يسەكەشيەۆ استانا اۋەجايىنداعى جاڭا تەرمينالدىڭ قۇرىلىس بارىسىمەن تانىستى

استانا. قازاقپارات - استانا قالاسىنىڭ اكىمى اسەت يسەكەشيەۆ كەشە استانا حالىقارالىق اۋەجايىنداعى جاڭا تەرمينالدىڭ قۇرىلىسىمەن تانىستى. بۇل تۋرالى قالا باسشىسى ءوزىنىڭ الەۋمەتتىك جەلىدەگى پاراقشاسىنا جازعان،

 دەپ حابارلايدى قازاقپارات ءتىلشىسى.

«بۇگىن اۋەجايدىڭ سالىنىپ جاتقان جاڭا تەرمينالىنا باردىم. تاپسىرىس بەرۋشى - «قازاقستان تەمىر جولى» كومپانياسى. قۇرىلىس كەستەگە ساي ءجۇرىپ جاتىر. جاڭا تەرمينالدىڭ جالپى اۋدانى -  47000 شارشى مەتر بولادى. اۋەجايدىڭ قازىرگى تەرمينالىمەن بايلانىستىرىپ تۇرعان ىشكى وتپە جول بار. جاڭا تەرمينالدىڭ الدىندا 1000 كولىككە ارنالعان پاركينگ بولادى»، - دەپ جازدى قالا اكىمى.

ءا. يسەكەشيەۆتىڭ اقپاراتىنا سۇيەنسەك، جاڭا تەرمينال جىلىنا 7,6 ميلليون ادام قابىلداي الادى.

«ءبىر ايتا كەتەرلىگى، جاڭا تەرمينالدىڭ ىشىندە حالىقارالىق رەيستەر مەن ىشكى رەيستەر ەكى قاباتقا بولىنگەن. تەرمينالدىڭ ىشكى لوگيستيكاسى وتە ىڭعايلى. ادامدار كەزەك كوپ كۇتپەيدى، سەبەبى، 27 تەكسەرۋ پۋنكتى بار. قۇرىلىس 1 - ساۋىرگە دەيىن اياقتالۋى كەرەك. سونىمەن قاتار، اۆتوبۋستار توقتايتىن ايالداما مەن تاكسيلەرگە ارنالعان تۇراق تا سالىنىپ جاتىر»، - دەپ جازعان ءا. يسەكەشيەۆ فەيسبۋك الەۋمەتتىك جەلىسىنە.

اۆتور: كەنجەكەي توقتامۇرات قىزى