پۋتين: رەسەي قارۋلى كۇشتەرى قازىر كەز-كەلگەن قارسىلاستارىنان كۇشتى

استانا. قازاقپارات - رەسەي پرەزيدەنتى ۆلاديمير پۋتين رەسەي قارۋلى كۇشتەرى قازىر «كەز-كەلگەن ىقتيمال قارسىلاستان كۇشتى ەكەنىن» مالىمدەدى.

ونىڭ سوزىنشە، ارميا «ەلگە تونەتىن قاۋىپتىڭ بەتىن قايتارۋ جوسپارىنا تۇزەتۋ ەنگىزۋگە» دايىن بولۋى ءتيىس.

«قازىر ءبىز كەز-كەلگەن ىقتيمال باسقىنشىدان كۇشتىرەكپىز دەپ سەنىممەن ايتۋعا بولادى» دەپ مالىمدەدى پۋتين 22- جەلتوقساندا قورعانىس مينيسترلىگىندە وتكەن قورىتىندى جيىندا.

ول رەسەي ءوزىنىڭ يادرولىق قۋاتىن كۇشەيتىپ، «قولدانىستاعى جانە كەلەشەكتە جاسالۋى ىقتيمال كەز-كەلگەن زىمىراننان قورعانىس جۇيەسىنە تويتارىس بەرە الاتىن» زىمىراندارى بولۋى ءتيىس ەكەنىن ايتتى.

بۇل كۇنى ا ق ش- تىڭ جاڭا سايلانعان پرەزيدەنتى دونالد ترامپ ا ق ش- تىڭ يادرولىق قۋاتىن نىعايتۋعا شاقىردى. ترامپ Twitter- دەگى اككۋانتىندا «ا ق ش ءوزىنىڭ يادرولىق قاۋقارىن تىم بولماعاندا الەم قارۋدىڭ بۇل تۇرىنە دەگەن كوزقاراسىن قاشان وزگەرتكەنگە دەيىن كۇشەيتە بەرۋى ءتيىس» دەپ جازدى. كەيىن ترامپتىڭ باسپا ءسوز حاتشىسى دجەيسون ميللەر ترامپ بۇل مالىمدەمەسىندە قازىر الەمدە يادرولىق قارۋدىڭ كەڭ تاراۋ قاۋپى تۋىنداعانىن جانە ونىڭ اسىرەسە تەرروريستىك ۇيىمدار مەن بيلىگى تۇراقتى ەمەس ەلدەردە كەڭ تارالۋىنا كەدەرگى كەلتىرۋدىڭ اسا قاجەتىن مەڭزەگەنىن ايتتى.

رەسەي مەن ا ق ش 2010-جىلى جاسالعان ستراتەگيالىق شابۋىلداۋشى قارۋ- جاراقتاردى ارى قاراي دا شەكتەۋ مەن ازايتۋ تۋرالى كەلىسىم اياسىندا يادرولىق ارسەنالدارىن ازايتۋعا مىندەتتەمە العان.

قارۋلانۋ ماسەلەسى جونىندەگى امەريكالىق ساراپشى ستيۆەن پايفەر Twitter- دە ترامپقا جاۋاپ رەتىندە ا ق ش- تا سەنىمدى يادرولىق ارسەنالى بار بولعاندىقتان ونىڭ ۇلعايتۋدىڭ قاجەت ەمەسىن جازدى. برۋكگين ينستيتۋتىنىڭ قارۋلانۋدى باقىلاۋ جونىندەگى باستاما ديرەكتورى، ا ق ش- تىڭ ۋكرايناداعى بۇرىنعى ەلشىسى ستيۆەن پايفەردىڭ پىكىرىنشە، رەسەي ءوز يادرولىق ارسەنالىن قىسقارتۋى كەرەك.

رەسەي مەن ا ق ش- تىڭ قارىم-قاتىناسى سوڭعى بىرنەشە جىلدا، اسىرەسە ماسكەۋ 2014-جىلى ناۋرىزدا ۋكراينادان قىرىم تۇبەگىن اننەكسيالاپ الىپ، ارتىنشا ۋكراينا شىعىسىنداعى رەسەيشىل سەپاراتيستەردى قولداعان سوڭ ناشارلاپ كەتكەن.

«ازاتتىق»