رەسەي ۇلكەن تەاترىنىڭ ايگىلى ءبيشىسى قازاقستاندا باستان وتكەرگەن قىزىقتارىن ايتىپ بەردى
رەسەيدىڭ 40 جاستاعى ەڭبەك سىڭىرگەن ءارتىسى قازاقستانعا «لەدي» اتتى سپەكتاكلمەن بىرگە كەلدى. ۆولوچكوۆا گاسترولى اياسىندا تاراز، قاراعاندى، پاۆلودار، الماتى قالالارىنا باردى. سونداي-اق، ول قازاقستانمەن شەكارالاس قىرعىزستاننىڭ استاناسىنا دا ونەر كورسەتىپ كەلگەنى بەلگىلى. بۇگىن ا. ۆولوچكوۆا استانا قالاسىندا جاس تالانتتارمەن كەزدەسىپ، ەلوردالىق جۋرناليستەرگە سۇحبات بەردى.
- قازاقستاننىڭ بىرنەشە قالاسىنا باردىڭىز. قىزىققا تولى ساياحاتىڭىز تۋرالى ايتىپ بەرىڭىزشى؟
- قىزىق كوپ بولدى عوي. قازاقستاندا قار كوپ جاۋادى ەكەن. بىشكەكتەن قاراعاندىعا كەلە جاتقاندا، قاتتى بوران سالدارىنان، قار قۇرساۋىندا قالدىق. مۇنداي قورقىنىشتى ومىرىمدە بۇرىن سوڭدى كورمەگەنمىن. ماشينا كەلە جاتادى دا توقتاپ قالادى، سەبەبى، الدا جۇرەتىن جول جوق، قار باسقان. ماشينا ىشىندەگى ارتىستەر شىعىپ، كولىكتى يتەرۋگە تىرىستىق. سۋىق جەل ءتيىپ، تاماعىم ءبىتىپ قالدى. ءبىراق، بۇل ءبىزدىڭ ەڭسەمىزدى تۇسىرگەن جوق، ءبىزدىڭ ۇجىم وتە كەرەمەت. جالپى، مەن اياق استى جوسپار قۇراتىن اداممىن. بۇگىن استانانىڭ وزىمە جىلى تەاتر ساحنالارىندا كونسەرت قويسام با دەپ ويلاعان ەدىم. ءبىراق، قازاقستانداعى مەرەكەگە بايلانىستى، بۇكىل كونسەرت زالدارى بوس ەمەس ەكەن. مەن قازاقستاندىقتاردى تاۋەلسىزدىكتىڭ 25 جىلدىعىمەن قۇتتىقتايمىن. سوندىقتان، قۇربىما تىم بولماسا بالالار ءۇشىن ماستەر-كلاسس وتكىزەيىن دەگەن ۇسىنىسىمدى ايتتىم. بۇگىن سونداي-اق، جابىق كورپوراتيۆتى كەشكە بارىپ كونسەرت قويامىن.
- قازاقستانعا ءجيى كەلىپ تۇراسىز با؟ استانادا دوستارىڭىز بار شىعار؟
- بىلەسىز بە، دوستارىم بار دەپ ايتا المايمىن، ءبىراق، جاقسى ادامداردىڭ بارىن بىلەمىن. قازاقستاندى قاتتى جاقسى كورەمىن جانە حالىقتىڭ قوناقجايلىلىعىنا تاڭداي قاعامىن. كۇن سايىن قاي جەرگە بارسام دا سونى بايقايمىن. مىسالى، وتكەن جولى قالالار اراسىنداعى ءدامحاناعا توقتاپ، تاماعىمدى «ءجىبىتۋ» ءۇشىن ءدامحانا يەسىنەن ىستىق سۋ سۋرادىم. ال، ءدامحانا يەسى داستارحان جايىپ بەردى. ءتىپتى، سپەكتاكل الدىندا 50 گرامم كونياك ءىشىپ الدىم. سپەكتاكلدە قاتتى بيلەيتىن جەرلەر جوق، سوندىقتان دا، ىشىمدىك ىشۋگە بولاتىن ەدى.
- ال، قازاقستاننىڭ بالەت مەكتەبىنە قانداي باعا بەرەسىز؟ جۋىردا استانادا حورەوگرافيا اكادەمياسى اشىلعانىن بىلەتىن شىعارسىز؟
- مەن بۇل اكادەمياعا بارا العان جوقپىن، سوندىقتان، قانداي دا ءبىر باعا بەرە المايمىن. ءبىراق، استانادا سونداي مەكتەپتىڭ اشىلعانى مەنى قۋانتىپ وتىر. مەكتەپتەگى ۇستازدار قۇرامى مىقتى بولسا ەكەن دەپ تىلەيمىن. جەكە ءوز باسىما كەلسەم، بۇل مەكتەپتە ماستەر كلاسس وتكىزىپ، شىعارماشىلىق كەزدەسۋلەرگە كەلىپ تۇرۋعا ەش قارسىلىعىم جوق. جالپى، مەن قازاق تەاترلارىندا ونەر كورسەتكەمىن، الماتى، استانا قالالارىندا بيلەگەنمىن. قازاقستانداعى تەاترلاردىڭ جاعدايى جاقسى. تەاترلارمەن قاتار، بالەت مەكتەبى دە دامىسا، جاقسى بولادى. استانا وپەرا جانە بالەت تەاترى بار ەكەن، ياعني، جاس بۋىن ءۇشىن تالپىناتىن ورىن بار.
اۆتور: كەنجەكەي توقتامۇرات قىزى
