ايگىلى شىمكەنتتىك ميلليونەردىڭ مەككەدە مەشىت سالىپ جاتقانى راس پا؟

استانا. قازاقپارات - ەل اراسىندا تانىمال كاسىپكەر دىنمۇحاممەد ىدىرىسوۆ قايرات ساتىبالدىمەن بىرىگىپ، مەككەدە مەشىت سالىپ جاتىر دەگەن اڭگىمە بار دەپ حابارلايدى رەيتينگ گازەتى.

بۇل قانشالىقتى راس؟ «حالىق ايتسا قالىپ ايتپايدى». دەگەنمەن ميلليونەر بۇل ءسوزدىڭ قاۋەسەت ەكەنىن ايتادى.

«قايرات ساتىبالدىمەن قارىم-قاتىناسىمىز جاقسى. راس، 2000-جىلدارى قاجىلىققا بىرگە باردىق. ءبىراق، سوڭعى ون جىلدىڭ ىشىندە ءارى كەتسە ءۇش-ءتورت رەت جولىققان شىعارمىز. سوندىقتان، مۇنىڭ بارلىعى بوس ءسوز. بيزنەستە ەشقانداي قارىم-قاتىناسىمىز، ورتاق مۇددەمىز جوق. مەككەدە مەشىت سالۋعا قاتىستى اڭگىمە دە شىندىققا جاناسپايدى. جالپى ايتارىم، اكەم مارقۇم مەكتەپتىڭ ديرەكتورى بولاتىن. سوندا انام ۇنەمى «سەنى جۇرت «ديرەكتوردىڭ بالاسى» دەپ ايتادى، سوندىقتان ساباعىڭدى جاقسى وقى. ءسال قيىس كەتىپ، دۇرىس ەمەس تىرلىك جاساساڭ، اڭگىمە شىعادى» دەپ ەسكەرتەتىن.

سوندىقتان مەكتەپتى التىن مەدالمەن ءبىتىردىم. ينستيتۋتقا تۇسكەندە ۇزدىك بولۋعا تالپىندىم، سەبەبى ۇلگەرىمىم تومەن بولعاندا «مەدالدى اكەسى ديرەكتور بولعانى ءۇشىن عانا العان» دەگەن اڭگىمەگە قالار ەدىم. سوندىقتان، مەن وقىعان اۆتوجول ينستيتۋتىنىڭ تاريحىندا ءبىرىنشى سەمەستردە بارلىق پاندەردى «بەسكە» تاپسىرعان تۇڭعىش قازاق بولدىم. ساباقتىڭ بارلىعى ورىس تىلىندە جۇرەتىن. سول قاعيدات بويىنشا، ءسوز بولماسىن دەپ بيلىكتە جۇرگەن تانىستارىممەن قاندايدا ورتاق مۇددە بار ىسكە ارالاسپايمىن»، - دەيدى ىدىرىسوۆ «رەيتينگ» گازەتىنە بەرگەن سۇحباتىندا.

دىنمۇحاممەد ىدىرىسوۆ - بۇكىل ەلگە، اسىرەسە بيزنەس الەمىنە كەڭىنەن تانىلعان ازامات. ارىستىڭ تۋماسى «فوربس» جۋرنالى ازىرلەگەن ەڭ داۋلەتتى قازاقستاندىق بيزنەسمەندەردىڭ تىزىمىندە 11-ورىنعا جايعاسقان. ازىرگە، ىدىرىسوۆ وڭتۇستىكتەن شىققان ەڭ باي ازامات بولىپ تۇر. ونىڭ جيىپ-تەرگەن مۇلكىن ايگىلى جۋرنال 479 ميلليون دوللارعا باعالاپ وتىر.

«ولاردىڭ ەسەبى دۇرىس ەمەس. سەبەبى وسى ءتىزىمدى جاساقتايتىندار تەك بار بيزنەسىڭدى جالپىلاما ەسەپتەپ جازادى دا، العان قارىزدارىڭ مەن نەسيەلەرىڭدى ەسكەرمەيدى. بۇل تىزىمنىڭ شىندىققا جاناسپايتىنىن وزدەرىنە دە ايتقانمىن. ءبىراق، جۋرنال وزىندىك تاسىلدەرگە جۇگىنەدى»، - دەيدى ميلليونەر.

قازىر ىدىرىسوۆتىڭ شەتەلدە بيزنەسى بار. سولاي بولا تۇرا ول ماقساتىم تۋعان ەلگە ينۆەستيتسيا تارتۋدى كوزدەيدى.

«شەتەلدە بيزنەستى اركىم ءارقيلى سەبەپپەن جۇرگىزەدى. ماسەلەن، مۇناي شىعاراتىندار شيكىزاتتى شەتەلدە وڭدەپ، ساتۋعا ۇمتىلادى. ال مەنىكى كەرىسىنشە، ەلگە ينۆەستيتسيا تارتۋ. مەن شەتەلگە ءجۇز ميلليون جۇمساسام، ورنىنا ەكى ءجۇز ميلليون ينۆەستيتسيا تارتىپ جاتىرمىن نەمەسە نەسيە الامىن. سىرتتان ينۆەستيتسيا تارتۋ وڭاي شارۋا ەمەس. ول جاقتا سەنىڭ جۇمىس تاجىريبەڭە قارايدى. 5-10  جىل بويى جۇمىس ىستەگەنىڭە قاراپ بارىپ قارجى بەرەدى. سوندىقتان مەندەگى باستى ماقسات - تۋعان ەلگە كوبىرەك اقشا تارتۋ»، - دەيدى بيزنەسمەن.