قازاقستاندا ارنايى وپەراتسيا كەزىندە قانشا ادام ۇستالدى؟
ۇلتتىق قاۋىپسىزدىك كوميتەتى «ات-تاكفير ۋال-حيدجرا» ءدىني-ەكسترەميستىك ۇيىمىنىڭ ۇياشىقتارىن بەيتاراپتاندىرۋ بويىنشا 21- جەلتوقساندا باستالعان ارنايى وپەراتسيانى اياقتادى.
«ىشكى ىستەر ورگاندارى بولىمشەلەرىمەن بىرلەسە ءدىني الاۋىزدىقتى قوزدىردى جانە اتالعان ۇيىمنىڭ ءىس-ارەكەتىنە قاتىستى دەگەن كۇدىكپەن بارلىعى 33 ادام ۇستالدى»، - دەلىنگەن ۇ ق ك حابارلاماسىندا.
«ات-تاكفير ۋال-حيدجرا» جاقتاۋشىلارىنىڭ تۇراتىن جانە جينالاتىن مەكەنجايلارى بويىنشا جۇرگىزىلگەن ءتىنتۋ بارىسىندا ءدىني ماتەريالدار، كومپاكت-ديسكتەر، كومپيۋتەرلىك تەحنيكا جانە ۇلكەن سومادا اقشا تابىلىپ، الىندى. قاجەتتى ساراپتامالار تاعايىندالىپتى.
سونىمەن قاتار، بۇگىندە الىنعان ايعاقتار جيىنتىعى بويىنشا «ات-تاكفير ۋال-حيدجرا» ۇياشىعىنىڭ 7 كوشباسشىسى مەن بەلسەندى قاتىسۋشىلارىنا قاتىستى قاماۋعا الۋ تۇرىندە، بىرەۋىنە - ەشقايدا كەتپەۋ جايىندا الدىن الۋ شارالارى قولدانىلعان.
مۇنىمەن بىرگە، 8 ادامعا قاتىستى كەلۋ تۋرالى مىندەتتەمە تۇرىندە پروتسەسسۋالدىق ماجبۇرلەۋ شاراسى تاڭدالدى. ۇيىمنىڭ قاتارداعى 17 مۇشەسى ازىرشە تەرگەۋگە كۋاگەر رەتىندە تارتىلادى.
«ۇستالعان ادامداردىڭ كوپشىلىگى مويىنداۋ تۇسىنىكتەرىن بەردى جانە تەرگەۋمەن ىنتىماقتاسىپ جۇمىس ىستەۋگە نيەت ءبىلدىردى. ولاردان راديكالدىق يدەولوگيا ناسيحاتتالاتىن جاسىرىن جيىنداردى وتكىزۋ تۋرالى مالىمەتتەر الىندى. سونىمەن قاتار قازاقستاندىق ۇياشىقتاردىڭ ءىس-ارەكەتى شەتەلدەن باسقارىلىپ وتىرعان.
جەدەل-تەرگەۋ ءىس-ارەكەتتەرى جالعاسۋدا»، - دەپ حابارلادى ۆەدومستۆوداعىلار.
ەسكە سالايىق، 21- جەلتوقساندا ۇ ق ك الماتى مەن قازاقستاننىڭ ءۇش وبلىسىندا ەلىمىزدىڭ اۋماعىنداعى «ات-تاكفير ءۋال-حيدجرا» ءدىني-ەكسترەميستىك ۇيىمىن زالالسىزداندىرۋ ماقساتىندا ارنايى وپەراتسيانى باستاعان بولاتىن. ءدىني ارازدىقتىقتى تۋدىردى دەگەن كۇدىكپەن ەلىمىزدە تىيىم سالىنعان ۇيىمنىڭ 16 ادامى ۇستالىپ، ۇلتتىق قاۋىپسىزدىك كوميتەتىنىڭ اۋماقتىق ورگاندارىنا جەتكىزىلگەن.
«بۇل قىلمىستىق ۇيىمنىڭ مۇشەلەرىنىڭ «ءال-كايدانىڭ»، د ا ي ش- تىڭ جانە باسقا دا تەرروريستىك توپتاردىڭ يدەولوگياسىن ۇستاناتىنى بەلگىلى»، - دەلىنگەن ۇ ق ك وكىلدەرىنىڭ حابارلاماسىندا.
