باس پروكۋراتۋرا ءوزىن ورتەگەن ايەلدىڭ ۇلىن ۇستاۋ ءساتى تۇسىرىلگەن ۆيدەونى تەكسەرەدى
بۇل تۋرالى Tengrinews.kz ءتىلشىسىنىڭ ۆەدومستۆوعا جولداعان ساۋالعا ايتىلعان جاۋاپتا ايتىلدى.
«ەربول احمەتوۆقا قاتىستى قىلمىستىق ىسپەن قاتار ونى ۇستاۋ ءساتى تۇسىرىلگەن ۆيدەوجازبا تەكسەرىلىپ جاتىر. شۋ اۋداندىق سوتىنىڭ شەشىمىمەن ەربول احمەتوۆ زاڭسىز ەسىرتكى ساقتاعانى ءۇشىن 2015-جىلدىڭ 15- ماۋسىمىندا 4,5 جىلعا باس بوستاندىعىنان ايىرىلعان بولاتىن. سوت ۇكىمى زاڭدى كۇشىنە ەندى. رىسمانوۆانىڭ ونىڭ ۇلىن زاڭسىز قاماۋعا الدى دەگەن مالىمدەمەلەرى تەكسەرىلىپ جاتىر»، - دەپ حابارلادى باس پروكۋراتۋرا وكىلدەرى.
سونىمەن قاتار، ۆەدومستۆونىڭ باسپا ءسوز قىزمەتىندەگىلەر احمەتوۆتى ۇرىپ-سوقتى دەپ ايىپتالعان وبلىستىق ءى ءى د قىزمەتكەرى ەرلان جيدەشەۆتىڭ سوتتالعانىن ايتتى.
ءبىراق سوت ۇكىمى زاڭدى كۇشىنە ەنگەن جوق. ءىستى جامبىل وبلىسىنىڭ سوتى قاراپ جاتىر. ايتا كەتەيىك، ۆەدومستۆوارالىق توپتىڭ جۇمىسى ءالى دە جالعاسىپ جاتىر.
ەسكە سالايىق، 6- جەلتوقساندا ساعات 12:16 دا ۆەدومستۆو عيماراتىنىڭ باقىلاۋ-وتكىزۋ پۋنكتىنە ايەل ادامنىڭ ءۇش سەرىگىمەن كەلىپ، سىرتقى كيىمىن شەشىپ، بەنزين قۇيىپ ءوزىن-ءوزى ورتەگەنى حابارلانعان بولاتىن. الدىن الا مالىمەتتەر بويىنشا، ول ايەلدىڭ 1968-جىلعى ازاماتشا رىسمانوۆا م. ە. ەكەنى انىقتالعان. ول 1988-جىلعى ە. ن. احمەتوۆ ەسىمدى ۇلىنا قاتىستى شىققان سوت ۇكىمىنە كەلىسپەگەندىكتەن، وسى قادامعا بارعان. م. ە. رىسمانوۆا باس پروكۋراتۋراعا 2016-جىلى 28- قاراشادا وسى ءىس بويىنشا ۇندەۋ جاريالاعان. وسى ءىستى قايتا قاراپ شىعۋ ءۇشىن باس پروكۋراتۋرا سوتتان قىلمىستىق ءىس ماتەريالدارىن الدىرعان بولاتىن»، - دەدى ۆەدومستۆوداعىلار.
ال كەيىنىرەك باس پروكۋرور استاناداعى باس پروكۋراتۋرانىڭ عيماراتى الدىندا ءوز-ءوزىن ورتەگەن ايەلدىڭ ماسەلەسىمەن جەكە اينالىسۋعا ۋادە بەرگەن بولاتىن. وكىنىشكە وراي، 14- جەلتوقساندا 48 جاستاعى مايرا رىسمانوۆا اۋرۋحانادا قايتىس بولدى.
