيىن اسەم دە سازدى اۋەن سۇيەمەلدەپ تۇرادى.
«سارى ارقا» اۋدانىنا قاراستى تاعى ءتورت مۇزايدىن الداعى كۇندەرى اشىلادى دەپ كۇتىلۋدە. اتاپ ايتساق، «سارى ارقا» اۋدانىنىڭ اكىمدىگى قالالىق اكىمدىك الدىنداعى الاڭدا، قوسشىعۇل ۇلى كوشەسىندە («سولتۇستىك» ساۋدا ورتالىعىنا قاراما- قارسى)، «كوكتال» تۇرعىن ءۇي القابىنداعى «ناز» تەاترىنىڭ الدىندا، «ءوندىرىس» تۇرعىن ءۇي القابىنداعى 49 مەكتەپ الدىندا مۇز ايدىنىن اشۋعا دايىندالىپ جاتىر.
حوككەي وينايمىن دەگەن وقۋشىلار ءۇشىن «استانا» سپورت كەشەنىنىڭ جانىنان جاڭا حوككەي كورتى اشىلماق.
اۆتور: كەنجەكەي توقتامۇرات قىزى
